Kem Lingón 102 - Udél Dwata: Gna Kesfasad ne Lomi Kesfasad

Kehkodu bè Dwata yóm tau alì blat nô tahen

¹ Ó Dwata, hnungolem dou yóm hnihu, hnungolem dou yóm knihu tóbóng béléem.

² Béem abay henbnos ou bè yóm kdawu glayam. Hgongi dou edini, géhél bnalaem ou ke tmabahe.

³ Yakà móyónen kmanas lómón kebel yóm dou klowil, ne yóm lem lówóhu là buden mgel.

⁴ Hol lómó kegnómu du, lómón yóm bnes deng menes, là kóen bud mnóm nawahu mken.

⁵ Lemwót bè yóm alì gel kdolongu, són dù nô béléu kulit ne tiol.

⁶ Mkéle bè kang bè yóm benwu laen hol wen tauhen, duhen ke bè yóm kang tek sótuhen nô bè yóm benwu laen hol wen tauhen.

⁷ Là kóe gtungô, mkéle bè yóm onuk koyu tek sotuhen nô ta ketef.

⁸ Yó kem hohonu, snilef le kdaw tendo hemnê dou. Tendo utóm le boluyu bè yóm kehmulà le.

⁹ Yakà són du kohù kenu. Yóm lewoku, tódô gel mlel lem ninumu

¹⁰ lemwót bè alì ksidek kebutem dou. Yakà deng nulutem dou, ominem bud mbot do.

¹¹ Yóm klowilu, hol lómón ke yóm olung móyón kifu mahil lana, mkéle bè yóm bnes deng menes.

¹² Okóm uu se, Dwata, laen kô dù tul sónen yóm kkamalem. Yóm tey któtólem, tódô senflósen efet kól bè yóm ket angat lugod le.

¹³ Angati mdà nam e knodu Jirusalim, ne ni se yóm kdaw bang kmodu du, ni se yóm kdaw deng fasadem nam e któbóng du.

¹⁴ Yakà tey hen-gulam le yó kem botu bengen yó kem tau tóbóng lówóhem, balù yó kem kfung bè lan, tey kkamà le du.

¹⁵ Yó kem benwu talak tonok, angat setbol kkel le bè solu Dwata. Yó kem tau hol geta talak tonok, angat setbol kkel le bè yóm tey kegetahen.

¹⁶ Yakà bud hdà Dwata du Jirusalim, hegfanen yóm tey kegetahen.

¹⁷ Angat bnalaen yóm hni yó kem tau laen dù gónó le ma. Là kô nan e kenbê du yó kem hni le.

¹⁸ Hol snulat ye nim ni anì tngón yó kem angat bud lugod ye, anì angat dóyón le Dwata yó kem tau là deng le sut.

¹⁹ Lemwót Dwata ditu bè kun gónô bè longit, temngel edini laan. Lemwót ditu bè longit temngel edini talak tonok

²⁰ nan e hnungol dolong yó kem tau blanggù, nan e lenwà yó kem tau deng kukum le kul hatay.

²¹ Duhen yó, angat hnigal dóyón le yóm boluy Dwata bè Sayun, dóyón le bè Jirusalim,

²² ke deng le gotu stifun yóm kdéen tau, ne ke deng le gotu stifun tmaba ebè Dwata yóm kdéen benwu.

²³ Là dengen gfu he yóm dou klowil, deng sana hukol Dwata towoku.

²⁴ Okóm hkoduhe béléen, monu, “Ó Dwata yóm Dwata là matayen, béem tagad nwa do klowilu yóm igou hanà tolo lomi tau.

²⁵ Tehe là sekna ekni, hdaem begel tonok, ne lan tdokem mò yóm longit.

²⁶ Angat le gotu kmanas se yó, okóm kóm, laen kô dù nam e són. Hol le skél bè nes, angat le gotu bolok. Gotu tenlesem lu lómón nes, ne tódô le lana lem matahem.

²⁷ Okóm kóm, sana uu, laen kô dù nam e són.

²⁸ Yó kem ngà yó kem tauhem, laen dù hemen le. Yó kem lugod le, angat tey kbegel le bè soluhem.”