Kem Lingón 116 - Udél Dwata: Gna Kesfasad ne Lomi Kesfasad

¹ Tey bong nawaw ke Dwata abay se gel hnungolen o. Sal gel hnungolen ke wen hnihu béléen.

² Lemwót bè yóm gel khungolen dou yó yó gónóm mon, yóm igou tolo mowil tendohe tmaba ebéléen.

³ Deng tódô lenibuten ou ne yóm hatay. Tey sidek klikou du yóm deng klonihen béléu. Là gbeku hmingón du yóm alì klikou ne ktafa nawahu.

⁴ Ominu yó tmaba ebè Dwata, yó monu, “Ó Dwata, hkoduhe béléem, hol lenwaem ou.”

⁵ Tey kmodu yóm gónó tekuy mogot, ne tey kehyuhen. Tey kkoduhen tau yóm Dwata tekuy

⁶ yóm Dwata tendo kenlungen yóm tau laen dù gmoen. Bè yóm tehe deng klonihen béléu hatay, lenwaen o.

⁷ Yó gónón hol mgel nawahu, abay se tey hyu yóm nmò Dwata béléu.

⁸ Deng lenwà Dwata o bè yóm hatay. Kóhen yóm gónóhu gel mkik, ne hensengen ke wen gónóu btang.

⁹ Duhen ni, tolohe mowil, slomonge ke Dwata bè nim benwu gónó le nô kem tau tolo mowil.

¹⁰ Bè yóm tehe tô kwen gfau, tódô henlelu hemtahu bè Dwata balù yóm klaen dù bud lanu gewà,

¹¹ ne balù yóm tey sidek klikou, botong gmonu laen kô dù tau snaligu.

¹² Tedu tô blayu ke Dwata du mò balau yóm tey hyu nmoen béléu?

¹³ Angat wen yóm hyu gel ninum nwitu mò blayu du mò gónóhu slamat béléen bè yóm kehewaen do.

¹⁴ Yó he keblayu du nim fasadu ni ke sok bud kól yóm gel kestifun yó kem kun tau.

¹⁵ Tey le mebtes bè Dwata yó kem tau kenbong nawahen. Tey sidek kegnómen du ke sotu bélê le matay.

¹⁶ Ou se tóbóng lówóhem, Dwata. Nimónu uu hol lómón yóm tehe kimón yê kóm. Deng lenwaem ou lem hatay.

¹⁷ Angat wen dsuu ebéléem mò gónóhu slamat béléem, hmungu du yóm tey kdóyónu kóm.

^18-19 Bè yóm gel kestifun yó kem tauhem bè yóm kóm Gónô bè Jirusalim, bè yó gónóhu bemlay du kóm nim deng fasadu kóm ni. Hol dóyón tekuy Dwata.