Kehewà 20 - Udél Dwata: Gna Kesfasad ne Lomi Kesfasad

Yó kem sfolò hlau Dwata

¹ Omin Dwata mudél ebè yó kem tau, monen,

² “Ou se yóm sana kuy Dwata hol gónó mogot, yóm deng hewà kuy gu bè Idyip bè yóm benwu gónó ye tehe ghesek.

³ Bê ye abay tmaba ebè yó kem dumu dwata lennged, són ou.

⁴ Bê ye abay mò yó kem dwata lennged lemwót bè yóm gel ton ye gu bè longit duhen ke gu te tonok duhen ke gu lem él laan tonok.

⁵ Bê ye abay mtud bukol bè yóm dwata lenbù, duhen ke tmaba ebéléen abay se ou yóm sana kuy Dwata hol gónó ye mogot. Tey sidek kélés nawahu du ke wen dumu dwata gónó ye tmaba. Tnafaku yó kem tau kembê do, gomong megtafak snéen yóm tanay lugod le efet kól bè gfaten.Okóm bè yó kem tau kembong nawa do ne mimón yó kem dou hlau, hegfanu bélê le yóm tey nawahu kul efet kól bè hilu libu bud lugod le.

⁶ Okóm bè yó kem tau kembong nawa do ne mimón yó kem dou hlau, hegfanu bélê le yóm tey nawahu kul efet kól bè hilu libu bud lugod le.

⁷ Bê ye tódô óyô moluy du yóm dou boluy. Yakà ou du yóm sana kuy Dwata hol gónó ye mogot. Tnafaku yóm tau tódô faen moluy du yóm dou boluy.

⁸ Hol hetfing ye yóm Kdaw Kehegnô ne hol béen abay wen nulé ye bè yó kem hlolou kuy bè yóm kdaw yó.

⁹ Wen nem kdaw ye mò du yóm kuy nmò

¹⁰ okóm yóm kdaw ghituhen yó se yóm Kdaw Kehegnô hetfing ye ebéléu. Bè yóm kdaw yó, béen abay wen bélê ye mò nmò, balù uu ne yó kem ngaem ne yó kem hesekem ne yó kem ógófem, duhen ke kem tau milo nô bè yóm kuy benwu, hol bê le abay mò nmò.

¹¹ Nem kdawu mò du yóm tonok ne longit ne mohin ne yó kem kdê nô lemen. Okóm bè yóm ghituhen kdaw, hegnóe. Yó gónóm mon, htólóngu yóm Kdaw Kehegnô mò dou.

¹² Hol nadat ye mà ye ne yê ye anì tahà ktau ye ta yóm tonok blayu kuy.

¹³ Bê ye abay monok.

¹⁴ Bê ye abay mdà yehen.

¹⁵ Bê ye abay mnagaw.

¹⁶ Bê ye abay tnifù kéng kem dumu ye.

¹⁷ Hol bê ye abay nófô gónô kedumu ye. Bê ye abay nófô yehenen duhen ke kem heseken duhen ke kem safien duhen ke kem kudaen duhen ke yó kem dumu nfunen.” Yó se yóm sfolò hlolò Dwata yó kem tauhen.

Klikò kem tau

¹⁸ Timbow gungol yó kem tau yóm tey lungkul leték ne yóm tey uni féw bong ne ton le se yóm silà ne kebel gu bè yóm bulul yó, tey sidek klikò le, botong setbol kkel le, botong le mdà hlayuk.

¹⁹ Yó mon le mò ke Musis, “Ke uu mudél ebélê me hnungol me. Okóm ke Dwata, likò me déke matay me.”

²⁰ Mon Musis se mò kul, “Bê ye abay hlikò. Yó gónó Dwata hegfan bélê ye nan e tnilów yu. Ne lemwót bè yóm klikò ye ke Dwata, yó gónón wen klikò ye mò salà.”

²¹ Okóm yó kem tau mom henlel le mdà hlayuk. Tek són Musis hloni ebè yóm lobun hitem gónó Dwata nô. Là gomongen bè nili tsaptér 20:22 efet kól bè tsaptér 23:19. Tulónen yó kem hlolò Dwata kul bè yóm kmò le du bè botu yóm gónó le gel demsù ebè Dwata ne bè yóm kmò kwit le kukum ne bè yóm kmò ktaba le ebè Dwata.