Kehewà 40 - Udél Dwata: Gna Kesfasad ne Lomi Kesfasad

Kehdà le yóm Gónô Dwata ne yóm kehetfing le du ebéléen

¹ Yó mon Dwata mò ke Musis,

² “Ke sok sut yóm lomi halay, bè yóm tanay kdaw bè yóm tanay bulón, hdà ye yóm Gónô mò gónóhu nô lem blóng ye.

³ Suem lemen yóm Slungan Fasad gónóhen nô yó kem sfolò hlauhu kuy ne tméwéngi nes mò sengen.

⁴ Hemsui lemisa bè yóm dfél sendini yóm nes téwéng yó, suem tahen yó kem ngom wen mu ye du bè yó. Bud hdaem bè yóm dfél yó sfatà yóm lemisa yóm gónóhen gel nô yó kem solok ne ominem hemtom kul.

⁵ Suem bè solu yóm Slungan Fasad sendini yóm nes téwéng yóm lemisa lenafin tahu blówón gónó le gel mtem yóm hboo alì tilob boohen boluyen insinsu. Ne tnéwéngem nes bè bak dól yóm Gónóu mò sengen.

⁶ Suem bè lósól bè solu yóm Gónô hdà ye yó yóm gónô demsù gónó ye gel hkekeb yó kem ógóf dsù ye ebéléu.

⁷ Ne yóm len-gana gónó le gel molob, suem bè gónón sóól yóm Gónô hdà ye ne yóm gónô demsù ne nlemem él.

⁸ Lenabatem hmilol lósól yóm Gónóu yó ne tnéwéngem nes bè bak tikeben mò sengen.

⁹ Ominen yó, tenwélem hnolo yóm Gónô hdà ye yó, yóm hnolo gel nmò ye béléu, homongem kdê yó kem nô lemen anì hol hetfing ye ebéléu.

¹⁰ Todol du, tenwélem se yóm gónô demsù ne kdê yó kem ngomen nô du anì hol hetfing ye ebéléu.

¹¹ Senged se yóm len-gana ne yóm gónóhen myón, bud tenwélem se kun anì hol hetfing ye ebéléu.

¹² Ominem mit ke Aron ne yó kem ngaen logi ebè bak dól yóm Gónô yó anì denyohem lu bè yó.

¹³ Hesekem ke Aron yóm nes mò lesek yóm tau blóng ebéléu. Tenwélem hnolo ta kuluhen mò ilô yóm kéléku du mò blóng tau ebéléu.

¹⁴ Ne nwitem yó kem ngaen, hesekem kul yóm nes deng nmò ye bélê le.

¹⁵ Ominen yó, tenwélem hnolo ta kulu le lómón yóm ketwélem ke mà le anì baling le mò blóng tau ebéléu se kul. Nim ketwélem kul ni mò ilô yóm klaen dù sónen yóm keseblóng yó kem lugod le ebéléu.”

¹⁶ Tahu se, gotu nmò Musis yóm kdê deng hlolò Dwata du.

¹⁷ Duhen yó, bè yóm tanay kdaw bè yóm tanay bulón bè gewuhen halay kogol yóm kehewà le gu bè Idyip, hdà le yóm Gónô Dwata gel nit le mógów.

¹⁸ Hdà Musis yóm gónóhen mteg heheken ne hendaen hehek. Nmoen hiholen ne hlekelen.

¹⁹ Wen se newel nbólen tahen mò bengen ne ketefen, bud suen ta yóm nes yó yóm kulit ógóf deng tenbé le mò lafinen, hol lómón yóm deng hlolò Dwata du.

²⁰ Ominen ma yóm lewu botu kufil gónóhen nô yóm sfolò kem hlau Dwata kul, yóm deng senfasad le ne suen lem yóm Slungan Fasad. Wen nmò le lómón tô tising sù le bè sfatà kilil yóm slungan yó mò gónó Musis hfusek yóm koyu gónó le tmihang du. Ne ominen hemsù du tahen yóm sefeng hono tahu blówón mò gónó Dwata mkó salà.

²¹ Ominen hemsù du lem Gónô Dwata yóm Slungan Fasad yó ne wen nes tléwéngen bè yó mò sengen, hol lómón yóm deng hlolò Dwata du.

²² Ne ominen bud hemsù yóm lemisa lem yóm Gónô Dwata yó bè sendini yóm nes téwéng yó, bede fi bwaken.

²³ Ne suen tahen yóm mambang deng blay le ke Dwata, hol lómón yóm deng hlolò Dwata du.

²⁴ Suen lem yóm Gónô Dwata snéen yóm gónó le gel hemsù solok bè sfatà yóm lemisa fi legeden.

²⁵ Ne bè yó bè solu Dwata gónóhen hemtom du yó kem solok, hol lómón yóm deng mon Dwata mò du.

²⁶ Ne yóm lemisa lenafin tahu blówón gónó le gel mtem yóm insinsu gel hboo le ebè Dwata, suen sendini yóm nes tléwéng seng yóm Slungan Fasad, bede moni e du.

²⁷ Ne ominen mtem du tahen yóm hboo alì tilob boohen boluyen insinsu, hol lómón yóm deng hlolò Dwata du.

²⁸ Ne bud wen nes tléwéngen bè bak dól yóm Gónô Dwata yó mò sengen.

²⁹ Ne bè yó bè lósól sendini yóm nes yó gónón hemsù yóm gónó le gel demsù ógóf gel hkekeb le ebè Dwata. Ominen demsù bè yó ógóf gel hkekeb le ebè Dwata ne yóm halay gel blay le ebè Dwata snéen, hol lómón yóm deng hlolò Dwata du.

³⁰ Lemwót yóm len-gana suen bè gónón sóól yóm Gónô Dwata ne yóm gónó le gel demsù ebéléen, ominen mlem du él.

³¹ Bè yó gónó le molob ti ne tdok le, le Musis ne Aron ne yó kem ngaen logi

³² ke gel le mógów elem yóm Gónô Dwata, duhen ke gel le mógów ebè yóm gónó le gel demsù, hol lómón yóm deng hlolò Dwata ke Musis.

³³ Ominen lemeket yóm nes mò labat hmilol yóm Gónô Dwata ne yóm gónó le demsù. Ne bud wen nes tléwéngen bè bak tikeben mò sengen. Ne yó, gotu deng Musis yóm kdéen.

Yóm lobun nô ta yóm Gónô Dwata

³⁴ Ominen lememek eta yóm Gónô Dwata yó yóm lobun tmahà gel tukô gna kul ne tódô tfeng lem yóm Gónô Dwata yóm tey layag Dwata alì sminang.

³⁵ Lemwót bè yóm alì keslinangen, yó gónó Musis là gógów elem yóm Gónô Dwata.

³⁶ Bè yóm gel kógów yó kem tau Israél, són gónó le bud lemwót ke bud hegkay yóm lobun yó.

³⁷ Okóm ke tolo henek ta yóm Gónô Dwata, là kô nili le du yóm kamfù le.

³⁸ Bè yóm igò le mò du yóm menwu mógów, sónmò le tendo mton du yóm lobun gónóhen nô Dwata nô ta yóm Gónô Dwata ke kemdaw ne ke kifu baling ofi tendo lemtom tahen.