Kehewà 32 - Udél Dwata: Gna Kesfasad ne Lomi Kesfasad

Yóm ngà safì lennged nmò le gu bè blówón

¹ Timbow ton yó kem tau Israél yóm là géhél kosol Musis gu ta yóm bulul gotu le stifun klohok Aron, mon le mò du, “Là kô tngón me du ke tedu gefet bè Musis yóm tau mit tekuy hewà gu bè Idyip. Yó hyu ke moi bélê me yó kem dwata lennged mò malak tekuy.”

² Mon Aron se mò kul, monen, “Lenkas ye yó kem blówón tdé yehen ye ne kem ngà ye logi ne kem ngà ye libun ne nwit ye edini béléu.”

³ Tahu se, gotu lenkas yó kem tau yó kem blówón tdé le ne nwit le ebè Aron.

⁴ Omin Aron ma kul ne hnoen. Ominen temwél du ngà safì tudu blówón. Ne yó mon yó kem tau, “Ó kem tau Israél, ni se yóm dwata lennged tekuy, yóm deng hewà tekuy gu bè Idyip.”

⁵ Tikóng ton Aron nim nmò le ni, ominen semsodò botu bè solu yóm ngà safì blówón yó mò gónón demsù ne yó heglalagen, monen, “Haya mò tekuy ken mò gónó tekuy dmóyón, yóm sana kum Dwata hol gónó mogot.”

⁶ Timbow hol hlafus bè yó, wen kem ógóf nwit le mò dsù hkekeb le ebè Dwata ne wen kem dumu nwit le mò ken le bè yóm kessotu nawa le. Tikóng deng deng yóm kedsù le, omin le gotu stifun mken ne omin le gotu hlengel ne hbusaw mò samuk.

⁷ Ne ditu ta yóm bulul bud mudél ebè Musis Dwata, monen, “Géhéli mosol, Musis, abay se yó kem tau nalakem gu bè Idyip, deng le gemsalà ne deng kenbê le o.

⁸ Deng sana tebel le yóm lan hlolou kul ne deng wen ngà safì tudu tenwél le gu bè blówón ne tmaba le ebéléen ne demsù le ebéléen. Yó mon le, mò dwata lennged le kun, yóm mit kul hewà gu bè Idyip.

⁹ Deng tngónu tey mgel kulu le ni kem tau ni.

¹⁰ Ne ni béem henseng o, tey kebutu kul ne gotu genlau lu. Ne yó tles nmou angat tey kehbólu kóm ne yó kem angat semfu gu béléem. Nmou yu sotu bung tau alì mbegel.”

¹¹ Okóm tey kehkodu Musis bè Dwata yóm hol gónón mogot, monen mò du, “Ó Dwata, moen du ke alì gedlug kebutem kul yó kem tauhem deng hewaem gu bè Idyip? Yóm kegewà le yó mlan bè yóm alì kegbekem ne tey kgisem.

¹² Kmoen se ke mon yó kem tau Idyip, yó gónóhem mit kul hewà gu bè Idyip yó kem tauhem anì nam e hnatay lu lem bulul ne anì gotu sulék genlaem lu? Tongem yó ne lembut, tenlesem hendemem, béem tô hegfà yó kem tauhem yóm gfà monem yó.

¹³ Hendemem dé yóm tehe fasad mget nmoem bè yó kem tau tehe tóbóng lówóhem ekni le Abraham ne Isak ne Jakub. Yó tehe fasadem kul, laen dù tul sónen yóm keblayem kul ból lómó kwen le blotik bè longit ne yóm angat keblayem du bè yó kem ból le yóm tonok mò hlós nfun le.”

¹⁴ Tahu se, tenles Dwata hendemen, là dog dohò genlaen kul yó kem tauhen.

¹⁵ Omin Musis mulék mosol gu ta yóm bulul, nwiten yóm lewu botu kufil sbalà snulat du yó kem hlau Dwata.

¹⁶ Dwata se hol mò du nim botu kufil ni ne hol du smulat du yó kem hlauhen nô du.

¹⁷ Bè yóm igò le Musis ne Juswa tolo mosol, gungol Juswa se yóm tey hensag yó kem tau ne yó monen mò ke Musis, “Wen tey hensag tau sgida gungolu bè kamfù.”

¹⁸ Mon Musis se, “Sundu hensag tau matù du yóm hensag yó ne sundu se langat tau fedi du. Tódô udél kem tau semngal.”

¹⁹ Timbow deng moni bè kamfù le Musis, tódô tonen se yóm ngà safì tudu ne tonen se yó kem tau madal. Ya tey sidek kebuten. Bè yó bè but yóm bulul tódô tudaen yóm botu kufil nwiten ne gotu meskang.

²⁰ Tódô nwahen yóm ngà safì tudu nmò le, gotu hnoen ne gotu heblibuen, ominen mbol du él ne gotu hinumen yó kem tau Israél.

²¹ Monen mò ke Aron, “Tedu deng nmò le béléem ni kem tau ni? Moen ke hmoem kul nim tey salà bong ni?”

²² Mon Aron se, “Béem tô lenbut ou, deng tngónem se yóm hónô kmò le sidek ni kem tau ni.

²³ Yó mon le mò do, ‘Là kô tngón me du ke tedu deng gefet bè Musis yóm tau mit kum hewà gu bè Idyip. Yó hyu ke moi bélê me dwata lennged mò malak kum.’

²⁴ Yó gónóhu mni bélê le ngom. Tahu se, gotu lenkas le yó kem ngom blówón le ne blay le do. Ominu gotu mbot kul elem ofi ne yó gónón e baling ngà safì tudu.”

²⁵ Ton Musis yóm là kegbek Aron mit kul yó kem tau ne deng mom henyak le knô le lem blóng yó kem hohon le,

²⁶ yó gónó Musis mdà bè bak tikeb yóm kamfù le ne hetê, monen, “Yó kem tau gfi bè yóm sana kum Dwata hol gónó mogot, mógów ye edini béléu.” Tahu se, kdê yó kem tau semfu gu bè Libay gotu le stifun e klohoken.

²⁷ Ne yó monen mò kul, “Yóm sana Dwata yó kem tau Israél fen mdók kuy mò du nim monu mò kuy ni, yóm Dwata hol gónó mogot. Lumak ye sudeng ye yóm ket kuy na sotu, mógów ye bè klamangen nim kamfù ni, lenwót ye bè bak nim tikeb ni kól bè yóm bak tikeb bè dolin gotu hnatay ye yó kem logi mò samuk, kihu ke dumu ye setwoli duhen ke kem wè ye ne ke kem dumu ye sebét.”

²⁸ Tahu se, nimón yó kem tau semfu gu bè yóm tehe Libay yóm dók Musis kul yó, wen dô tlu libu tau hnatay le bè yóm kdaw yó.

²⁹ Yó mon Musis mò kul, “Bè nim kdaw ni, deng hetfing Dwata yu mò kem tau gel blóng ebéléen lan ye hmatay yó kem ngà logi bélê ye ne yó kem dumu ye setwoli logi. Lemwót bè yóm kimón ye ke Dwata ni, yó se gónón mò kuy mò blóng tau ebéléen.”

³⁰ Hayahen bè yó, yó mon Musis bè yó kem tau, “Tey gedlug ksideken yóm salà nmò ye. Okóm ni naw bud mneged eta bulul bè Dwata, nénég ke wen lanu hkodu bè Dwata anì hnifóten yu bè yóm tey salà ye ni.”

³¹ Tahu se, bud semfulék eta bulul Musis bè Dwata, ne monen mò du, “Tey, Dwata, deng gedlug ksideken yóm salà nmò le ni kem tau ni. Deng wen dwata lennged nmò le lemwót bè blówón ne tmaba le ebéléen.

³² Ke yóm hyu béléem hol hnifótem lu. Okóm ke là móyói hmifót kul, tódô kóhem yóm dou boluy deng snulatem bè yóm bok gónóhem smulat boluy yó kem tauhem.”

³³ Bnalà Dwata se, monen, “Là. Yóm tau gemsalà béléu, kun boluy yóm kóhu bè dou bok.

³⁴ Lemwóti ne, nalakem yó kem tau ebè yóm benwu deng tulónu kóm. Hentulónem nawa wen hógówu gu bè longit mò tukô gna kóm. Okóm angat kól yóm kdawu tmafak kul ni kem tau ni lemwót bè yóm salà deng nmò le.”

³⁵ Tahu se, wen des hwit Dwata ebè yó kem tau yó lemwót bè kubug le ke Aron mò yóm ngà safì tudu nmò le gu bè tahu blówón.