Kem Lingón 107 - Udél Dwata: Gna Kesfasad ne Lomi Kesfasad

BOK 5 Kem Lingón 107—150

¹ “Hol ye gel slamat ebè Dwata abay se tey hyu kmoen ebélê tekuy. Laen kô dù sónen yóm kbong nawahen tekuy.”

² Hol gel sensulit ye yóm keslamat ye bè Dwata yó, yu yem kdéen deng lenwaen. Abay se deng lenwaen yu lem tdok yó kem hohon ye,

³ ne deng niten yu hewà gu bè yó kem tólóng benwu mayuk, bè yó kem benwu fi dmata kdaw ne fi gu desdef, ne fi gu debwak ne fi gu leged.

⁴ Wen se bélê le tehe tabag lem yóm benwu laen hol wen tauhen, yóm benwu laen dù lan gu lemen. Là bud ton le du lan le ebè yóm benwu gónô le e tô menwu.

⁵ Tey sidek kbitil le, tey sidek kleeng le efet laen dù bud gónón e mefet nawa le.

⁶ Mom yó he ktaba le ebè Dwata deng wen gfà le, ne lenwaen lu lem yóm tey gónó le glayam.

⁷ Nalaken lu ebè yóm lan tedeng bè yóm benwu knóón mò gónó le menwu.

⁸ Là gbek le du ke là dóyón le ke Dwata bè yóm là konolen yóm kbong nawahen kul, ne bè yóm tey kehyu yóm deng nmoen bélê le.

⁹ Hegsengelen nawa yó kem meeng, ne hegtuhen yó kem bitil bè yó kem hyu deng blayen kul.

¹⁰ Wen se bè yó kem tehe tau yó ekni, geblanggù, nô le lem yóm tey gónón kmifu. Kendina le lu lem blanggù, ya tey keglayam le.

¹¹ Yó gónón wen gfà le abay se deng nulé le yó kem hlau Dwata yóm Dwata laen dù là gbeken du. Ne deng kenbê le yó kem hloloen kul.

¹² Ya tey keglayam le mò nmò efet laen dù bud kgis le. Tódô le kem masà bè gónó le mò nmò, ne laen dù tau tmóbóng kul.

¹³ Mom yó he ktaba le ebè Dwata deng wen gfà le. Ne lenwaen lu lem yóm tey gónó le glayam.

¹⁴ Hewaen lu bè yóm tey gónón kmifu gónó le nô. Gotu hentohen yóm kdina fét le kul.

¹⁵ Là kô gbek le du ke là dóyón le ke Dwata bè yóm là konolen yóm kbong nawahen kul, ne bè yóm tey kehyu yóm deng nmoen bélê le.

¹⁶ Gotu genbaen bélê le yó kem tey bak tikeb blanggù hen-get bala tók ne gotu tenfoken yó kem bala tók bè yóm blanggù yó.

¹⁷ Wen se bè yó kem tehe tau yó ekni, nungel. Wen des le lemwót bè yó kem salà le, ne lemwót bè yó kem sidek gel nmò le gónó le alì glayam.

¹⁸ Balù udì ke móyô iwól le mken, udì duen gónó le là matay.

¹⁹ Mom yó he ktaba le ebè Dwata deng wen gfà le. Ne lenwaen lu lem yóm tey gónó le glayam.

²⁰ Gotu kóhen yó kem des le lemwót bè tek olo udélen, yó gónó le là hlós matay. Ne lenwaen lu bè yóm tô hatay le.

²¹ Yake hol dóyón le Dwata bè yóm là konolen yóm kbong nawahen kul, ne bè yóm tey kehyu yóm deng nmoen bélê le.

²² Yake hol le demsù ebéléen mò gónó le slamat béléen, ne hlan le bè yóm kehligal le semngal. Yake hol tulón le du yóm deng nmoen bélê le.

²³ Wen se bè yó kem tehe tau yó ekni, mò le nmò bè kafal, yó se kul gónó mebel klowil.

²⁴ Deng ton le se kul yóm tey kegbek Dwata, ne yóm tey tennga nmoen bè yóm knô le talak mohin.

²⁵ Olon lemwót bè udél Dwata, tódô mbel yóm tey lenos bong, ngangen ne tey lewók te mohin.

²⁶ Tódô megtungkà etta yóm kafal, ne bud mung etlaan bè yóm kógów lewók. Ya tey sidek klikò le yó kem tau mit kafal, botong lana bélê le kfól nawa le.

²⁷ Gotu le glénggé, lómón yó kem tau lengel. Laen kô dù bud gmò le balù yòm tey khulung le mit kafal.

²⁸ Mom yó he ktaba le ebè Dwata deng wen gfà le. Ne lenwaen lu lem yóm tey gónó le glayam.

²⁹ Tódô tenflok Dwata yóm tey lenos bong, ne tódô menek yóm tey lewók.

³⁰ Tey kehyu nawa le lemwót bè yóm deng kenek mohin. Omin Dwata mit kul ebè kilil ebè yóm gónó le e dmuung.

³¹ Yake hol dóyón le Dwata bè yóm là konolen yóm kbong nawahen kul, ne bè yóm tey kehyu yòm deng nmoen bélê le.

³² Yake hol tulón le lem blóng yó kem tau gel stifun yóm tey kegeta Dwata, ne hol dóyón le lem blóng yó kem tau gónó le galak bè yóm gel kestifun le.

³³ Yóm Dwata, deng tódô hektihen yóm él mlel, ne deng hektihen yó kem tbul él.

³⁴ Ne yóm tonok hyu mò hulu tahen, deng henbalingen tonok laen dù bud hulu tmowok du. Yó gónón mò du yóm yó, lemwót bè yóm sidek nmò yó kem tau nô tahen.

³⁵ Okóm yóm tonok balù udì ke wen élen, deng wen busung él nmò Dwata bè yó. Ne yóm tonok alì mékéng laen dù élen, deng tódô wen él hetbulen bè yó.

³⁶ Ne wen yó kem tau bitil suen bè yó anì menwu le bè yó, ne hlós hdà le yóm benwu le bè yó.

³⁷ Gotu le mò hulu bè yó kem tonok le, hulu le yó kem grép ne tey bong guta le du.

³⁸ Tey któbóng Dwata yó kem kun tau, ne tey kehbólen kul. Balù yó kem ógóf le, laen kô mtón bélê le.

³⁹ Bè yóm tehe kdaw laen dù gmò le bè yó kem hohon le yó kem tau Dwata, tey kehyak le kul, ne tey kdà le kul elaan, ya tey sidek keglayam le.

⁴⁰ Yó nmò Dwata, bud tles nmoen bè yó kem hmohon kul yóm tehe nmò le bè yó kem kun tau. Gotu htabagen lu bè yó kem benwu là hyu menwu du, bè yó kem benwu laen dù lan gu lemen.

⁴¹ Okóm fen lenwaen yó kem tau élél bè yóm tey gónó le glayam, ne tey kehbólen kul lómón kból yó kem ógóf.

⁴² Ni kem nmò Dwata ni, gotu ton yó kem tau tedeng kmò le, ya tey kligal le. Okóm yó kem tau sidek nmò le, là kô le gudél kul.

⁴³ Yó kem tau hulung hedem, hol hendem ye ni kem deng tulónu kuy ni koni. Hol hendem ye yóm là konolen yóm kbong nawa Dwata kuy.