Kem Lingón 100 - Udél Dwata: Gna Kesfasad ne Lomi Kesfasad

Lingón dmóyón ke Dwata

¹ Hol ye hligal semngal ebè Dwata, yu kem tau bè klamangen benwu.

² Hol ye hligal tmaba ebéléen. Hloni ye ebéléen, mung du yóm kehligal ye semngal.

³ Hol bê tekuy abay klifót, yóm Dwata gónó tekuy mogot, du se yóm hol tahu Dwata. Tehe nifilen tekuy, du se hol mfun tekuy, ne tekuy se yó kem kun tau. Hol lómón ke tekuy yóm ubiha tendo gel sen-gyoken.

⁴ Bè yóm igò ye husek bè bak tikeb yóm Gónô Dwata, hmung ye du yóm tey keslamat ye béléen. Hol dóyón ye bè yóm khusek ye elem Gónóen. Hol ye slamat béléen, mung du yóm tey kdóyón ye du.

⁵ Tey hyu yóm Dwata. Laen kô dù tul sónen yóm kbong nawahen tekuy. Ne là kóen monol yóm nawahen ebélê tekuy efet kól bè laen dù sónen.