Kem Lingón 104 - Udél Dwata: Gna Kesfasad ne Lomi Kesfasad

Lingón dmóyón ke Dwata bè yóm kedlimunen yóm kdéen

¹ Hotuhu nawahu dmóyón ke Dwata. Ó Dwata, uu se yóm gónóhu mogot, tey kegetahem. Yó henged nes knóón lesekem, duhen yóm kegetahem ne yóm tey klinggelem.

² Hol lómón ke tendo legmotem yóm tey layagem. Ne yó kem longit seglafin, lómón ke ketefem yóm klamangen tonok.

³ Ne deng hdaem gónóem ta yóm él tofi ta longit. Yó muhem yóm lobun mò klitun gónóm myón, ne lenos fen demyol du.

⁴ Lenos se mò fen gel hógówem, ne yóm silà, yó se mò tóbóng lówóhem.

⁵ Tey kehbegelem du yóm benwu deng nmoem, anì là kóen na a sliwo.

⁶ Tehe suem tahen yóm mohin bong, lómón ke mnal igam bè klamangen yóm kmoem du, ne yó kem tey bulul, gotu glimun él.

⁷ Bè yóm tehe kestólóngem yó kem él, lómón ke lemték yóm udélem mdók kul. Ne tahu se, lómón mkal silà yóm kendel kimón le kóm.

⁸ Gotu le mlel elem bulul ne elem yó kem sbong, ebè yóm deng nmoem mò gónóm hemsù kul.

⁹ Deng eles hendengenem mò són le, là kô gulé le du, anì là bud glimun le du yóm klamang benwu.

¹⁰ Deng nmoem yó kem él tembul gu lem likub bulul, ne yó kem él, mlel le gu lem sbongen.

¹¹ Bè yó se gónó le minum yó kem ógóf lem bnes. Ne yó kem kudà tabag, lembó yóm kleeng le lan le minum bè yó.

¹² Lemwót yó kem onuk koyu, gotu le smala ta yó kem koyu tmubé él, lel yóm tey udél le.

¹³ Gel hkulónem gu bè longit eta yó kem bulul, yó se mò lanem tmóbóng yóm tonok.

¹⁴ Gel htowokem yó kem bnes mò nótób yó kem ógóf. Ne wen hulu blayem yó kem tau mò gel htowok le mò gónó le mowil.

¹⁵ Wen se mò gónó le ma tifas grép mò ninum le mò hefligal kul. Ne wen se gónó le ma hnolo ulib mò lunol le bè lówó le. Ne wen se mò gónó le ma ken mò hekgis kul.

¹⁶ Yó kem koyu sidar bè Libanun, tendo wen kulón eta le. Yó se hol kun koyu Dwata, yóm koyu hol kun hulu.

¹⁷ Tey dê onuk koyu smala bè yó kem koyu yó, balù yó kem onuk lembang sana kul ksala bè yó.

¹⁸ Yó kem kambing lem bnes, gotu le nô ta yó kem bulul geta. Ne yó kem ungé botu, gotu le hebnos lem sol botu.

¹⁹ Deng nmoem yóm bulón mò gónó me temngón du yóm sbulón. Ne deng nmoem se yóm kdaw, tódô tngónen gel kesdefen.

²⁰ Deng nmoem yóm kifu, ne kdê yó kem ógóf lem bnes, gotu le hewà se kul ke deng kifu.

²¹ Lemwót yó kem liyun lomi lemnok, gotu le mngel sok le mebel kenfô le. Hnebel le yóm ken deng tgama Dwata kul.

²² Sok btù mata kdaw, gotu le bud mulék na a hlilil bè yóm gónó le gel nô.

²³ Okóm kul yó kem tau, na le e btik mò nmò efet kifu.

²⁴ Ó Dwata, tey deng dê nmoem, ne teyi hulung mò kul yóm kdéen. Tódô tfeng klamangen benwu yó kem ógóf deng dlimunem.

²⁵ Senged se yóm tey mohin lamang, là kô gsóhem kul yó kem nô lemen, lenwóten bè lebangen kkólen bè leneken.

²⁶ Yó kem kafal lembang, gotu le mlan tahen. Ne là mdengen lemen yóm blol bong tehe nmoem boluyen Libyatan.

²⁷ Tódô kdê yó kem deng dlimunem, Dwata, són uu genléd nawa le mò hlowil kul.

²⁸ Tahu se, wen gel blayem kul mò ken le, ne tódô gotu gsengel se nawa le du.

²⁹ Ke knogolem lu, tey sidek klikò le. Ke bud nwahem yóm nawa deng blayem kul, matay le. Gotu le bud mulék ebè kfung bè yóm tehe gónó le gu lemwót.

³⁰ Okóm lemwót bè yóm nawa blayem kul, yó gónó le mowil bè yóm tehe kedlimunem kul. Tódô senflósen tendo wen bud lomi hlowilem te tonok.

³¹ Laen kô dù nan e són yóm kun kegeta Dwata. Hyu ke hol hligal du yóm kdê deng nmoen.

³² Balù tek olon hménég du he yóm tonok, tódô megsinsig. Ke nduen yóm bulul, tódô semfut kebelen.

³³ Klawihu mowil, sónmou lemingón ebè Dwata. Sónmou lemingón yóm lingón dmóyón du efet kukol towoku.

³⁴ Yake hol hyu nawa Dwata du yóm klingónu ebéléen, yakà lemwóten béléen yóm kligalu.

³⁵ Yake gotu genlà Dwata lu yó kem tau gel mò salà lem benwu. Yake béen wen bud tebel bélê le. Hol hotuhu nawahu dmóyón ke Dwata. Hol dóyón tekuy dé Dwata.