Kem Lingón 126 - Udél Dwata: Gna Kesfasad ne Lomi Kesfasad

Sngal bè yóm kneged le ebè Jirusalim

¹ Bè yóm tehe khulék Dwata tekuy ebè Jirusalim, hol lómón ke olo kna.

² Tey kkuli tekuy, lel kuy hligal semngal. Yó udél yó kem tau bè dumu benwu, mon le, “Tey któbóng Dwata kul yó kem tau yó.”

³ Tahu se, tey bong któbóng Dwata tekuy. Ya tey kligal tekuy bè yóm kdaw yó.

⁴ Ó Dwata, bud hulékem ebélê me yóm tehe kehyu klowil me, lómón yóm kulón, bud gel hlelen yó kem él deng kti.

⁵ Yó kem tau tehe mkik bè yóm igò le mehek, tles bud hefligalem lu bè yóm kuta le.

⁶ Yó kem tau tehe mkik bè yóm igò le mehek, angat tey kligal le semngal sok bang le muta.