Kem Lingón 10 - Udél Dwata: Gna Kesfasad ne Lomi Kesfasad

¹ Ó Dwata, moen de ke hlayuki béléu? Moen de ke henbnosem ou bè yóm igoen wen hlayamu?

² Lemwót bè yóm keheklabak yó kem tau mò sidek, yó gónón alì sidek kehegnok le yó kem tau élél. Hol lu hebkóhem bè yóm sidek atul le eta yó kem dumu tau.

³ Yó kem tau mò sidek yó, tey henklabak le yóm sidek nô lem hendem le. Tey kdóyón le yó kem tau seglom, fen henmulà le uu, Dwata.

⁴ Lemwót bè yóm alì kehegmón le, là kô le móyô mebel ke Dwata. Yó hendem le, “Laen kô dù Dwata.”

⁵ Okóm ket nmò le, sal wen uléken. Balù udì ke hendem le yóm kwen tafakem eles mangat kul. Gel senlón le yó kem hohon le.

⁶ Yó mon nawa le, “Laen kô dù sidek gefet bélê tekuy. Laen kô dù gfà tekuy efet kól bè sónen.”

⁷ Yóm gel btang bè sumóng le, hono udél hemmulà, udél mò kéng, ne udél mifis. Mahil bélê le mudél sidek ne mudél hemsidek kem dumu le.

⁸ Bè yó kem benwu lemnek hmékét le bè lan, hnatay le yó kem tau laen dù salà le. Tendo hnebel mata le yóm tau laen dù gmò le.

⁹ Eles le hmilung mangat lómón liyun, hnilung nangat kenfô le yó kem tau laen dù gmò le. Ke deng gekfô le lu, omin le kendel demyol kul lem holot le.

¹⁰ Tódô hgasà yó kem tau laen dù gmò le efet là bud le gebtik. Yakà tey le kemgis yó kem tau mò sidek yó.

¹¹ Yó hendem le, “Là kô snolò Dwata du yóm ni. Là kô tonen du yóm nmò tekuy ni.”

¹² Hekmóni, Dwata. Tnafakem lu, Dwata, yó kem tau gel mò sidek. Béem abay klifót yó kem tau laen dù gmò le.

¹³ Moen de ke kenbê le Dwata yó kem tau mò sidek? Kihol le mon du, “Là kô snolò Dwata tekuy.”

¹⁴ Okóm, Dwata, deng tonem se yóm alì kehlayam le tau ne yóm alì kehsidek le kul. Deng eles hendemem ne yóm ktafakem kul. Són uu snalig yó kem tau laen dù gmò le. Uu se gel tmóbóng yó kem ngà hikit.

¹⁵ Tenfokem sigel yó kem tau alì mò sidek. Snoloem yó kem sidek gel nmò le efet gotu genlaem yóm kdê le.

¹⁶ Dwata se yóm hol geta laen kô dù tul sónen. Yó kem tau gel tmaba ebè yó kem dwata kéng, tódô gotu kó Dwata lu bè yóm kun benwu.

¹⁷ Ó Dwata, deng eles tngónem yóm nefet nawa le yó kem tau laen dù gmò le. Henklinguhem yó kem hni le, ne henyuhem nawa le.

¹⁸ Nmoem yóm kukum tedeng bè yó kem ngà hikit ne bè yó kem tau hen-gnok anì laen dù bud tau hmikò kul.