Kehewà 23 - Udél Dwata: Gna Kesfasad ne Lomi Kesfasad

Yóm fasad Dwata kul ne yóm bud hloloen kul

²⁰ Bè yóm knô Musis bè Dwata ditu ta bulul, wen udél htulón Dwata ke Musis bè yó kem tau Israél, monen, “Ngem, bè yóm kógów ye ebè yóm benwu Kanan deng hentifesu mò kuy, angat wen hógówu gu bè longit mò eles tukô gna kuy mò mofin kuy bè lan ne mò mit kuy etu.

²¹ Hol hnungol ye yóm hógówu tukô gna kuy yó ne hol nimón ye. Hol bê ye abay tô natù, yakà dou boluy du yóm nwiten. Là kô hnifóten du yóm tau tô matù du.

²² Okóm ke hol hnungol ye yóm gel monen ne ke hol nmò ye yóm hmou kuy, ou he fen hmohon yó kem hohon ye ne senfatayu yó kem gel semfatay kuy.

²³ Yóm hógówu gu bè longit eles tukô gna kuy ne nwiten yu ebè yóm benwu gónó le nô yó kem tau Amurayt ne yó kem tau Hitayt ne yó kem tau Pirisayt ne yó kem tau Kananayt ne yó kem tau Hibayt ne yó kem tau Jibusayt. Ne yó angat nmou bélê le ni kem tau ni angat gotu genlau lu.

²⁴ Hol bê ye abay mtud bukol bè kul dwata lennged ne hol bê ye abay gbót tmaba ebélê le ne hol bê ye abay lolò yóm kul gel hlolò bè yóm ktaba le ebélê le. Yó hmou kuy, gotu genbà ye yó kem dwata kéng gel nmò le ne gotu hnugón ye yó kem hehek botu gónó le gel tmaba ebélê le.

²⁵ Són ou yóm gónó ye e tmaba, yóm sana kuy Dwata hol gónó mogot. Ke ni se nmò ye, wen gónóhu tmóbóng kuy anì tendo wen ken ye ne tendo wen él ye. Ne hlayuku bélê ye yó kem des.

²⁶ Ke deng ye kól du yóm benwu blayu kuy yó, kdéen libun bélê ye gotu mngà, laen dù bélê le ke gamà ne laen se dù atil. Ne laen se dù tau bélê ye ke ukol towoken.

²⁷ Yó kem tau angat mit kuy sfatay gu laan ye là deng gdofì bélê le, eles benlayu lu yóm ksidek klikò le dou. Angat hesbewegu kehedem le ne tódô gotu hlóyu lu.

²⁸ Yó kmou kul yó kem hohon ye yó, lómón ke wen tey yê nuhag hógówu tukô gna kuy mò mékét kul ne mò mlo kul yó kem tau Hibayt ne yó kem tau Kananayt ne yó kem tau Hitayt.

²⁹ Okóm là tagad sulék lohu kul bè yóm sotu halay, abay se là dengen kóyów he yó kem kuy lówó menwu tahen. Ke laen dù tau fen menwu tahen, déke mból yó kem ógóf lóbô lem bnes ne hensidek le yu.

³⁰ Okóm yó kmou kul yó kem hohon ye yó, ninut lohu lu efet ye deng mból mò nô ta yóm benwu yó.

³¹ Yó kililen yóm benwu blayu kuy yó, lenwóten bè Mohin Hulô efet kól ebè yóm Mohin Miditiranyan ne bud lenwóten bè yóm benwu laen hol wen tauhen efet kól etu bè Él Yufratis. Ke sok bang ye mundug kul yó kem tau menwu bè yó, gotu blayu lu elem tdok ye ne tódô gotu lo ye lu.

³² Hol bê ye abay mit sbilà bélê le, dalang se bè yó kem kul dwata lennged.

³³ Hol bê ye abay hbenwu lem blóng ye yó kem tau yó. Ke henmóyô ye lu, gemsalà ye béléu lan le mit kuy hlayuk béléu. Ke gbót ye tmaba ebè yó kem kul dwata kéng, yó se gónó ye gholot.”