Kehewà 24 - Udél Dwata: Gna Kesfasad ne Lomi Kesfasad

Litô mò hol hemget du yóm fasad le ke Dwata yó kem tau Israél

¹ Yó mon Dwata mò ke Musis ditu ta bulul, “Nangayem Aron ne Nadab ne Abihu ne hitu folò bè yó kem tuha gel malak yó kem tau Israél, mneged ye edini béléu eta bulul. Bê yóm igò ye tolo mayuk béléu mtud ye bukol ne tmaba ye ebéléu.

² Tek són uu, Musis, hloni ebéléu, là yó kem dumuhem. Ne yó kem dumu tau nô bè but bulul, hol bê le abay mneged.”

³ Tahu se. Lemwót mosol Musis, gotu tulónen yóm kdê tau yó kem hlau Dwata kul ne yóm kdê hloloen kul. Ne yó balà le ke Musis yó kem tau, mon le, “Tódô nmò me yóm kdê deng mon Dwata mò kum.”

⁴ Gotu snulat Musis yó kem kdê hlau Dwata. Hol hlafus hayahen bè yó, wen botu sensodoen mò gónó le demsù ebè Dwata bè yó bè but yóm bulul. Bud wen sfolò lewu botu tmahà hdaen hilolen, ket sotu botu bè ket ból yóm sfolò lewu kem ngà logi yóm tehe Israél.

⁵ Ne dóken yó kem logi lomi lemnok na a ma yó kem safì logi lemnok mò dsù le. Wen se dsù mò hekekeb le ebè Dwata ne wen se dsù mò ken le gónó le dmóyón ke Dwata.

⁶ Nwa Musis yóm litô yó kem safì yó, sóól suen lem yó kem tukung ne yóm sóólen gotu hetsiken ebè yóm gónô demsù deng hdaen.

⁷ Ominen ma yóm bok gónóhen smulat du yóm deng senfasad le Dwata yó kem tau, ne gónóhen nô yó kem hlau Dwata kul ne hgelen udélen semfala du bè yó kem tau. Ne yó fasad le ke Dwata yó kem tau, mon le, “Nimón me yóm sana kum Dwata hol gónó mogot ne gotu nmò me yóm deng hlauhen kum.”

⁸ Omin Musis ma yóm litô nô lem yó kem tukung ne hetsiken ebè yó kem tau. Yó monen, “Ni se yóm litô mò hemget du yóm deng kesfasad ye Dwata bè yóm deng keblayen du kuy yóm kdê hlauhen kuy.”

⁹ Omin Musis ne Aron ne Nadab ne Abihu ne hitu folò bè yó kem gel malak yó kem tau Israél mneged eta yóm bulul yó

¹⁰ ne bè yó ton le yóm kul Dwata yó kem tau Israél. Yóm gónóhen mdà tey sminang, lómón kenawen longit bede tey mtataw.

¹¹ Balù yóm deng tódô kton le ke Dwata yó kem tuha gel malak yó, là kô hensideken kul. Tódô ton le Dwata, omin le seyón mken bè yó ne ninum le yóm kul gel ninum.

Knô Musis ta Bulul Sinay

¹² Sotu kdaw, yó bud mon Dwata mò ke Musis, “Budi mneged edini béléu ta bulul, nahem na legen bè ni. Bè yóm igoem nô bè ni wen lewu botu kufil blayu kóm, botu gónóhu deng smulat yó kem hlolou yó kem tau Israél.”

¹³ Tahu se, omin le htifes le Musis ne Juswa yóm tau tóbóng lówóhen, mneged le eta yóm bulul Dwata yó.

¹⁴ Gu laan le là deng lemwót, yó mon Musis bè yó kem tuha malak, “Nangat ye mi bè ni bè kamfù efet me bud kól. Tebel bélê ye bè ni Aron ne Hur. Ke wen gónó le là segtud yó kem tau mógów le ebélê le.”

¹⁵ Omin le Musis mneged eta yóm Bulul Sinay ne wen lobun lememek eta tfusuen.

^16-17 Mnaul elaan ta tfusù yóm bulul yó yóm tey layag Dwata tódô sminang. Bè kton yó kem tau Israél du yóm layag yó lómón kmoen lómón yóm ofi lemtom nô ta tfusù bulul. Botong nem kdawen tendo lemobun ta yóm bulul yó ne bè yóm ghituhen kdaw tnaba Dwata Musis gu lem yóm lobun yó.

¹⁸ Omin Musis bud mneged ne tódô husek elem yóm lobun. Botong fat folò butengen nô ditu lemen. Là gomongen bè nili tsaptér 25 efet kól bè tsaptér 30. Hono hlolò Dwata ke Musis bè yóm tehe khuseken elem tum lobun ditu ta tfusù bulul gónó Dwata nô. Yó hlolò Dwata du, yóm kmò kehdà le du yóm kun Gónô ne mò kmò le du yó kem ngom nô lemen. Tulónen snéen yóm kul kmò knes yó kem tau gel blóng le ebè Dwata ne yóm kmò kehetfing le kul ebè Dwata.