Kehewà 33 - Udél Dwata: Gna Kesfasad ne Lomi Kesfasad

Kdók Dwata kul tmagak yóm Bulul Sinay

¹ Sotu kdaw, yó bud mon Dwata mò ke Musis, “Tnagakem ne nim benwu ni, nwitem yó kem tau deng nitem hewà gu bè Idyip, hlós ye ebè yóm benwu deng tehe fasadu ke Abraham ne Isak ne Jakub ne yó kem lugod le.

² Wen hógówu gu bè longit mò tukô gna kuy. Ou se angat hdó kul yó kem tau bè yóm benwu yó, yó kem tau Kananayt ne yó kem tau Amurayt ne yó kem tau Hitayt ne yó kem tau Pirisayt ne yó kem tau Hibayt ne yó kem tau Jibusayt.

³ Yóm benwu gónó ye e solu ni, tey hyu tonoken ne tey mabù huluhen. Okóm là munge kuy dou, abay se tey mgel kulu ye ne déke mom genlau yu bè lan.”

⁴ Timbow gungol yó kem tau nim udél Dwata ni ya tey sidek kegnóm le du. Là bud leket le du yó kem ngom blówón le.

⁵ Yó gónó le mò du yóm yó, lemwót bè yóm udél Dwata ebélê le hlanen bè Musis, yóm monen, “Tey mgel kulu ye. Ke bude mung kuy baluen ke olon tek likót, ngem kà gotu genlau kuy. Lenkas ye ne yó kem ngom blówón ye efet deng tngónu yóm angat nmou bélê ye.”

⁶ Tahu se, bè yóm ktagak le du yóm Bulul Sinay, là bud leket kem tau Israél du ne yó kem ngom blówón le.

Yóm gónô, gónó Dwata nô lem blóng le

⁷ Balù kihu gónó le kmamfù yó kem tau Israél, eles tendo nwit Musis se kun yóm Gónô Dwata gel nit mógów. Sal gel hdaen bè lewà yóm kamfù le bede malù mayuk bélê le. Yó boluy le du yóm gónô yó, Gónô gónó Dwata nô lem blóng le. Kihu tau móyô temngón du yóm kun kóyô Dwata gel mógów e du nim Gónô ni.

⁸ Ke gel mógów edu Musis, yó nmò yó kem tau mdà le bè bak dól yóm kul gónô nô, tenngel le Musis efet husek elemen.

⁹ Ke deng husek elemen Musis, wen lobun lememek ta yóm bak dól yóm Gónô Dwata yó, yóm lobun tmahà gel tukô gna kul. Ne gu lem yóm lobun yó gónó Dwata mudél ebè Musis.

¹⁰ Ke ton yó kem tau Israél yóm lobun nô bè bak dól yóm Gónô Dwata yó gotu le mtud bukol smolu e du.

¹¹ Bè yóm gel kestulón le Dwata ne Musis, tódô le suyó lómón ke stulón yóm tau swè. Ke deng deng kestulón le, omin Musis mulék ebè kamfù le, fen tebel bè Gónô Dwata yóm tau lomi lemnok tóbóng lówóhen boluyen Juswa ngà Nun.

Kfasad Dwata du yóm tendo kmungen bè yó kem tauhen

¹² Bè yóm ktulón Dwata ke Musis yóm là bud kmungen kul, yó mon Musis mò ke Dwata, “Tahu se yóm tehe kdókem dou anì nitu lu ebè yóm benwu fasadem kul ni kem tau ni, okóm là tulónem du dou ke tau du mung dou. Deng monem tey tilob ketngónem do ne tey kehyu nawahem ebéléu.

¹³ Ke hyu se nawam ebéléu tulónem dou sen yóm atulem anì hol temnù yóm ketngónu kóm ne henlósu mò du yóm gónón hyu nawam ebéléu. Béem klifót snéen, deng nélékem ni kem tau ni mò hol kóm.”

¹⁴ Mon Dwata se, “Yó ne bude mung kuy ne bud tendo gel hegmou yu.”

¹⁵ Mon Musis, “Ke là mungi kum, béem htagak kum nim benwu ni.

¹⁶ Tô kmò ketngón kem tau du se yóm tey kehyu nawam ebè yó kem tauhem ne ebéléu ke là mungi kum? Lemwót bè yóm kmungem kum gónó me stólóng bè kdéen tau te tonok.”

¹⁷ Mon Dwata mò ke Musis, “Lemwót bè yóm tey tilob ketngónu kóm ne kehyu nawahu ebéléem, nmou yóm hnihem béléu yó.”

¹⁸ Omin Musis mon du, “Ke yó dum hyu béléem nam hol hegfan béléu kun yóm tey keslinangem.”

¹⁹ Mon Dwata se, “Hotu hiwesu bè soluhem yóm tey klinggelu ne heglalagu bè soluhem yóm dou boluy, yakà ou du se yóm sana Dwata hol gónó mogot. Tendo gel hegfanu bè yó kem tau deng néléku yóm tey kkoduhu kul.

²⁰ Là htonu du kóm yóm uyóhu abay se laen dù deng tau mton do ke bud mowil.

²¹ Okóm bè ni klohoku wen gónóhem mdà te botu.

²² Ke hiwesu béléem yóm tey layag sminang gu béléu, suu uu lem yóm gónón meskang nim botu ni, sefengu kóm henmuu efete miwes.

²³ Ominu yó mkó yóm henmuu ne són kwangu angat tonem, là yóm uyóhu.”