Kehewà 6 - Udél Dwata: Gna Kesfasad ne Lomi Kesfasad

¹ Omin Dwata mon du mò ke Musis, “Ni hol hnénégem yóm angat nmou bè Faro yó. Angat gnagahu anì hewaen lu yó kem dou tau. Bè ktahuhen, angat hdóhen lu bè yó bè kun benwu.”

Bud ktaba Dwata ke Musis

² Yó udél Dwata ebè Musis, monen, “Ou se yóm sana Dwata hol gónó mogot.

³ Bè yóm tehe kehegfanu bè Abraham ne bè Isak ne bè Jakub, ou se yóm Dwata alì gembek. Okóm là kô deng hetngónu du kul he ke ou yóm sana Dwata hol gónó mogot.

⁴ Tehe wen senfasad me. Yó fasadu kul, duhen yóm keblayu du kul yóm benwu Kanan yóm benwu tehe gónó le e milo.

⁵ Ne ni, deng gungolu yóm alì ktaba le ebéléu yó kem tau Israél, yó kem tau alì hesek yó kem tau Idyip. Ne gtulón nawahu yóm tehe kesfasad me le Abraham, yó kem tehe fù le.

⁶ Duhen ni, tulónem yó kem tau Israél, nim udélu ebélê le ni, ‘Ou se yóm sana Dwata hol gónó mogot. Lenwau yu lem tdok yó kem tau Idyip. Hewau yu bè yóm gónó ye alì ghesek. Angat tayalu eta sigelu mò tmafak yó kem tau Idyip, okóm fen hewau yu yó dum kuy.

⁷ Nmou yu mò hol dou tau ne ou se hol kuy Dwata. Angat tngón ye ou yóm sana kuy Dwata hol gónó mogot bè yóm angat kehewau kuy bè Idyip, yóm benwu gónó ye ghesek.

⁸ Angat nwitu yu ebè yóm benwu tehe fasadu ke Abraham ne Isak ne Jakub. Blayu kuy yóm benwu yó mò hol kuy nfun. Ou se yóm sana Dwata hol gónó mogot mon du nim ni.’ ”

⁹ Tulón Musis yó kem tau Israél nim ni, okóm là kô dog hnungol le du abay se deng alì sidek kebà nawa le lemwót bè yóm alì keghesek le.

¹⁰ Omin Dwata mon du mò ke Musis,

¹¹ “Lemwóti ne tulónem ke Faro hol hewóten lu bè kun benwu yó kem tau Israél.”

¹² Okóm yó balà Musis du, monen, “Sélét mom tô Faro ne hmungol dou anien se yó du kem tau Israél, là kô hnungol le dou. Abay se là hulunge mudél lem blóng kem tau.”

¹³ Yó mon Dwata mò ke Musis ne Aron, “Hol tulón ye yó kem tau Israél ne bè Faro, deng dóku yu mò mit kul hewà bè Idyip yó kem tau Israél.” Là gomongen bè nili yóm bérs 14 efet kól bè bérs 27. Hono boluy yó kem fes lówó le Musis ne Aron.

Yóm dók Dwata ke Musis ne Aron

²⁸ Bè yóm kudél Dwata ebè Musis bè Idyip,

²⁹ monen mò du, “Ou se yóm sana Dwata hol gónó mogot. Tulónem ke Faro yóm kdê deng monu mò kóm.”

³⁰ Okóm yó balà Musis du, monen, “Tngónem se là kóe hulung mudél. Neet he ke tô hnungol Faro ou.”