Kehewà 34 - Udél Dwata: Gna Kesfasad ne Lomi Kesfasad

Yóm bud tles yóm botu kufil gónó Dwata smulat yó kem hlauhen

¹ Yó mon Dwata mò ke Musis, “Budi mò lewu botu kufil lómón yóm gnan ne bud snulatu du yó kem udél tehe nô bè yóm gnan, yóm deng btuem.

² Eles hentifesem abay se hlafus haya budi mneged eta Bulul Sinay nam e senlong o bè yó ta tfusuen.

³ Béen wen tau mung kóm ne béen wen tau nô bè yóm bulul yó, balù sotu. Laen dù ubiha duhen ke safì mótób bè but yóm bulul yó snéen.”

⁴ Tahu se, wen lewu botu kufil bud nmò Musis ne hol hlafus haya bè yó nwiten eta yóm Bulul Sinay, lómón yóm deng mon Dwata mò du.

⁵ Omin Dwata mnaul elaan mung bè lobun ne mdà klohok Musis, bud tulónen boluyen, du se yóm Dwata hol gónó mogot.

⁶ Omin Dwata miwes bè soluhen, ne hgelen udélen, monen, “Ou se yóm Dwata hol gónó mogot, yóm alì kmodu tau, yóm là mahilen lembut. Gel hegfanu yóm kbong nawahu yó kem tau ne là kóen monol yóm nawahu ebélê le.Là kô kóhu du yóm kbong nawahu tau efet kól bè yó kem hilu bud lugod le. Yó kmò kehegfanu du bélê le yóm nawahu yó, gel hnifótu yó kem sidek gel nmò le ne yóm là kimón le do. Okóm yóm tau ke là kóhen du yó kem sidek gel nmoen là gbeku du ke là tnafaku du, gomong megtafak yó kem ngà le ne témê le lenwóten bè tanay lugod le efet kól bè gfat lugod le.

⁷ Là kô kóhu du yóm kbong nawahu tau efet kól bè yó kem hilu bud lugod le. Yó kmò kehegfanu du bélê le yóm nawahu yó, gel hnifótu yó kem sidek gel nmò le ne yóm là kimón le do. Okóm yóm tau ke là kóhen du yó kem sidek gel nmoen là gbeku du ke là tnafaku du, gomong megtafak yó kem ngà le ne témê le lenwóten bè tanay lugod le efet kól bè gfat lugod le.”

⁸ Tódô kendel mtud bukol bè tonok Musis nan e heglaan bè Dwata.

⁹ Yó monen, “Ó Dwata, ke tahu hyu se nawam ebéléu hkoduhe béléem, holi mung kum. Tey mgel kulu le ni kem tau mung do ni, okóm hol hnifótem mi bè kdê yó kem salà nmò me ne hol henmóyóem mi mò kóm tau.”

Bud kehget Dwata yóm tehe kesfasad le yó kem tau Israél

¹⁰ Yó mon Dwata mò ke Musis, “Yu kem tau Israél, ni wen senfasad tekuy. Yó fasadu kuy, angat nmou bè yó kem hohon ye yóm tey knikò bong là deng wen hmikót mton du talak tonok. Kdê yó kem tau Israél gotu ton le ni kem tey knikò angat nmou ni. Ou se yóm sana Dwata hol gónó mogot mò du bélê ye nim tey knikò angat nmou ni.

¹¹ Yó kuy fasad do, hol nimón ye yó kem hlauhu kuy kemdaw ni. Bè yóm kógów ye elem yóm benwu deng tehe fasadu kuy angat gotu hdóhu lu yó kem tau Amurayt ne yó kem tau Kananayt ne yó kem tau Hitayt ne yó kem tau Pirisayt ne yó kem tau Hibayt ne yó kem tau Jibusayt.

¹² Bê ye abay mit sbilà bè yó kem tau nô bè yóm benwu gónó ye e solu abay se ke nmò ye yóm yó, yó se gónó ye gholot bélê le, yóm gónó ye là gemmò bélê le.

¹³ Yó dé nmò ye, gotu genbà ye yó kem gónó le gel demsù ebè yóm kul dwata. Hnugón ye yó kem hehek botu tahà gónó le gel tmaba ebélê le ne nofok ye yó kem dwata lennged le.

¹⁴ Béen abay wen bélê ye tmaba ebè yó kem kul dwata abay se tey sidek kélés nawahu du ke wen dwata lennged gónó ye tmaba.

¹⁵ Béen abay wen senkotuk ye bè yó kem tau bè yóm benwu yó, abay se ke demsù le ebè yóm kul dwata lennged ne ke tmaba le ebélê le, ngem kà tinok le kuy anì mung ye bélê le ne gsindil ye mken du yóm ken deng dsù le ebè yóm kul dwata.

¹⁶ Ngangen efet le myehen bè kul libun yó kem ngà ye, yóm mit kul là hemtahu béléu ne mung le tmaba bè yóm kul dwata lennged.

¹⁷ Béen abay wen bélê ye mò yó kem dwata lennged tenwél le ne hol bê ye abay tmaba ebélê le.

¹⁸ Tendo gel nmò ye yóm Kehligal bè Kken ye yóm Mambang Laen Dù Bulung Henoken, hol lómón yóm deng hlolou kuy. Hitu kdaw ye mken du yóm mambang laen dù bulung henoken bè yóm bulón Abib abay se yó se yóm bulón tehe ktebel ye yóm benwu Idyip.

¹⁹ Ket ngà ye logi twogu dou funen. Ne ket ngaen logi twogu yó kem safì ye ne yó kem ubiha ye dou funen.

²⁰ Kkólen bè yóm logi twogu bè yó kem kudà asnu ye dou funen. Okóm yóm ngà logi asnu ye yó, bud nsok ye béléu ngà ubiha. Ke là móyô ye msok du, tódô tenfok ye liholen. Yó kem ngà ye logi twogu, hol nsok ye lu béléu. Béen abay wen tau mógów ebéléu ke laen dù nwiten mò blayen do.

²¹ Wen nem kdaw ye mò du yóm kuy nmò. Okóm yóm ghituhen kdaw hol bê ye abay mò nmò, baluen ke bang kdaw ye dmadu duhen ke bang kdaw ye muta.

²² Tendo gel nmò ye yóm Kehligal bè Kuta bè yóm kbut ye muta halay ye. Ne nmò ye se yóm Kehligal ye nô bè Slung bè yóm gel kestifun ye yóm tbas ye bè yóm hol són kuta ye.

²³ Bè yóm sfalay, tlu dulék le mógów ebéléu yó kem logi bélê ye na le e tmaba ebéléu, yakà ou du yóm sana kul Dwata hol gónó mogot yó kem tau Israél.

²⁴ Ou se angat hdó kul yóm kdéen tau bè yóm benwu deng fasadu kuy ne bud ou se angat hlamang du yóm benwu ye yó. Kogolen bè yó, laen kô dù tau mundug du yóm benwu ye bè yóm igò le mógów ebéléu tlu dulék sfalay yó kem logi bélê ye na a tmaba ebéléu.

²⁵ Bê ye abay hmung bè yóm ógóf gel dsù ye ebéléu yóm mambang wen bulung henoken. Béen abay wen tebel ye du kól hlafus yóm utón deng dsù ye ebéléu bè yóm Kehligal ye bè yóm Kdaw Khius.

²⁶ Tódô ket halay ye mit du ebè Gónô Dwata yóm tanay nuta ye. Bê ye tnógó bè él tutù yéen yóm ngà ubiha duhen ke yóm ngà kambing.”

²⁷ Yó mon Dwata mò ke Musis, “Snulatem ni kem udél ni abay se lemwót bè ni kem hlolou kuy ni gónón mbut yóm deng kesfasad tekuy kem tau Israél.”

²⁸ Botong fat folò buteng yóm knô Musis bè yó bè Dwata ne là kóen mken bè yóm knóen bè yó ne là se kóen minum. Gotu snulaten bè yó kem botu kufil yó kem sfolò hlau Dwata kul bè yóm kesfasad le. Yó kem hlau yó, deng fasad yó kem tau Israél ke Dwata yóm kimón le du.

Kosol Musis gu ta yóm Bulul Sinay

²⁹ Bè yóm kosol Musis gu ta yóm Bulul Sinay nwiten yóm Sfolò Hlau Dwata. Tódô sminang lem uyóhen lemwót bè yóm deng kestulónen ke Dwata okóm là kô tngónen du yóm keslinang lem uyóhen yó.Timbow temngel ebè Musis Aron ne kdê yó kem tau, ton le tódô sminang lem uyóhen ne deng le mom likò hloni ebéléen.

³⁰ Timbow temngel ebè Musis Aron ne kdê yó kem tau, ton le tódô sminang lem uyóhen ne deng le mom likò hloni ebéléen.

³¹ Okóm tnaba Musis lu ne gotu le mógów ebéléen le Aron ne kdê yó kem gel malak kul snéen, omin Musis mudél ebélê le.

³² Kogolen bè yó, gotu le stifun klohok Musis yóm kdéen tau Israél ne tulón Musis kul yó kem hlau deng tulón Dwata du ditu ta Bulul Sinay.

³³ Timbow deng kudél Musis ebélê le ominen mseng du nes uyóhen.

³⁴ Ke gel mógów elem Gónô Dwata nan e stulón du, sal gel kóhen yóm nes sengen bè uyóhen yó. Ke deng hewà, gotu tulónen yó kem tau Israél yóm htulón Dwata du

³⁵ ne gel ton yó kem tau yóm keslinang lem uyóhen. Ominen yó bud mseng du nes efet le bud stulón Dwata. Là gomongen bè nili yóm bérs 1 efet kól bè bérs 29. Hono hlolò Dwata kul bè yóm Kdaw Kehegnô ne yó kem mò blay le mò ngom yóm kun Gónô Dwata.