Kem Lingón 113 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Tahu se, kem tau tóbóng lówó Dwata, hol dóyón tekuy. Hol dóyón tekuy yóm boluy Dwata.

² Laen kô dù tul sónen yóm hol kegdóyón tekuy du.

³ Yóm klamangen benwu lenwóten fi dmata kdaw kól desdef, hol dóyón tekuy yóm boluy Dwata.

⁴ Yakà Dwata se hol geta senta yóm kdéen benwu, yóm tey keklóónen hol mkay senta kegeta yó kem longit.

⁵ Tmau du se mkél bè yóm sana kut Dwata hol gónó mogot, yóm Dwata myón bè yóm gónón myón kmamal ditu hol fi tta?

⁶ Ditu filaanen tey mayuk béléen yó kem longit ne tonok. Kudung temngel elaan,

⁷ ne nkayen gu lem kfung yó kem tau élél, ne nwahen gu desenfól yó kem tau laen dù gónó le ma.

⁸ Hmungen lu myón bè yó kem ngà tau hol geta, balù yó kem ngà tau hol geta bè yó kem kun tau.

⁹ Hefligalen yóm libun atil mlan bè kehngaen du. Hol dóyón tekuy Dwata.