Kem Lingón 110 - Udél Dwata: Gna Kesfasad ne Lomi Kesfasad

Lingón Dabid

¹ Yó udél Dwata bè yóm gónóhu mogot, monen, “Myóni bè ni bè kwananu efet gotu heglaanu lu bè soluhem yó kem hohonem, lómón ke nmou lu mò gónóm hmótól tihem.”

² Lemwót bè Sayun, angat hlamang Dwata yóm benwu nogotem. Angat uu mogot kul yó kem hohonem.

³ Bè yóm kdaw angat kwitem sgida, wen tey óyô le tmóbóng kóm yó kem tauhem. Yó kem ngà logi sendaluem alì mólós nes le, angat le sut béléem ket hlafus, hol lómón kmò le, lómón ke amù gel sut hlafus.

⁴ Deng wen safà Dwata, ne là kô nan e bud hulék du lem baken, monen, “Uu se mò blóng tau ebéléu kól bè laen kô dù tul sónen lómón yóm tehe keseblóng Mélkisédék tau ebéléu.”

⁵ Mdà bè kwananem Dwata mò mofin kóm. Bè yóm kdaw angat kebuten, tey dê kem tau hol geta hnatayen.

⁶ Gotu tnafaken yó kem tau bè yó kem benwu, ne tey dê tau hnatayen. Gotu genlaen yó kem malak bè klamangen benwu.

⁷ Okóm kun, angat minum bè yó kem él lemnek mlel hilol lan anì mulék ebéléen kgisen. Angat gemmò.