Kem Lingón 103 - Udél Dwata: Gna Kesfasad ne Lomi Kesfasad

Lingón Dabid bè yóm kbong nawa Dwata tau

¹ Tey kdóyónu ke Dwata dou. Tódô hotuhu nawahu dmóyón du abay se laen kô dù belenen yóm kun boluy.

² Tey kdóyónu ke Dwata. Là kô naw e klifót du yóm tey kehyu nmoen.

³ Gotu hnifóten kdê salau, ne gotu kóhen kdê desu.

⁴ Tendo gel hensengen yó kem gel tô hatayu. Gel tnóbóngen ou mlan bè yóm kbong nawahen do ne yóm kkoduhen do.

⁵ Tey kehegsengelen nawahu lemwót bè yó kem hyu gel blayen do. Bud huléken kgisu, hol lómón ke bude mulék lomi tau. Yóm kgisu yó, hol lómón kgis banug.

⁶ Yóm Dwata, sal gel hlanen yóm kukum tedeng bè yó kem tau gel hen-gnok.

⁷ Deng eles gel hetngónen ke Musis ekni yó kem atulen, ne gotu htonen yóm tey nmoen lem blóng yó kem tau Israél.

⁸ Tey kmodu yóm Dwata, ne tey bong nawahen tau. Là kóen mahil lembut, ne là monolen yóm kbong nawahen tekuy.

⁹ Ke deng hnifóten yóm salà, là kô bud bentiken du, tódô mkó bè nawahen.

¹⁰ Là kô yó du tafak Dwata tekuy yóm tafak hol bang bayad yó kem salà tekuy. Ne là kô balaen du tekuy yóm bang hol balà yó kem sidek gel nmò tekuy.

¹¹ Yóm kbong nawa Dwata yó kem tau wen klikò le du, mkay senta kbong yóm te kmawang.

¹² Lómón klayuken dmata kdaw kól e desdef, yóm gónó Dwata e mbot yó kem salà tekuy.

¹³ Lómón yóm kbong nawahen kem ngaen yóm mà le, lómón yó se kbong nawa Dwata yó kem tau wen klikò le du.

¹⁴ Tódô tngón Dwata yóm tehe kifilen tekuy, olo kuy lemwót bè kfung.

¹⁵ Yóm klowil tekuy te tonok, mkél bè yó kem bnes. Ne lómón yó kem bulók lem bnes tek likot le mowil sana le matay.

¹⁶ Ke nyuf lenos, tódô tekuy kmanas, lómón ke là tekuy tehe nô dini.

¹⁷ Okóm bè yó kem tau wen klikò le ke Dwata, laen kô dù sónen yóm kbong nawa Dwata kul. Balù hilu bud lugod le, yó ne yóm kehyu nawan ebélê le

¹⁸ syan ke là mkóhen bè nawa le yóm tehe senfasad le Dwata, ne ke hol le teneb mimón du yó kem kun hlau.

¹⁹ Bè longit gónó Dwata myón kmamal yóm klamangen, du se hol dandónen geta bè kdéen.

²⁰ Hol dóyón ye Dwata, yu kem alì kemgis ne alì gembek gel hógówen gu bè longit. Yu se yó kem tendo gel mimón du ke wen dóken, ne tendo gel hmungol du ke wen monen.

²¹ Hol dóyón ye Dwata se kuy, yu kem mfasang nô bè longit. Yu se yó kem tóbóng lówóhen tendo gel mò du yóm kun kóyô.

²² Hol dóyón ye Dwata, yu kem deng dlimunen, balù kihu gónó ye nô bè klamangen yóm knamalen. Ne hol dóyónu Dwata se dou.