Kem Lingón 1 - Udél Dwata: Gna Kesfasad ne Lomi Kesfasad

BOK 1 Kem Lingón 1—41 Lingón bè yóm hol tahu kligal

¹ Hligal le kul yó kem tau kembê du yóm kul gel hlau yó kem tau gel mò sidek, ne ke là lolò le du yóm kul kmò yó kem tau gemsalà, duhen ke là gbót le bè yó kem tau hemnê ke Dwata.

² Yó dé gónó le hligal ke nimón le yó kem hlau Dwata, ne ke là skóhen yóm tendo kehedem le du, ket kdaw ne ket kifu.

³ Yó kem tau yó, hol lómón ke koyu mteg hilol él. Ke bud kól bè yóm bulón le mungu, tey kbungu le, ne là kóen na a menes doun le. Lómón yó se kmò le yó kem tau ke tendo lolò le yó kem kun hlau Dwata, bè ket nmò le, sal gfu.

⁴ Okóm tólóng kul yó kem tau gel mò sidek. Yó gónó te e hmingón kul, hol lómón ke kafa halay, gotu le gmung holis bè lenos.

⁵ Yó gónóm mon, bè yóm kdaw angat kkukum Dwata tau, gotu le golu elem hatay yó kem tau gemsalà. Là kô homong Dwata kul bè yó kem kun tau.

⁶ Bong yó kem tau tedeng kmò le, tendo gel sen-galak Dwata lu ne nofinen lu. Bede yó kem tau gel mò sidek, deng le golu elem hatay ne.