Kem Lingón 108 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, són uu snaligu. Hotuhu nawahu lemingón yóm lingón dmóyón kóm. Géhéli btik, lóyóf.

² Géhéli btik, yu kem gel kenbitu. Lemingóne efet minal mwas.

³ Dóyónu u, Dwata, bè solu yóm kdéen tau. Leningónu lem blóng yó kem dumu benwu yó kem lingón dmóyón kóm.

⁴ Yakà mkayen senta kegeta yó kem longit yóm kbong nawahem tau là monolen. Yóm ktenebem bè tau, botong gefet bè yó kem lobun.

⁵ Holi hegeta, Dwata, senta kegeta yó kem longit hol geta. Hegfanem bè klamangen tonok yóm tey keslinangem.

⁶ Mlan bè alì kekgis yóm sigel kwananem, hol lenwaem ou, hol lenwaem yó kem tau kenbong nawahem.

⁷ Ni se deng fasad Dwata mlan bè yóm klaen dù belenen, monen, “Nólólu yóm benwu Sékém mò ilô yóm kegmou. Dalang se yóm Datal Sukut, bentesu mò dou.

⁸ Yóm benwu Gilyad, dou funen, dalang se yóm benwu Manasi, bud dou funen. Lemwót bè benwu Ifraim yó kem tau mò sendaluu, ne lemwót bè benwu Juda yó kem tau mò dou tau hol geta.

⁹ Lemwót bè benwu Muab yó kem tau mò tóbóng lówóhu, ne lemwót bè benwu Idom yó kem tau mò heseku. Ne ditu bè benwu yó kem tau Flistin gónów mensag bè yóm kegmou bélê le.”

¹⁰ Tau du de mit do elem yóm syudad alì mbegel yó? Tau du se tukô gna do etu bè Idom?

¹¹ Tek són uu, Dwata, okóm deng kenbéem mi, ne là budi mung bè yó kem sendalù me.

¹² Ó Dwata, hol tnóbóngem mi bè yó kem hohon me, abay se laen kô dù muhen yóm tóbóng tau.

¹³ Mlan bè tóbóng Dwata gónó me angat gemmò, abay se gbeken mdà kul elaan yó kem hohon me.