Kem Lingón 123 - Udél Dwata: Gna Kesfasad ne Lomi Kesfasad

Sngal bè yóm kneged le ebè Jirusalim

¹ Ó Dwata, lengalae edyó béléem bè longit bè yóm gónóhem myón kmamal.

² Yóm klengalau ni, hol lómón ke yóm ngà logi gel tóbóng lówó, sónmoen lengalà ebè yóm gónóhen mogot, duhen ke yóm ngà libun gel tóbóng lówó, sónmoen lengalà ebè yóm gónóhen mogot se kun. Lómón yó se kum klengalà ebéléem, Dwata yóm hol kum gónô mogot, nangat me yóm kkoduhem kum.

³ Hol knoduhem mi, Dwata, hol knoduhem mi. Tey sidek khisik le kum.

⁴ Tey kehnê le kum yó kem tau bong kendengen le. Gel henskong le mi yó kem tau heklabak alì mdà kum elaan.