Kehewà 5 - Udél Dwata: Gna Kesfasad ne Lomi Kesfasad

Kdà Musis ne Aron bè solu Faro bè Idyip

¹ Omin Musis ne Aron mógów ebè Faro bè Idyip ne mon le mò du, “Yó udélen ebéléem yóm sana kum Dwata yóm hol gónó me mogot kem tau Israél, monen, ‘Hol hewótem lu yó kem dou tau anì na le e mò ken bong bè yóm benwu laen hol wen tauhen mò gónó le madat dou.’ ”

² Yó udél Faro, monen, “Dwata du de myó? Moen du ke tô hnungolu ne ke tô hlusu lu lemwót yó kem tau Israél? Là kô tngónu du dou yóm Dwata yó ne là kô hlusu kul.”

³ Omin le Musis ne Aron mon du mò du, “Deng hegfan bélê me yóm sana kum Dwata kem tau Hibru. Ke yóm hyu béléem nam hewót mi, tlu kdaw me mógów elem yóm benwu laen hol wen tauhen anì na me e demsù ebè yóm kum Dwata. Ke là nmò me du nim ni tódô hnatayen mi yóm kum Dwata mlan bè des duhen ke bè gida.”

⁴ Yó mon Faro mò kul le Musis ne Aron, “Tedu hendem ye gónó ye là bud hmò kul nmò yó kem tau? Bud hulék ye lu bè kmò le nmò dé yó kem hesek yó.

⁵ Tey ye deng mból senta yó kem tau Idyip. Ne ni, mone là bud ye móyô mò nmò.”

⁶ Bè yóm kdaw yó, gotu htaba Faro yó kem tau Idyip dmanda mdók kul yó kem tau Israél hesek le ne yó kem tau Israél gel malak kul mò nmò yó kem dumu le Israél. Yó monen mò kul,

⁷ “Bê ye abay bud benlay lu lami yó kem tau Israél ke mò bol le bè yóm tonok miket gel nmò le ngom gónô. Tódô hebel ye lu yóm mò kul.

⁸ Okóm hol skél bè kwen yóm gnan yóm bud nmò le ni, béen abay kensong. Yó se gónó le gel mógów ebéléu anì hlusu lu na a demsù ebè yóm kul Dwata abay se laen dù hol nmò le.

⁹ Hol heblat ye yóm hmò ye kul ni kem tau ni ne hol nmò ye gónó le meglala anì laen dù uras le hmungol yó kem tulón kéng lemwót gu bè le Musis.”

¹⁰ Tahu se, gotu le lemwót yó kem tau htaba Faro yó koni, yó kem tau Idyip gel dmanda mdók yó kem tau Israél ne yó kem tau Israél fen gel malak yó kem dumu le Israél mò nmò. Bè yóm kkól le bè yó kem tau Israél, yó mon le mò kul, “Deng mon Faro, là bud benlayen kuy lami ne kun.

¹¹ Monen, tódô ye mebel kuy, balù kihu gónó ye e mebel, okóm hol tódô senged bè yóm gnan yóm kwen ngom gónô bud nmò ye lemwót bè tonok miket.”

¹² Tahu se, tódô lenngeb yó kem tau Israél yóm benwu Idyip na a mebel lami.

¹³ Ya tey kdanda le mdók kul yó kem tau Idyip anì hol senged bè yóm gnan yóm nmò le ket kdaw, lómón yóm kwen yóm nmò le bè yóm tehe hanà kwen gel bemlay kul lami.

¹⁴ Lemwót yó kem tau Idyip gel dmanda mdók kul yó, gel nfes le yó kem tau Israél gel malak kul mò nmò yó kem dumu le Israél. Yó mon le mò kul, “Moen du ke là sengeden bè yóm gnan yóm bud nmò ye?”

¹⁵ Omin le mógów ebè Faro yó kem tau Israél gel malak mò nmò yó, mon le mò du, “Moen du ke lómón ni nmoem bélê me?

¹⁶ Yó kem kóm tau gel dmanda mdók kum yó laen sem dù bud lami blay le kum, okóm sana tolo bud kehmò le kum ngom gónô. Ne ni, tey kfes le kum. Kem tauhem se buten nim keglayam me ni.”

¹⁷ Mom yó balà Faro kul, monen, “Abay se mduk ye, là móyô ye mò nmò. Ne yó se gónó ye mbal béléu anì tô hlusu yu na a demsù ebè Dwata.

¹⁸ Géhél ye bud mò nmò ne. Laen kô dù bud bemlay kuy lami okóm hol hsenged ye bè yóm gnan yóm kwen ngom gónô bud nmò ye.”

¹⁹ Ya tey sidek ktafa nawa yó kem tau Israél gel malak yó yóm kmon Faro du mò kul, “Hol hsenged ye bè yóm gnan yóm kwen ngom gónô bud nmò ye ket kdaw.”

²⁰ Bè yóm deng kewót le, ton le Musis ne Aron mangat.

²¹ Yó mon le mò ke Musis ne Aron, mon le, “Deng ton Dwata yóm nmò ye ne angat tnafaken yu bè yóm nmò ye ni. Lemwót bélê ye gónó Faro mutó nawa kum ne yó kem genlalen. Yu henged mni du yóm khatay le kum.”

Ktalaw Musis bè Dwata

²² Omin Musis bud mulék ebè Dwata, monen, “Ó Dwata, moen du ke hnayamem lu yó kem kóm tau? Moen du ke tehe hógówem o ebélê le?

²³ Lemwót bè yóm kógówu ebè Faro na a tmulón du yóm udélem, yó se but gónóhen alì hmayam kul. Ne là kô dog tnóbóngem kul.”