Kehewà 4 - Udél Dwata: Gna Kesfasad ne Lomi Kesfasad

Keblay Dwata ke Musis kegbek mò du yó kem hentaw ton

¹ Ne yó bud balà Musis ke Dwata, monen, “Mò kmoen se ke là dog hentahu le dou yó kem tau Israél ne ke là hnungol le du yóm angat tulónu kul? Mò kmoen se ke henkéng le yóm deng kehegfanem béléu ni.”

² Ne yó balà Dwata du, monen, “Tedu se yóm nogotem yóó?” Mon Musis se, “Tugedu.”

³ Bud mon Dwata, “Botem ebè tonok kun.” Tahu se, bot Musis ne tódô baling ulal yóm tugeden, botong mlóy hlayuk Musis.

⁴ Omin Dwata bud mon du mò ke Musis, “Hlonihi e du ne nogotem bè ikongen.” Tahu se, hloni e du Musis ne kenfóen. Tódô bud baling tuged yóm ulal yó.

⁵ Bud mon Dwata mò ke Musis, “Nmoem nim ni lem blóng yó kem tau Israél mò gónó le hemtahu du yóm deng kehegfanen béléem yóm sana kul Dwata hol gónó mogot yó kem tehe fù le Abraham ne Isak ne Jakub.”

⁶ Ne yó bud mon Dwata mò ke Musis, “Suem elem kgalem henmuem.” Tahu se, nimón Musis. Timbow kóhen, deng mom bukay yóm henmuen, tódô tfeng des mifù.

⁷ Omin Dwata bud mon du, “Bud hulékem elem kgalem henmuem.” Tahu se, bud nmò Musis. Timbow bud kóhen, lómón ke laen dù hemenen, tódô bud mulék bè yóm sana kun kmò.

⁸ Yó mon Dwata mò du, “Ke là hentahu le kóm, duhen ke là gmung le bè yóm tanay hentaw ton nmoem, bè nim sotu bud nmoem ni gónó le gmung.

⁹ Ke là hentahu le du yóm lewu hentaw ton deng nmoem yó ne ke là hnungol le du yóm tulónem kul, mahi él bè yóm él bong bélê le boluyen Nayl ne kokem te tonok. Ne tódô baling litô yóm él yó.”

¹⁰ Okóm mom yó balà Musis du, monen, “Hnifótem o, Dwata. Béem hógów ou etu. Yakem hulunge mudél lem blóng tau dou. Tódô lemwót bè kbuten efet nim kestulón te ni, là kóe hol hulung mudél. Malù batul kudélu.”

¹¹ Yó bud balà Dwata du, monen, “Tau du se mò du yóm sumóng tau? Tau du se hbokong du ne humew du? Tau du se hton du ne hbutô du? Ou se mò du, yóm sana Dwata hol gónó mogot.

¹² Yó ne lemwóti, tendo tnóbóngu u he mudél ne tulónu kóm yóm angat monem.”

¹³ Okóm yó balà Musis du, monen, “Bê, Dwata. Ke hyu béléem, tódô dumu tau dé hógówem.”

¹⁴ Bè nim udél Musis ni, botong lembut Dwata, monen, “Mò kmoen se yóm twoguhem Aron, kesfu Libay se kun? Tngónu hulung mudél se kun. Bè ktahuhen, móyón kól bè ni nan e senlong u ne angat tey kehligalen bè yóm kestonen kóm.

¹⁵ Gbekem fen htugod du yóm nóyô monem. Tendo tnóbóngu yu lewu ye bè yóm kudél ye ne tulónu kuy yóm bang nmò ye.

¹⁶ Du mò angat gel htugodem bè yó kem tau Israél. Lómón ke uu Dwata, angat gel htugodem du yóm nóyô monem.

¹⁷ Lemwóti ne nwitem yóm tugedem yó, yakà bè yó du gónóm gel hlan du yó kem hentaw ton angat nmoem.”

Kulék Musis ebè Idyip

¹⁸ Omin Musis mulék ebè Jitru, yóm tuónen ne monen mò du, “Ke yóm hyu béléem, Mà, nam hógów ou ebè yó kem dou dumu tau Israél bè Idyip anì naw e hnénég ke sana tolo klowil le.” Tahu se, hlus tuónen ne monen mò du, “Dwata he mung kóm.”

¹⁹ Gu laan Musis là deng lemwót bè yó bè Midyan, yó mon Dwata mò du, “Béi abay hlikò mulék ebè Idyip. Yó kem tau tehe tô móló hmatay kóm, deng le matay.”

²⁰ Tahu se, nwit Musis yehenen ne yó kem ngaen logi, hsakayen lu kudà asnu, mógów le ebè Idyip. Nwiten yóm tuged hwit Dwata du.

²¹ Yó bud mon Dwata mò ke Musis, “Bè nim kulékem ebè Idyip ni, hol nmoem bè yóm lomi Faro yóm hentaw ton deng hmou kóm mlan bè yóm kfasang deng suu béléem. Okóm angat hgelu kulu Faro ne là kô nan e hlus kul hewà yó kem tau.

²² Duhen yó, hol tulónem du yóm udélu ni, yóm monu, ‘Yó kem tau Israél, hol tau dou nélék, hol lómón ke lu se yóm ngau logi twogu.

²³ Deng monu mò kóm, hol hewótem yóm dou ngà anì tmaba ebéléu. Okóm là kói dog móyô. Mlan bè nim nmoem ni, gónóhu hmatay yóm ngaem logi twogu.’ ”

²⁴ Sotu kifu, yóm igò le hegnô bè lan le Musis bè yóm kógów le ebè Idyip yó, bud ston ke Musis Dwata anì nan e tô hnatay.Yó nmò Sipura yóm tuha libun Musis, ma botu telem mò tulien yóm ngaen logi. Timbow deng ktulien du, ominen kemlé du bè ti Musis yóm kuliten. Bè yóm deng kloloen yóm adat bè kehtulì, yó monen mò ke Musis, “Uu se yóm tuha logihu mlan bè litô.” Lemwót bè yóm nmò Sipura yó gónó Dwata hlowil ke Musis.

^25-26 Yó nmò Sipura yóm tuha libun Musis, ma botu telem mò tulien yóm ngaen logi. Timbow deng ktulien du, ominen kemlé du bè ti Musis yóm kuliten. Bè yóm deng kloloen yóm adat bè kehtulì, yó monen mò ke Musis, “Uu se yóm tuha logihu mlan bè litô.” Lemwót bè yóm nmò Sipura yó gónó Dwata hlowil ke Musis.

²⁷ Bè yóm tolo knô le bè lan yó, deng eles stulón ke Aron Dwata, monen mò du, “Senlongem Musis bè yóm benwu laen hol wen tauhen.” Tahu se, senlongen bè yóm bulul Dwata. Bè yóm ktonen du tey kligalen, botong neleken.

²⁸ Omin Musis gotu tmulón du ke Aron yóm deng mon Dwata mò du bè yóm khuléken du ebè Idyip. Tulónen du snéen yó kem hentaw ton angat hmò Dwata du.

²⁹ Tahu se, slomong le Musis Aron mulék ebè Idyip ne gotu sentifun le yó kem tau malak yó kem tau Israél.

³⁰ Gotu tulón Aron kul yóm kdê deng mon Dwata mò ke Musis. Omin Musis gotu mò du lem blóng le yó kem hentaw ton nmoen.

³¹ Ne hentahu le. Bè yóm kungol le du yóm deng kton Dwata du yóm tey keglayam le ne yóm deng ksuten lem blóng le mò tmóbóng kul, gotu le mtud bukol ne dóyón le Dwata.