Kem Lingón 118 - Udél Dwata: Gna Kesfasad ne Lomi Kesfasad

¹ Hol tekuy gel bemlay slamat bè Dwata abay se tey hyu yóm kmoen. Laen kô dù sónen yóm kbong nawahen tekuy.

² Yu kem tau Israél, hol gel mon ye dé, “Yóm kbong nawa Dwata, laen kô dù tul sónen.”

³ Yu kem tau gel demsù ebè Dwata, hol gel mon ye se kuy, “Yóm kbong nawa Dwata, laen kô dù tul sónen.”

⁴ Kdê yó kem gel tmaba ebéléen, hol mon ye se kuy, “Yóm kbong nawa Dwata, laen kô dù tul sónen.”

⁵ Bè yóm alì sidek kegnómu du, tmabahe ebè Dwata. Tahu se, bnalaen o, ne lenwaen ou.

⁶ Tendo nô béléu Dwata, laen kô dù bang knikou. Laen kô dù gmò le béléu yó kem tau.

⁷ Dwata yóm tendo tmóbóng dou. Deng eles tngónu, angate gemmò bè yó kem hohonu.

⁸ Bong hyu he yóm smalig bè Dwata senta yóm smalig bè tau.

⁹ Bong hyu he yóm smalig bè Dwata senta yóm smalig bè yó kem tau mogot benwu.

¹⁰ Tey wen kem hohonu tehe hmilol do, okóm gotu genlau lu mlan bè kfasang Dwata.

¹¹ Tódô gotu snibut le ou, okóm gotu genlau lu mlan bè kfasang Dwata.

¹² Yó kem hohonu yó, lómón tô le yê nuhag, deng le gotu lememek hilolu. Okóm lómón tô le loob mékéng ke mton ofi, là kóen legen. Gotu genlau lu mlan bè kfasang Dwata.

¹³ Tey tehe kuluk le do yó kem hohonu. Tek udì duen gónóhu tô là gemmò bélê le, okóm Dwata tmóbóng do.

¹⁴ Wen tey kfasang blayen do, ne hekgisen ou, ne deng lenwaen ou.

¹⁵ Hol hnungol ye dé yóm tey hensag le bè kamfù le yó kem tau Dwata. Hnigal le yém deng kegmò le. Yó mon le, “Tódô lemwót bè yóm tey kfasang Dwata yó gónó tekuy gemmò.

¹⁶ Mlan bè yóm tey kfasang Dwata, yó gónó tekuy gemmò bè yó kem hohon tekuy. Tey kfasangen yóm Dwata bè gida.”

¹⁷ Là kô na le e ghatay do yó kem hohonu, tódô sana klowilu, ne angat tulónu yóm deng nmò Dwata béléu.

¹⁸ Tey deng ktafaken dou Dwata, okóm là kô lensónen du klowilu.

¹⁹ Hennas ye dou dé yó kem bak tikeb yóm Gónô Dwata, yóm bak tikeb gónó le gel mlan yó kem tau tedeng kmò le. Angate husek elemen naw e slamat bè Dwata.

²⁰ Ni se yóm bak tikeb yóm Gónô Dwata. Són olo husek elemen, són yó kem tau mimón ke Dwata.

²¹ Tey kdóyónu kóm, Dwata, abay se deng hnungolem ou, ne deng hegmoem ou bè kem hohonu.

²² Yóm botu tehe senkbê yó kem tau hdà gónô, ofo kul ke botu laen dù muhen, anì monem, hol botu bong muhen bè kdéen mò hembegel yóm gónô hdà le.

²³ Yó se yóm deng nmò Dwata, ne tey hentaw tekuy yóm kmoen du.

²⁴ Deng ni se yóm kdaw kegmò Dwata bè kem hohon me. Hol tekuy hligal bè yóm deng nmoen.

²⁵ Hol lenwaem mi, Dwata, hol lenwaem mi lem tdok yó kem hohon me. Hol tnóbóngem mi anì wen gendeng me.

²⁶ Dwata he hol kmudung du yóm tau sut bè ni mit yóm kun boluy Dwata. Lemwót lem nim kun Gónô Dwata, mni me béléem tóbóng bè Dwata.

²⁷ Dwata se yóm gónó tekuy mogot. Tey hyu yóm deng nmoen bélê tekuy. Nbut tekuy yóm kehligal nmò kuy béléen. Mógów ye lemibut yóm gónó ye gel demsù ebè Dwata, kmulóng ye kem ngà hanga koyu.

²⁸ Uu se yóm dou Dwata, tey keslamatu béléem. Tendo heglalagu yóm tey kegetahem.

²⁹ Hol tekuy bemlay slamat bè Dwata, yóm gónó tekuy mogot, abay se tey kehyu yóm kmoen. Laen kô dù sónen yóm kbong nawan tekuy.