Kehewà 7 - Udél Dwata: Gna Kesfasad ne Lomi Kesfasad

¹ Yó bud mon Dwata mò ke Musis, “Lómó kmou kóm bè Faro yó, lómón ke uu Dwata ne yóm twoguhem Aron mò fen gel tugodem ebè Faro.

² Tulónem ke Aron yóm kdê monu mò kóm anì du fen tmulón du bè Faro. Yó hol tulónen ke Faro, ‘Hol hewaem lu ne bè kóm benwu yó kem tau Israél.’

³ Okóm naw hgel kulu Faro, ne là kô nan e hnungol kuy balù nô kwenen yó kem knikò hmou kuy bè ni bè Idyip.

⁴ Duhen yó, angat wen tey tafak héét hwitu ebè yó kem tau bè Idyip. Yó kmò kwitu kul hewà bè yóm benwu yó, yó kem dou tau Israél, nwitu lu mlan bè ket ktol le.

⁵ Yó he ketngón le do yó kem tau Idyip, ou yóm sana Dwata hol gónó mogot ke sok tayalu eta sigelu mò tmafak kul ne ke sok nwitu hewà bè yóm kul benwu yó kem tau Israél.”

⁶ Tahu se, tódô nmò Musis ne Aron yóm deng hmò Dwata kul yó.

⁷ Bè yóm kdaw kestulón le bè Faro, deng wolu folò ne halay Musis ne fen wolu folò tlu kun halay Aron.

Yóm tuged Aron

⁸ Sotu bud mon Dwata mò ke Musis ne Aron bè yóm kestulón le yó,

⁹ “Ke yó mon Faro mò kuy, ‘Mò ye hentaw ton kun mò gónón gdilô ke tahu yóm mon ye.’ Ke yó se monen, dókem Aron anì boten bè solu Faro yóm tugeden ne baling ulal yóm tugeden yó.”

¹⁰ Tahu se, mógów le ebè Faro le Musis ne Aron na le e nmò yóm deng hmò Dwata kul. Bot Aron bè solu Faro ne yó kem tau genlalen yóm tugeden, tódô baling ulal se yóm tuged yó.

¹¹ Okóm yó nmò Faro, htabahen yó kem tau hulung hmau bélê le ne yó kem tau demwata ne bud nmò le se kul yóm nmò Aron yó.

¹² Bot le yóm kul tuged ne bud baling ulal. Okóm yóm kun tuged Aron, mom hlohen yóm kul.

¹³ Bede ke Faro, sana tolo tey kgel kuluhen. Là kô nan e hnungol kul le Musis ne Aron, hol lómón yóm deng mon Dwata.

Yóm tanay hegfà Dwata yó kem tau bè Idyip

¹⁴ Omin Dwata mon du mò ke Musis, “Tey mgel kuluhen yóm Faro yó ne là dog hewaen kul yó kem tau.

¹⁵ Yó gónóm mon, hlafus haya senlongem Faro bè yóm kógówen ebè él Nayl. Nwitem yóm tuged deng tehe baling ulal ne nangatem ditu bè kilil yóm él yó.

¹⁶ Ke sok kól bè yó, monem mò du, ‘Dók Dwata mi ebéléem, yóm sana Dwata yó kem tau Hibru, yóm hol gónó mogot, anì tulónu kóm hol hewótem lu ne kun yó kem kun tau anì na le e tmaba ebéléen bè yóm benwu laen hol wen tauhen. Okóm efet ni là kô dog hnungolem du.

¹⁷ Duhen ni, wen bud udél Dwata ebéléem. Mlan bè nim nmoen ni gónóm temngón du, du se yóm sana Dwata hol gónó mogot. Ngem, fesu bè él nim tugedu nii anì tódô baling litô nim él ni.

¹⁸ Gotu matay yó kem utónen ne tey moo yóm él ne là bud le ginum du yó kem tau Idyip.’ ”

¹⁹ Yó bud mon Dwata mò ke Musis, “Bè yóm kógów ye haya ebè Faro, dókem Aron anì tayalen eta tugeden ebè kdéen él bè Idyip ne eta yó kem kanal él ne yó kem busung, anì gotu baling litô yó kem él yó. Tódô hono litô yóm él bè klamang yóm benwu yó, balù yóm él nô lem kobong le ne lem lebwón le, gotu baling litô.”

²⁰ Tahu se, hayahen bè yó, nmò Musis ne Aron yóm deng hmò Dwata kul yó. Tayal Aron bè solu Faro ne yó kem genlalen yóm tugeden ne fesen bè yóm él mlel bè yó ne tódô baling litô yóm él yó.

²¹ Gotu matay yó kem utónen ne tey moo yóm él ne là kô le ginum du yó kem tau Idyip. Tódô baling litô yó kem kdéen él bè klamangen Idyip.

²² Okóm yó kem tau demwata Faro yó, gotu bud nmò le se kul yó kem yó. Yó gónóm mon, sana tolo tey kgel kuluhen yóm Faro. Là kô nan e hnungol kul le Musis ne Aron, hol lómón yóm deng mon Dwata.

²³ Mom yó nmoen, mulék eta ebè gónô bongen, balù udì ke hendemen nim ni.

²⁴ Tódô kdê yó kem tau Idyip, gotu le mokol bè kilil yóm él yó anì wen él ninum le abay se là bud le ginum bè yóm él mlel yó.

²⁵ Hitu kdawen miwes kogol yóm gotu kehbaling Dwata du litô yóm él mlel yó.