Kem Lingón 11 - Udél Dwata: Gna Kesfasad ne Lomi Kesfasad

Lingón Dabid

¹ Són Dwata yóm dou snalig mò gel mofin dou. Moen se ke mon ye mò dou, “Mlóyi etu lem bulul anì laen dù hemenem.”

² Ngem yó kem tau mò sidek, deng eles bentul le boho le. Nô le bè gónón glilung, hnilung gentì le yó kem tau tedeng kmò le.

³ Ke deng gbà yóm udin lem benwu mò hembegel du, tedu se gmò yóm tau tedeng kmoen?

⁴ Okóm yóm Dwata, nô bè yóm kun Gónô hol mólós. Ditu bè longit gónón myón kmamal. Ditu gónón lemwót temngel yóm kdéen tau, tey keheklol ketngelen kul.

⁵ Henklol tenngel Dwata yó kem tau tedeng kmò le dalang se yó kem tau sidek nmò le. Tey kutó nawahen kul yó kem tau alì móyô hemsidek tau.

⁶ Bè yó kem tau gel mò sidek yó, hkulón Dwata eta le yóm bala ofi kemyóngón nbol kbuda, ne bud wen tey lenos kinì hwiten ebélê le mò tmafak kul.

⁷ Yakà tey tedeng kmoen yóm Dwata, ne hol nóyóen yó kem nmò tedeng. Yó kem tau mò du yóm tedeng, angat ton le lem uyó Dwata.