Kem Lingón 119 - Udél Dwata: Gna Kesfasad ne Lomi Kesfasad

¹ Hligal le kul yó kem tau laen dù belen le, yó kem tau lemolò du yóm hlau Dwata.

² Hligal le kul yó kem tau mimón du yó kem hlolò Dwata kul, ne hol lemwót lem but blutut le yóm kebel le ke Dwata.

³ Laen dù sidek nmò le. Són lolò le yóm kun klan Dwata.

⁴ Deng wen hmoem kum, Dwata, duhen yóm hol kimón me yó kem hlauhem kum.

⁵ Hyu nawahu ke hol gfan bè kdê nmou yó kem deng hloloem kum.

⁶ Ke gotu nimónu yóm kdê hlauhem kum, laen kô dù gónów myak.

⁷ Ke deng dnalangu yó kem hlauhem hono tedeng, yó gónón hol tahu duhen yóm kdóyónu kóm, laen kô dù belenen.

⁸ Gotu nimónu yó kem hloloem kum. Hol béem abay bayà ou.

⁹ Tedu nmoen du yóm logi lomi lemnok anì laen dù belenen yóm gel kmoen? Yó nmoen, nimónen yó kem hlauhem, Dwata.

¹⁰ Béléu do, tódô hotuhu nawahu mò du yóm hmoem do. Hol tnóbóngem ou anì là guléhu du yó kem hlauhem.

¹¹ Eles tendo hendemu yó kem hlauhem anì là gemsalae béléem.

¹² Dóyónu uu, Dwata yóm hol gónóhu mogot. Hol tolokem dou yóm kóm lan.

¹³ Angat tendo gel sensulit monu yó kem deng hlauhem kum.

¹⁴ Tey kehligalu lemolò du yó kem hlauhem senta yóm kwen kendengenu.

¹⁵ Hennagiu yó kem gel hloloem kum, ne tey kehedemu du yó kem tolokem.

¹⁶ Tey kehyu nawahu du yó kem hlauhem, ne là kô klifótu du yóm udélem.

¹⁷ Ó Dwata, hol nmoem yóm hyu béléu, yóm tau tóbóng lówóhem, anì mowile, ne nimónu yóm udélem.

¹⁸ Htonem do yóm ktahuhen alì tennga lem yóm hlauhem.

¹⁹ Olohu tau milo ta nim tonok ni, wen tey muhu du yó kem hlauhem mò malak do, hol béem bnos béléu.

²⁰ Senflósen hol nô bè nawahu yóm óyóu temngón du yó kem hlauhem.

²¹ Hol nudélem yó kem tau heklabak, yó kem tau deng megtafak, yó kem tau là mimòn du yó kem hlauhem.

²² Hol béem abay lus lu ke henskong le o ne ke henwog le o, yakà deng gel nimónu du yó kem hloloem kum.

²³ Baluen ke stifun yó kem ngà tau hol geta ne mudél le sidek etahu, okóm do, tendo hendemu yó kem hlauhem.

²⁴ Hligale du yó kem hloloem do, tey tilob yóm kehlau le do.

²⁵ Lemwót bè yóm ksidek kegnómu du, tódóe masà lem kfung. Bud hlowilem ou hlanen bè udélem.

²⁶ Deng tulónu kóm yó kem atulu, ne deng bnalaem se ou. Ne ni hol tolokem do yó kem hloloem do.

²⁷ Tnóbóngem o anì hol tngónu lanen yó kem hlauhem, senflósu hemdem du yó kem hentaw ton gel nmoem.

²⁸ Tey sidek kebà nawahu, hol ten-gelem o mlan bè udélem.

²⁹ Hol hlayukem o bè yóm lan là tedengen. Ne lemwót bè yóm tey kehyuhem, tolokem do yó kem hlauhem.

³⁰ Deng eles néléku yóm kimónu kóm. Hol kóyóu ke lolou yó kem hlauhem.

³¹ Ó Dwata, tey ksaligu du yó kem hloloem kum. Hol béem bayà ou anì là wen gónóhu myak.

³² Ke tnóbóngem ou, hotuhu gelu lemolò du yó kem hlauhem,

³³ Hol tolokem do, Dwata, anì lolou kdê yó kem hlauhem.

³⁴ Benlayem ou khulung temnef anì nimónu yóm hlauhem, ne hewótu lem but blututu yóm kimónu du.

³⁵ Hloloem do yóm lan lemwót bè yó kem hlauhem, yakà bè yó du gónów hligal.

³⁶ Benlayem ou óyô mimón du yó kem hlauhem anì là kendengenu du yóm hnebelu.

³⁷ Kóhem bè ketngelu yó kem laen dù muhen, ne hlowilem o mlan bè udélem.

³⁸ Dnohoem yóm tehe fasadem do, yóm tau tóbóng lówóhem, yóm fasad nmoem bè yó kem tau wen klikò le kóm.

³⁹ Tnóbóngem ou anì kóhu yóm nmò gónóhu myak, yakà teyen hyu béléu yó kem hlauhem.

⁴⁰ Tey kóyóu mimón du yó kem hlauhem. Hnomihem klowilu lemwót bè yóm tey kehyuhem.

⁴¹ Ó Dwata, hegfanem béléu yóm tey kbong nawam do là monolen, duhen yóm kegewà deng tehe fasadem do.

⁴² Ominu yó wen gónóhu malà kul yó kem tau hemwog do, abay se snaligu yóm udélem.

⁴³ Hol benlayem o khulung mudél du yóm ktahuhem, yakà bè kem hlauhem du gónón wen nefet nawahu.

⁴⁴ Laen dù tul sónen yóm tendo kimónu du yó kem hlauhem.

⁴⁵ Laen dù bud gónów gfét, abay se hotuhu nawahu mimón du yó kem hlauhem.

⁴⁶ Là kóe myak tmulón du bè yó kem tau hol geta yó kem hlauhem.

⁴⁷ Tey kehligalu mimón du yó kem hlauhem, abay se bong nawahu kul.

⁴⁸ Tey nadatu yó kem hlauhem, lelu kembong nawa kul. Ne sónmou hemdem du yó kem hloloem kum.

⁴⁹ Hol hentulónem nawa yóm tehe fasadem do, yakà tek són yó du yóm nefet nawahu.

⁵⁰ Yóm fasadem do yó, yó yóm hmomi klowilu, ne mifa do bè kdê yó kem gónóhu glayam.

⁵¹ Tey kehwog le do yó kem tau heklabak, okóm là kô naw e knogol du yó kem hlauhem.

⁵² Ke gel hendemu, Dwata, yó kem tehe hlauhem ekni, yó se hemyu nawahu.

⁵³ Ke gel tonu yóm kekbê le du yó kem hlauhem yó kem tau mò sidek, tey sidek kebutu kul.

⁵⁴ Yó kem hlauhem mò utóm lingónu bè yóm klawihu milo lem nim benwu ni.

⁵⁵ Ke sok kifu, Dwata, gel hendemu uu, ne yó gónów mimón du yó kem hlauhem.

⁵⁶ Lemwót bè kimónu du yó kem hlauhem gónóhu hligal.

⁵⁷ Ó Dwata, tek són uu yóm dou Dwata. Fasadu kóm yóm kimónu yó kem udélém.

⁵⁸ Hotuhu nawahu mebel kóm. Knoduhem ou lómón yóm deng fasadem.

⁵⁹ Ke henklolu yóm dou kmò, fasadu kóm yóm klolou yó kem hloloem do.

⁶⁰ Là kóe tlek hanggà, tódô kendel nimónu yó kem hlauhem.

⁶¹ Tô hebtang le o bè salà yó kem tau gel mò sidek, okóm là kô klifótu du yó kem hlauhem.

⁶² Ke deng sóól buteng, btike, dóyónu uu, abay se hono tedeng yó kem hlauhem.

⁶³ Hol weu yó kem tau wen klikò le kóm, yó kem tau mimón du yó kem hlauhem.

⁶⁴ Bè klamangen benwu, Dwata, gfan yóm kbong nawa là monolen. Hol tolokem do yó kem hlauhem.

⁶⁵ Deng tey dê ne yó kem hyu deng nmoem béléu, Dwata, lómón yóm deng fasadem.

⁶⁶ Deng hentahuhu yó kem hlauhem. Ne ni, benlayem o khulung temnef ne ketngón.

⁶⁷ Gu laanem là deng semtódô do, denge tlas, okóm ni, hol nimónu yóm kóm udél.

⁶⁸ Tey hyu kmoem yóm uu, ne kdê yó kem nmoem, sal hyu. Hol tolokem do yó kem hlauhem.

⁶⁹ Gel tnifù le o kéng yó kem tau heklabak, okóm do, hol lemwót lem but blututu yóm kimónu du yó kem hlauhem.

⁷⁰ Yó kem tau heklabak yó koni, là hulung le temnef, okóm do, hligale du yóm hlauhem.

⁷¹ Tey hyu béléu yóm kehlayamem do anì dnalangu yó kem hlauhem.

⁷² Tey mebtes béléu yó kem hlauhem senta bè yó kem hilu katihen tahu blówón ne blówón bukay.

⁷³ Uu se tehe mò do, Dwata. Ne ni benlayem o khulung temnef anì lolou yó kem hlauhem.

⁷⁴ Ke ton le o yó kem tau wen klikò le kóm, hyu ke wen kligal le, abay se deng nefet nawahu yóm udélém.

⁷⁵ Tngónu, Dwata, tedeng yóm kkukumem. Yó gónóm semtódô do abay se wen muhen béléu.

⁷⁶ Yó hem kbong nawam là monolen hol hemyu nawahu mlan bè yóm deng fasadem do, yóm tau tóbóng lówóhem.

⁷⁷ Hol knodum o anì mowile, yakà bè hlauhem du gónów hligal.

⁷⁸ Yó kem tau tmifù do kéng, yake hol henyakem lu. Okóm do, tendo hendemu yó kem hlauhem.

⁷⁹ Hyu ke hol le mógów ebéléu yó kem tau wen klikò le kóm, yó kem tau temngón du yó kem hlauhem.

⁸⁰ Hyu ke laen dù belenen bè yóm kimónu yó kem hlauhem anì laen dù gónów myak.

⁸¹ Botong laen dù bud kgisu mangat du yóm kehewaem do, okóm ken-gel nawahu yóm udélem.

⁸² Denge bned mangat du ne kdohoen yó kem deng fasadem do. Kilón de kehyuhem nawahu?

⁸³ Laen dù bud muhu ne, hol lómón ke mkéle bè yóm sning kulit deng sidek. Balù lómón ni kmou, là kô klifótu du yó kem hlauhem.

⁸⁴ Kegenen de dù kangatu? Kilón de ktafakem kul yó kem tau hemsidek do?

⁸⁵ Yó kem tau heklabak yó, kem tau deng kembê du yó kem hlauhem, deng wen sol ngelem nokol le mò gónó le hebtang do.

⁸⁶ Kdê yó kem hlauhem, hono gsalig. Hol nofinem o bè yó kem tau tô hemsidek do là duón.

⁸⁷ Udì duen gónó le là hmatay do, okóm là kô knogolu du yó kem hlauhem.

⁸⁸ Lemwót bè yóm kbong nawam là monolen, hol lenwaem klowilu anì henlósu mimón du yó kem hloloem kum.

⁸⁹ Yóm kóm udél, Dwata, laen kô dù tul sónen yóm tey kbegelen dyó bè longit.

⁹⁰ Yóm ktenebem bélê me gefet bè kdê bud lugod tau, yóm kbegelen lómón yóm tonok deng dlimunem.

⁹¹ Efet ni kmoen ni, sana yó ne kegseb yó kem hlauhem, yakà tódô kdê le mò du yóm kóm kóyô.

⁹² Ke là gel hefligalen do yó kem hlauhem, denge matay ne bè yóm alì keglayamu.

⁹³ Là kô klifótu du yó kem hlauhem, abay se mlan bélê le gónóm hlowil dou.

⁹⁴ Hol lenwaem ou, yakà uu du mfun dou. Deng hotuhu gelu mimón du yó kem hlauhem.

⁹⁵ Tô hnékét le o bè lan yó kem tau gel mò sidek, okóm tendo hendemu yó kem hlauhem.

⁹⁶ Yóm kdê tonu, sal gel wen gónó le là ket, okóm yó kem hlauhem, tódô ket du kdéen.

⁹⁷ Tey kbong nawaw du yó kem hlauhem, Dwata, seflósu kdaw tendo hemdem kul.

⁹⁸ Benlay le ou khulung hedem senta yóm kul khulung hedem yó kem hohonu, yakà senflós le tendo malak do.

⁹⁹ Bong he do khulung temnef senta yóm kul khulung temnef yó kem tau tmolok do, abay se do tendo eles nulón nawaw yó kem hloloem do.

¹⁰⁰ Wen khulungu hedem senta yóm kul khulung hedem yó kem tuha, abay se tendo nimónu yó kem hlauhem.

¹⁰¹ Elese gel temgama anì là lolou du yóm lan mit do elem sidek, abay se móyóe mimón du yó kem udélem.

¹⁰² Là kô deng snonolu kul yó kem hloloem do, abay se hol uu, Dwata, yóm gel tmolok dou.

¹⁰³ Kehlingónu du yóm gel hloloem kum, tey mi senta tneb.

¹⁰⁴ Lemwót bè yó kem hlauhem yóm khulungu hedem. Yó gónóm mon, tey kenbéu yóm nmò sidek.

¹⁰⁵ Yóm kóm udél, Dwata, lómón ke solok tendo gónóhu galak, ne lómón ke layag mò hlayag lanu.

¹⁰⁶ Tey mget yóm tehe fasadu kóm, duhen yóm kimónu yó kem tedeng gel hloloem kum.

¹⁰⁷ Tey sidek kegnómu du, Dwata, yó kem gónóhu glayam. Hol hlowilem ou lómón yóm deng fasadem dou.

¹⁰⁸ Hnungolem yóm keslamatu béléem, Dwata, ne hol tolokem do yó kem hlauhem.

¹⁰⁹ Balù yóm deng klonihen béléu hatay, okóm là kô naw e klifót kul yó kem hlauhem.

¹¹⁰ Yó kem tau gel mò sidek, wen tô holot le dou, okóm là kô naw e knogol kul yó kem hlauhem.

¹¹¹ Yó kem hlauhem, Dwata, yó se yóm dou nfun, ne laen kô dù sónen yóm kfunu du. Yó se gónón lemwót kligalu.

¹¹² Deng eles hendemu ne yóm kimónu du yó kem hlauhem efet kól bè kukol towoku.

¹¹³ Tey keklitu kul yó kem tau megewu nawa le kóm, okóm dou, tey bong óyóu mimón du yó kem hlauhem.

¹¹⁴ Uu se yóm dou gónó e hles ne dou gónó heklung. Són udélem yóm tendo gónón mefet nawahu.

¹¹⁵ Yu kem tau gel mò sidek, hlayuk ye béléu, yakà són hlau yóm do Dwata yóm dou lolò.

¹¹⁶ Ten-gelem ou, Dwata, lemwót bè yóm deng fasadem do, anì mowile. Blayem do yóm nefet nawahu anì laen dù gónóhu myak.

¹¹⁷ Ntudem ou, ne angate gewà ne tódô hlós gel nimónu yó kem hloloem kum.

¹¹⁸ Okóm deng hol kenbéem yóm kdéen tau mulé du yó kem hloloem. Bè yóm là kimón le, olo le hegsukat knô le.

¹¹⁹ Yóm kdéen tau gel mò sidek talak tonok, lómón ktonem kul, lómón desenfól gel kóhem. Yó gónón bong óyóu lemolò du yó kem hloloem kum.

¹²⁰ Botong setbol kkelu lemwót bè klikou kóm, knikou yóm angat kkukumem do.

¹²¹ Deng nmou yóm tedeng ne yóm hyu, hol béem bayà ou bè yó kem tau gel hmohon dou.

¹²² Hol fasadem do yóm któbóngem do, yóm tau tóbóng lówóhem. Béem bayà o ke hen-gnok le ou yó kem tau heklabak.

¹²³ Hfuhu imaku mangat du yóm kehewaem do, anì tonu yóm kdohoen yóm deng fasadem do.

¹²⁴ Ou yóm tóbóng lówóhem. Nmoem béléu yóm kóyóem hlanem bè yóm kbong nawahem do là monolen, ne hol tolokem do yó kem hloloem do.

¹²⁵ Benlayem ou khulung milô, yóm tau tóbóng lówóhem, anì getnefu yó kem hloloem.

¹²⁶ Ni se yóm kdaw ktafakem kul, Dwata, abay se deng gotu nulé le yó kem hlauhem yó kem tau gel mò sidek.

¹²⁷ Tahu se, tey kbong nawahu du yó kem hlauhem senta kbong nawahu yóm tahu blówón, balù yóm blówón hol tahu duhen.

¹²⁸ Lemwót bè yóm ktedeng yóm ket hlauhem, yó gónóhu meklit du yó kem sidek nmò tau.

¹²⁹ Tey hyu yó kem gel tolokem kum, Dwata, tódô hotuhu nawaw mimón du.

¹³⁰ Bè yóm ktolok le udélem, lómón ke layag. Balù yó kem tau laen dù tngón le, wen gwa le du.

¹³¹ Tey kesgalu nawahu du yó kem hlauhem.

¹³² Bninguyem ou, Dwata, ne hol knoduhem o, hol lómón yóm kkoduhem yó kem tau kembong nawa kóm.

¹³³ Hol nalakem ou hlanem bè udélem, anì là gmunge bè yó kem sidek.

¹³⁴ Lenwaem o lem tdok yó kem tau gel hemgnok dou, anì gbeku mimón du yó kem hlauhem.

¹³⁵ Knudungem ou mlan bè yóm kbong nawahem dou. Hol tolokem dou yóm kdê hlauhem.

¹³⁶ Ke gel hendemu yó kem tau là mimón du yó kem hlauhem, tey sidek kkiku.

¹³⁷ Ó Dwata, tey ktedengem, ne tey tedeng yó kem hlauhem.

¹³⁸ Yó kem deng hloloem kum, laen kô dù gónón là ket, hono gsalig.

¹³⁹ Tey sidek kkinì kuluhu bélê le yó kem hohonu, abay se là kenmón le du yó kem udélem.

¹⁴⁰ Sal gel dohò yó kem fasadem. Yó gónóhu kembong nawa kul.

¹⁴¹ Balù yóm klaen dù muhu, ne baluen ke kenhisik le o, okóm là kô klifótu du yó kem hlauhem.

¹⁴² Yóm ktedengem, Dwata, laen kô dù tul sónen. Ne hono tahu yó kem hlauhem.

¹⁴³ Tey keglayamu, ne sónmoen tafa nawahu. Okóm lemwót bè yó kem hlauhem gónón wen kligalu.

¹⁴⁴ Hono tedeng yó kem hloloem kum. Hol benlayem o khulung temnef anì mowile.

¹⁴⁵ Hol lemwót lem but blututu yóm ktabahu ebéléem, Dwata, hol bnalaem o. Tendo nimónu yó kem hlauhem.

¹⁴⁶ Htóbónge béléem, lenwaem o, anì gbeku mimón du yó kem hloloem kum.

¹⁴⁷ Gu laanen là deng btù mata kdaw, denge sana htóbóng béléem. Són ken-gel nawahu yó kem udélem.

¹⁴⁸ Sulóyu buteng là tungô, hendemu yó kem deng fasadem do.

¹⁴⁹ Hol hnungolem o lemwót bè yóm kbong nawam là monolen. Lemwót bè yóm ktedeng yóm kkukumem, hol hlowilem o.

¹⁵⁰ Deng le hloni ebéléu ne yó kem tau gel mò sidek tô malu do, kem tau là mimón du yó kem hlauhem.

¹⁵¹ Okóm monihi se kóm, Dwata, ne hono tahu yó kem hlauhem.

¹⁵² Deng kem tngónu tehe yu ekni bè yóm tolo kngau yóm klaen dù nan e són yó kem hlauhem.

¹⁵³ Tenngelem dé nim tey hlayamu ne hol lenwaem o, abay se là kô naw e klifót kul yó kem hlauhem.

¹⁵⁴ Nfihem ou, ne nsokem ou. Hlowilem ou lómón yóm deng fasadem do.

¹⁵⁵ Yó kem tau gel mò sidek, tey mayuk bélê le yóm kehewaem kul, abay se là kô kenmón le du yó kem hloloem kum.

¹⁵⁶ Tey bong kkoduhem tau, Dwata. Hlowilem o lemwót bè yóm kukum tedeng nwitem.

¹⁵⁷ Tey dê kem hohonu hemsidek do, okóm là kô knogolu du yó kem hloloem kum.

¹⁵⁸ Tey kkutó nawahu kul yó kem tau là hemtahu béléem, abay se là kô nimón le du yó kem hlauhem.

¹⁵⁹ Tenngelem dé, Dwata, yóm tey óyóu lemolò yó kem hloloem. Hlowilem o lemwót bè yóm kbong nawam do là monolen.

¹⁶⁰ Hono tahu yó kem udélem, laen kô tul sónen yó kem hlauhem hono tedeng.

¹⁶¹ Tey kehsidek le do yó kem tau mogot benwu baluen ke laen dù buten. Okóm tek sotu gónóhu likò, duhen ke là nimónu du yó kem hlauhem.

¹⁶² Ke hningónu yóm kehligalu bè yó kem fasadem do, lómón kehligal yóm tau mton yó kem kimu mebtes tehe bnos le.

¹⁶³ Tey sidek kutó nawahu du yóm tau mò kéng, okóm tey kbong nawahu du yó kem hlauhem.

¹⁶⁴ Botong hitu duléku dmóyón kóm ket kdaw, abay se hono tedeng yóm kdê hlauhem.

¹⁶⁵ Yó kem tau bong óyô le mimón yó kem hlauhem, tey wen kenek nawa le, laen kô dù gembek hetlokob kul.

¹⁶⁶ Són nangatu yóm kehewaem do, Dwata, ne deng nimónu yó kem hlauhem.

¹⁶⁷ Tendo nimónu yó kem hloloem kum, tey bong óyóu lemolò du.

¹⁶⁸ Tendo nimónu yó kem hlauhem ne yó kem hloloem kum, yakà gotu tngónem yóm kdê nmou.

¹⁶⁹ Ó Dwata, hol hnungolem yóm ktabahu ebéléem, benlayem o khulung temnef lemwót bè udélem.

¹⁷⁰ Hol hnungolem do yóm knihu béléem, lenwaem o mlan bè yóm deng fasadem do.

¹⁷¹ Hono udél dmóyón kóm yóm angat btang bè sumóngu, yakà deng tolokem du do yó kem hloloem kum.

¹⁷² Lingónu yó kem udélem, yakà hono tedeng kdê yó kem hlauhem.

¹⁷³ Elesi htifes nam e tnóbóng o, yakà yó du deng néléku yóm kimónu yó kem hlauhem.

¹⁷⁴ Hfuhu imaku mangat yóm kehewaem do, Dwata, ne són hefligal do, són yó kem hlauhem.

¹⁷⁵ Hlowilem o anì tendo dóyónu u, ne yó kem hlauhem yóm tendo tmóbóng do.

¹⁷⁶ Denge tabag lómón ke yóm ubiha lana, géhél hnebelem ou, yóm tau tóbóng lówóhem, abay se là kô naw e klifót kul yó kem hlauhem.