Kem Lingón 109 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, yóm dou tendo dóyón, hol béi tódô neb, hol béi là hekmón do

² igò le mudél sidek etahu yó kem tau mò sidek, ne hono kéng yóm tulón le gbak béléu.

³ Tódô libut le do yó kem udél le kmutó nawa do, senfatay le o igoen laen dù buten.

⁴ Tey kbong nawahu kul, okóm kul, mom hohon le ou igou sem gel mni kul bè Dwata.

⁵ Yóm hyu nmou bélê le, mom bnalà le sidek, yóm kbong nawahu kul, mom bnalà le utó nawa.

⁶ Méléki sotu tau gel mò sidek mò hohonen. Mebeli sotu tau mò tmifù du bè kukum.

⁷ Ke deng knukum le, hol hensalaen. Yóm gel knihen mò duónem du.

⁸ Hol hukolem yó kem dù kdawen, hol blayem ebè dumu tau he yóm glalen.

⁹ Hol géhél matay anì laen dù bud mà le yó kem ngaen, ne bolu yehenen.

¹⁰ Hol le baling mni ken bè dumu tau he yó kem ngaen, ne hol lo kem tau lu he gu bè yó kem gónô gbà gónó le nô.

¹¹ Yó kem tau gónón gel mutóng yóm tau hmohon do yó, hol nwa le yóm kdê nfunen, ne hol bud nwa yó he kem tau milo yóm kdê deng gnayamen.

¹² Hol laen dù tau kmodu du he, ne laen dù kmodu yó kem ngaen.

¹³ Hol le gotu matay he yó kem sfuhen anì laen dù bud tau hemtulón nawa kul.

¹⁴ Hol là kô klifót Dwata du he yó kem salà yó kem tehe fuen, ne hol là lanahen bè lista he yó kem salà yéen.

¹⁵ Hol tendo nô bè solu Dwata he ni kem salà le ni, okóm hol lana talak tonok boluyen.

¹⁶ Abay se balù udì ke hendemen mò du yóm hyu, deng mom hnatayen yó kem tau élél laen dù kwa le, dalang se yó kem tau deng wen gónón lebà nawa le.

¹⁷ Tendo móyô hemmulà, hol hulékem etahen he yóm hmulaen yó. Là móyóen muyag kem dumun, hol béem abay nuyag se kóm.

¹⁸ Yóm tendo kehmulaen, tódô sana kun kmò lómón yóm keseken nesen, ne lómón yóm él gel ninumen, duhen ke lómón yóm ken hyu gel kenen.

¹⁹ Hol hulékem etahen he yó kem hmulaen yó, lómón kedketen bè lówóhen, lómón yóm nes gel leseken, ne lómón yóm hilet gel féten bè owóken.

²⁰ Hol lómón ni he kmò ktafak Dwata kul yó kem tau gel tmifù dou yó, yó kem tau gel mebel lan le tô hmatay do.

²¹ Okóm, Dwata yóm Dwata hol dandónen geta, hol tnóbóngem ou anì megdóyón yóm kóm boluy. Lemwót bè yóm alì kehyuhen yóm kbong nawahem do, hol lenwaem ou.

²² Yakà teye élél, ne laen dù gónóhu htóbóng, ne tey sidek kebà nawahu.

²³ Deng sónmou minut lana lómón yóm olung ke deng kimel. Tódóe hlós btang lómón yóm tlangas deng dngél le.

²⁴ Là buden kemgis lem bukolu lemwót bè kfastingu. Deng sidek klehenu, hono kulit ne hono tiol duen.

²⁵ Denge baling tau mò sendekà yó kem tau mton do, tódô le hising ke ton le ou.

²⁶ Tnóbóngem ou, Dwata yóm sana do Dwata hol gónó mogot, lenwaem ou mlan bè yóm kbong nawahem do là monolen.

²⁷ Htonem yó kem hohonu deng uu se yóm lemwà do, són uu se, Dwata, yóm deng mò du.

²⁸ Ke deng lenwaem ou, kihu se ke henmulà le ou, okóm fen tnóbóngem ou kóm. Ke nundug le ou, mulék le myak. Okóm dou, yóm tóbóng lówóhem, fene hlós hligal.

²⁹ Hol hegfanem bè kdéen tau yóm sidek kyak yó kem hohonu, hol hegfanem lómón yóm nes eles nô bè lówó le.

³⁰ Okóm dou, tendo sensulit dóyónu Dwata, dóyónu lem blóng yóm kdéen tau.

³¹ Yakà du gel mfi du yóm tau laen dù gónóhen htóbóng mò lemwà du lem hólól yó kem tau tô hmatay du.