Kem Lingón 12 - Udél Dwata: Gna Kesfasad ne Lomi Kesfasad

Lingón Dabid

¹ Tnóbóngem ou, Dwata, abay se laen dù bud tau tonem mimón kóm, ne deng le lana yó kem tau gsalig.

² Yó kem tau sebét, deng sket kul tmulón kéng bè yóm ket kul ba sotu. Dóyón le kem dumu le mò lan le smukat kul.

³ Hol lensónem, Dwata, yó kem tau hlingón dmóyón kem dumu le yó ne yó kem tau alì heklabak.

⁴ Yó mon le, “Guta me yóm nóyô me mlan bè udél me. Kihu mon me, laen dù tau gembek hemseng kum.”

⁵ Yó balà Dwata kul, monen, “Deng tonu yóm alì klunog le yó kem tau laen dù gmò le. Deng gungolu dolong yó kem tau élél hnayam le. Duhen yó, lemwóte naw e lenwà lu, ni se yóm tendo hendeen le béléu.”

⁶ Yóm fasad Dwata, laen kô dù belenen. Lómón blówón bukay deng hitu dulék le tmógó du bè ofi anì laen kô dù bolen.

⁷ Yó gónóm mon, Dwata, senflósem gel mofin kum bè yó kem tau mò sidek yó.

⁸ Yó kem tau mò sidek, tódô kihu gónóm mton kul, ya tey keheklabak le. Ne bè klamangen benwu, tendo dóyón yó kem tau yóm alì ksidek nmò tau.