Kem Lingón 112 - Udél Dwata: Gna Kesfasad ne Lomi Kesfasad

¹ Hol dóyón tekuy Dwata. Hligal kun yóm tau wen klikoen ke Dwata, tendo hyu kegnómen du bè kimónen yó kem hlau Dwata.

² Yó kem ngaen, angat le tey mbegel lem benwu. Ne yó kem semfu gu béléen, angat tey któbóng Dwata kul.

³ Wen tey kendengen le ne laen kô dù kmifót du yó kem hyu gel nmò le.

⁴ Anien ke nô lem gónón kmifu yóm tau hyu kmoen, sal gel hlayag Dwata lanen. Hulung le bemlay ne hulung le kmodu, ne tedeng kmò le.

⁵ Hyu kun yóm tau mahil bemlay, yóm tau mahil hutóng ne là lenugihen yó kem dumuhen bè udél swa.

⁶ Yóm tau lómón yó kmoen, là kóen gemmò béléen yó kem sidek. Yóm tau tedeng kmoen tendo gel hentulón nawa kem dumuhen tau.

⁷ Là kô le likò anien ke sidek tulón sut bélê le, abay se tey mbegel ksalig le du yóm kehtahu le ke Dwata, mò semgyok kul.

⁸ Là kô dê tnafa nawa le yó kem tau yó, laen dù knikò le. Tódô tngón le laen kô gmò le bélê le yó kem hmohon kul.

⁹ Là sgafas nawa le bemlay yó kem tau élél. Yóm kehyu nmò le laen kô dù tau kmifót du. Tey mbegel ktau le, ne tey kadat le du kem dumuhen.

¹⁰ Yóm kul kmò yó, gel ton yó kem tau gel mò sidek, deng le mom semdken beeng botong kebut le du. Okóm yó kem tau sidek nmò le yó, tódô le kendel lana lem benwu, là balingen yó kem tô atul le.