Kem Lingón 115 - Udél Dwata: Gna Kesfasad ne Lomi Kesfasad

¹ Olon uu, Dwata, olon uu yóm knóón hol sendóyón, là yóm kum. Yó gónó me hol dmóyón kóm lemwót bè yóm klaen dù sónen yóm là konolen yóm kbong nawahem kum, ne yóm ktenebem bélê me.

² Moen de ke gel snólók le mi yó kem tau bè dumu benwu hmilol, gel mon le, “Gónón nô se kuy Dwata du?”

³ Yó balà me kul, nô bè longit yóm kum Dwata, gbeken mò du kihu nóyô nmoen.

⁴ Okóm yó kem kul dwata yó kem tau smólók yó, hono dwata lenbù nmò le lemwót bè tahu blówón ne bè blówón bukay nmò tdok tau.

⁵ Igoen wen sumóng le, là mudél le. Wen mata le, là kô le mton.

⁶ Igoen wen klingu le, là kô le mungol. Wen ilung le, là kô le gmungef.

⁷ Igoen se wen tdok le, là kô le gmogot. Wen ti le, là kô le gógów. Là kô gbek le du mudél.

⁸ Yó kem tau gel mò dwata lennged yó, ne smalig bélê le, mkél le bè yó kem dwata lenbù nmò le.

⁹ Yu kem tau Israél, hol ye smalig bè Dwata. Gbeken tmóbóng kuy, ne gbeken mofin kuy.

¹⁰ Yu kem gel demsù ebè Dwata sfu Aron, hol ye smalig bè Dwata se kuy. Gbeken tmóbóng kuy, ne gbeken mofin kuy.

¹¹ Yu kem tau wen klikò le ke Dwata, hol snalig ye Dwata. Gbeken tmóbóng kuy, ne gbeken mofin kuy.

¹² Là kô klifóten tekuy, ne angat tnóbóngen tekuy. Angat tnóbóngen yó kem tau Israél, ne yó kem sfu Aron, duhen yó kem tau gel demsù ebè Dwata.

¹³ Angat gotu tnóbóngen kdéen tau wen klikò le du, lenwóten bè yó kem tau hol geta kkólen bè yó kem tau glaan.

¹⁴ Dwata he hol hból lówó ye. Dalang se yó kem semfu gu bélê ye,

¹⁵ Dwata he hol tmóbóng kuy. Yóm Dwata tehe mò longit ne tonok.

¹⁶ Yóm longit, ke Dwata funen, okóm yóm tonok, fen blayen bè tau.

¹⁷ Là gbek le dmóyón ke Dwata kul yó kem tau deng matay, yó kem tau deng kól bè benwu yó kem tau deng matay.

¹⁸ Okóm tekuy kem tau tolo mowil, hol dóyón tekuy Dwata. Ne bê tekuy lensón yóm kdóyón tekuy du. Hol dóyón tekuy Dwata.