Kehewà 9 - Udél Dwata: Gna Kesfasad ne Lomi Kesfasad

Glimu tafak

¹ Yó bud mon Dwata mò ke Musis, “Budi mógów ebè Faro tulónem du, monem, ‘Yó udél yóm sana Dwata yó kem tau Hibru yóm hol gónó mogot, hol hewótem lu ne yó kem dou tau anì na le e tmaba ebéléu.

² Ke bud nalihem lu

³ angat tnafaku u mlan bè kehwitu yóm des alì sidek ebè yó kem ógóf ye, bè kudà ye ne bè kudà asnu ye ne bè kamél ye ne bè safì ye ne bè ubiha ye ne bè kambing ye.

⁴ Bè yóm nmou ni mò gónón gfan yóm kestólóngu yó kem kul ógóf yó kem tau Israél bè yó kem kul ógóf yó kem tau Idyip. Yóm kul ógóf yó kem tau Israél, balù sotu ke wen matay bélê le.

⁵ Ou se yóm Dwata deng muteng du ne haya kmou du yóm ni.’ ”

⁶ Tahu se. Timbow hayahen bè yó, tey wen mlef bè yó kem kul ógóf yó kem tau Idyip lómón yóm deng mon Dwata. Okóm yóm kul ógóf yó kem tau Israél, balù sotu ke wen matay bélê le.

⁷ Snólók Faro nim ni ne tulón le du balù sotu ke wen matay bè kul ógóf yó kem tau Israél. Bede bud senged snéen, sana tolo tey kgel kuluhen, là kô bayaen kul yó kem tau Israél.

Gnem tafak

⁸ Yó bud mon Dwata mò ke Musis ne Aron, “Ma ye ket kuy skuf kohù bè kohù ye. Ke deng ye kól bè solu Faro, sohul Musis eta yóm kohù yó bè yóm igò Faro temngel.

⁹ Gotu holis lómón yóm kholis kfung bè klamangen Idyip ne bè ni gónón lemwót hnisa yó kem tau bè klamangen Idyip dalang se yó kem dù ógóf le. Ne yóm hisa le yó tódô hlós baling mgas bè lówó le.”

¹⁰ Tahu se, ma le kohù le Musis ne mdà le bè solu Faro. Omin Musis smohul du eta yóm kohù yó ne gotu le hnisa yó kem tau ne yó kem ógóf le ne baling mgas bè lówó le.

¹¹ Yó kem tau demwata, là kô le bud hegfan ebè le Musis, bà mon tódô tfeng lówó le hisa lómón yóm kul hisa yó kem dumu tau Idyip.

¹² Okóm hgel Dwata kulu Faro. Là kô nan e hnungol kul le Musis ne Aron lómón yóm deng tehe mon Dwata.

Ghitu tafak

¹³ Yó bud mon Dwata mò ke Musis, “Hol hlafus haya budi mógów ebè Faro, bud tulónem du, monem, ‘Yó udél yóm sana kul Dwata yó kem tau Hibru yóm hol gónó mogot, monen, Hol hewótem lu ne yó kem dou tau anì na le e tmaba ebéléu.

¹⁴ Ke là hlusem kul, là són du yó kem genlalem ne yó kem tauhem tnafaku, okóm tnafaku uu snéen mò gónóm temngón du laen dù semnged dou bè klamangen benwu.

¹⁵ Ke deng tehe tayalu eta sigelu deng genlau u ne dalang se yó kem tauhem mlan bè des mekto.

¹⁶ Okóm là, naw hlowilu uu mò gónóm mton du yóm kfasangu anì yó, mból bè klamangen benwu yóm dou boluy.

¹⁷ Okóm sana tolo kehegmónem ne là kói móyô hewót kul yó kem dou tau.

¹⁸ Hlafus haya lómón ni uras, hetbóhu yóm tey bulók kulón, yóm bulók kulón là deng hnikót ton kem tau Idyip du lemwót bè kbut yóm benwu le.

¹⁹ Ne ni, mdóki kem tau anì hefgolungem kul yó kem ógófem ne kdê yó kem kimuhem nô bè lewà, abay se angat tbó eta kem tau ne eta yó kem ógóf nô bè lewà yóm tey bulók kulón ne bè yó gónó le gotu matay.’ ”

²⁰ Bè yóm kungol le du yóm udél Dwata yó ne yó kem genlal Faro, wen se bélê le likò. Gotu nwit le lu elem gónô yó kem gel hesek le ne gotu hgolung le lu yó kem ógóf le.

²¹ Okóm yó kem dumu, là kô kenmón le du kul yóm eles hetgama Dwata kul yó. Tódô bayà le lu bè lewà yó kem hesek le ne yó kem ógóf le.

²² Omin Dwata mon du mò ke Musis, “Tayalem eta bè longit sigelem anì yó, tbó bè klamangen Idyip yóm tey bulók kulón. Tbó eta yó kem tau ne eta yó kem ógóf ne eta yó kem hulu.”

²³ Tahu se, tayal Musis eta bè longit tugeden ne sen-geng Dwata se heték du ne hetbóhen yóm hol tey bulók kulón ne tey leték kemfô gu talak tonok.

²⁴ Hetbó Dwata yóm tey bulók kulón mung du yóm silà tendo mkal. Ni he yóm tey bulók kulón ne silà là deng hnikót glumfak le du lemwót bè kbut yóm benwu le.

²⁵ Tbó bè klamangen Idyip yóm tey bulók kulón yó bè kdê yó kem nô bè lewà le gomong tau ne kem ógóf le. Ne yó kem hulu le gotu le megfuk ne yó kem koyu gotu le tfok.

²⁶ Són benwu Gusén, yóm benwu bè Idyip gónó le nô yó kem tau Israél, gónón laen dù bulók kulón.

²⁷ Omin Faro htaba kul le Musis ne Aron, monen mò kul, “Denge gemsalà ne dou. Tey tedeng yóm kun nmò Dwata okóm yóm dou ne yó kem tauhu, là kô me tedeng.

²⁸ Hol ye mni kum bè Dwata. Geblaen ni ne yóm tey leték ne nim tey bulók kulón ni. Ni fasadu kuy, hewótu yu ne là bud nalihu kuy bè ni ne.”

²⁹ Mon Musis se mò du, “Bè yóm kehewau bè nim syudad ni, hdau eta sigelu ne mnihe bè yóm sana kum Dwata hol gónó mogot. Tódô hotok yóm leték ne laen se dù bud bulók kulón anì yó, tngón ye yóm kum Dwata yó, du se funen yóm klamangen benwu.

³⁰ Okóm deng eles tngónu là kô dog knikoem du se kóm yóm sana Dwata hol gónó mogot. Dalang se yó kem genlalem, laen kô dù klikò le se kul.”

³¹ Tahu se, bè yóm ketbó yóm bulók kulón gotu sidek yó kem halay le deng gotu hulô boluyen barli. Ne gotu sidek snéen yó kem halay le deng kmolon boluyen flaks.

³² Són là gehsideken du yóm bulók kulón yó, són yó kem lewu kay halay le là deng le lemsob boluy le wit ne spélt.

³³ Omin Musis tmagak ke Faro ne hewà bè yóm syudad yó. Hdaen eta sigelen mni bè Dwata. Ne tódô teflok se yóm leték ne yóm tey bulók kulón ne yóm tey kulón.

³⁴ Timbow ton Faro yóm deng gotu ketefloken senged snéen, bud kegsalaen, sana tolo kehgelen kuluhen, dalang se yó kem genlalen.

³⁵ Ne hol lómón yóm deng tehe mon Dwata mò ke Musis, là kô na a hewót Faro kul yó kem tau Israél.