Kehewà 8 - Udél Dwata: Gna Kesfasad ne Lomi Kesfasad

Gewu tafak

¹ Omin Dwata bud mon du mò ke Musis, “Budi mógów dou ebè Faro ne monem mò du, ‘Yó udél yóm sana Dwata hol gónó mogot, monen, Hol hewótem lu ne yó kem dou tau anì na le e tmaba ebéléu.

² Ke là móyói, ngem tnafaku yóm benwuhem mlan bè kehwitu yó kem tey fak wen.

³ Yóm él Nayl, angat tódô hono fak. Gotu le mógów ete kembu ebè gónô bongem, elem dfélem, bè gónóm tungô, ebè gónô yó kem genlalem ne ebè gónô yó kem tauhem. Ne balù bè kohù ye ne lem yó kem kuleng ye angat tódô hono fak.

⁴ Gotu le hkak ebéléem ne ebè yó kem tauhem ne ebè yó kem genlalem.’ ” Tahu se, mógów le ebè Faro le Musis.

⁵ Yó bud mon Dwata mò ke Musis, “Tulónem ke Aron, tayalen eta yó kem él yóm tugeden ne eta yó kem kanal wen élen ne eta yó kem busung anì hesut yó kem fak ne tódô hono fak bè klamangen Idyip.”

⁶ Tahu se, tayal Aron eta yó kem él yóm tugeden ne tódô sut yó kem tey fak wen bè benwu le.

⁷ Ne lemwót yó kem tau gel demwata, gotu bud nmò le se kul yóm yó ne tódô hesut ete kembu yó kem tey fak.

⁸ Lemwót Faro, htabahen le Musis ne Aron ne monen mò ke Musis, “Mnihi kut bè Dwata yóm gónóm mogot anì kóhen lu ni kem tey fak wen nii. Ke yó nmoen, hewótu lu ne yó kem kuy tau anì na le e demsù ebéléen.”

⁹ Bnalà Musis se, monen, “Teye hligal mni béléem. Tulónem dou ke kdaw du yóm naw e kni béléem bè Dwata dalang se bè yó kem genlalem ne bè yó kem tauhem anì yó, gotu le mdó ni kem tey fak ni ne són ditu bè él Nayl ne gónóm bud mton kul.”

¹⁰ Yó mon Faro, “Yake haya dé kmoem du.” Mon Musis se, “El. Nmou haya yóm hmoem do yó anì hol tngónem laen dù dumu dwata mkél bè yóm kum Dwata hol gónó mogot.

¹¹ Yó kem fak són ditu gónóm mton kul bè él Nayl, mdó le béléem bè ni ne bè yó kem genlalem dalang se bè yó kem tauhem.”

¹² Omin le Musis tmagak ke Faro. Hayahen bè yó mni bè Dwata Musis anì kóhen lu yó kem tey fak deng hwiten ebè Faro.

¹³ Tahu se, bnalà Dwata yóm hni Musis yó. Gotu le matay yó kem fak nô lem gónô le ne nô talak lósól le ne nô talak dnadu le.

¹⁴ Gotu sentifun yó kem tau Idyip yó kem fak matay yó, ya tey fak luduk, tódô lenngeben benwu le yóm tey boo bolok.

¹⁵ Timbow ton Faro yóm deng gotu katay yó kem fak yó, mom bud mulék mgel kuluhen. Là kô nan e hnungol kul le Musis ne Aron, hol lómón yóm deng mon Dwata.

Getlu tafak

¹⁶ Omin Dwata bud mon du mò ke Musis, “Tulónem ke Aron fesen bè tonok tugeden anì tódô baling lifet yóm kfung bè klamangen Idyip.”

¹⁷ Tahu se, fes Aron bè tonok tugeden ne yóm kfung bè Idyip tódô gotu baling lifet. Gotu le mdef bè yó kem tau ne bè yó kem ógóf.

¹⁸ Lemwót yó kem tau gel demwata, tô nmò le se kul okóm là kô gmò le du. Tey lifet wen bè klamangen Idyip

¹⁹ ne yó mon yó kem tau demwata bè Faro, “Dwata se mò du nim ni.” Okóm sana tolo tey kgel kulu Faro. Là kô nan e hnungol kul le Musis ne Aron, hol lómón yóm deng mon Dwata.

Gfat tafak

²⁰ Yó bud mon Dwata mò ke Musis, “Holi hlafus haya anì nam e senlong Faro bè yóm kógówen ebè él. Tulónem du, ‘Yó udél yóm sana Dwata hol gónó mogot, monen, Hol hewótem lu ne yó kem dou tau anì na le e tmaba ebéléu.

²¹ Ni eles monu mò kóm ke là hewótem kul, tnafaku u mlan bè kehwitu ebéléem yó kem tey lenged wen dalang se ebè yó kem genlalem ne ebè yó kem tauhem. Angat tódô hono lenged lem gónô yóm kdéen tau bè Idyip. Yóm tonok bè klamang benwu le angat tódô hono lenged.

²² Okóm yóm benwu Gusén, yóm benwu gónó le nô bè Idyip yó kem dou tau, là kô homongu du, laen dù lenged tonem bè yó. Yó gónóhu mò du nim ni mò gónóm temngón du ou yóm Dwata mfasang bè nim benwu ni.

²³ Bè nim angat nmou ni, mò gónón gfan yóm kestólóngu yó kem dou tau bè yó kem tau Idyip. Haya ksuten nim tey hentaw ni.’ ”

²⁴ Tahu se hayahen bè yó, tódô kmifu lenged hwit Dwata ebè gónô bong yóm Faro ne ebè gónô yó kem genlalen. Tódô hono lenged bè klamangen Idyip, gotu hensidek le yóm benwu yó.

²⁵ Omin Faro bud htaba kul le Musis ne Aron ne monen mò kul, monen, “Lemwót ye ne, na ye e demsù ebè yóm kuy Dwata bede bè ni bè nim benwu ni gónó ye mò du.”

²⁶ Mon Musis se, “Là hyuhen ke nmò me bè ni, abay se lenbut le mi yó kem tau Idyip lemwót bè yóm gel khatay me ógóf mò dsù me ebè yóm sana kum Dwata hol gónó mogot. Ke yó nmò me ne ke ton le mi, ngem kà gotu hnatay sentudà le kum botu.

²⁷ Là gbek me mò du ke là tlu kdaw me du mógów elem yóm benwu laen hol wen tauhen anì ne me e demsù bè yó bè yóm sana kum Dwata hol gónó mogot, lómón yóm deng monen mò kum.”

²⁸ Yó mon Faro, “Ke là kat ye hlayuk, hlusu yu anì na ye e demsù ebè yóm kuy Dwata hol gónó mogot bè yóm benwu laen hol wen tauhen. Holi mni béléu bè Dwata.”

²⁹ Mon Musis se, “Bè nim kewótu ni mnihe béléem bè Dwata anì yó, haya tnagak le u yó kem lenged, tnagak le yó kem genlalem ne yó kem tauhem. Okóm hol béem bud tundug mi ne béem abay nali yó kem tau anì na le e demsù ebè Dwata.”

³⁰ Tnagak Musis Faro ne mni béléen bè Dwata.

³¹ Tahu se, bnalà Dwata yóm kni Musis yó. Laen dù bud tonem lenged bè gónô Faro ne bè gónô yó kem genlalen ne yó kem tauhen. Balù sotu ke bud wen tonem móyóng.

³² Okóm balù wen ni kem ni he, sana tolo tey kgel kulu Faro. Là kô bayaen kul yó kem tau Israél.