Kem Lingón 128 - Udél Dwata: Gna Kesfasad ne Lomi Kesfasad

Sngal bè yóm kneged le ebè Jirusalim

¹ Hligal le kul yó kem tau wen klikò le ke Dwata, yó kem tau gel mò du yó kem hloloen kul.

² Lemwót bè kmoem nmò, angat wen gónóhem gel ma yó kem wen muhem du. Angat gsengel nawahem du, ne hyu kógów klowilem.

³ Yóm tuha libunem, lómón ke hulu alì mungu mteg bè lósólem. Yó kem ngaem logi myón hilol lemisahem, hol lómón ke koyu ulib tilob ktowok le.

⁴ Hol lómón yó se kmò któbóng Dwata yóm tau gel mimón du.

⁵ Dwata he hol kmudung kóm hewóten bè Sayun yóm kun bulul. Angat htonen kóm he yóm kgulék klowil yó kem tau bè Jirusalim bè yóm klawihem mowil.

⁶ Dwata he hol htahà klowilem anì angat gafit tonem lu yó kem tmémê béléem. Dwata he hol henek nawa le yó kem tau Israél.