Kehewà 17 - Udél Dwata: Gna Kesfasad ne Lomi Kesfasad

Yóm él hesut gu lem botu

¹ Tódô kdê yó kem tau Israél gotu tnagak le yóm benwu laen hol wen tauhen boluyen Sin. Ngang le mógów efet tey dê benwu lan le, tódô lolò le yóm hlan Dwata kul. Bè yóm kógów le yó na le kmamfù bè Rifidim, okóm bè yóm benwu yó laen dù él mò ninum bè yó.

² Gotu le tmalaw ebè Musis yó kem tau, mon le mò du, “Hol benlayem mi él mò ninum me.” Mon Musis se mò kul, “Moen de ke sónmò ye tmalaw? Moen de ke mom tô tnilów ye Dwata?”

³ Okóm yó kem tau tey kleeng le, tódô henlós le tendo mò du yóm tmalaw ebè Musis. Yó mon le, “Moen de ke tehe nwitem mi gu bè Idyip? Ilóem tô hnatayem mi ne yó kem ngà me ne yó kem ógóf me bè kleeng?”

⁴ Tódô kem hotu Musis nawahen mni bè Dwata, yó monen, “Ó DWATA, tedum tô nmou bélê le du ni kem tau ni? Móyón sentudà le ou botu mò hatay le dou.”

⁵ Ne yó mon Dwata mò ke Musis, “Ni nmoem, miti bè yó kem gel malak yó kem tau Israél mógów ye tukô gna yó kem tau. Nwitem yóm tuged tehe fesem bè él Nayl.

⁶ Gnahe bélê ye ditu bè Bulul Sinay, tódóe mdà bè yó te botu. Nfesem yóm botu yó, tódô wen él msut gu du mò ninum yó kem tau.” Tahu se, nmò Musis nim ni bè solu yó kem tau gel malak yó kem tau Israél.

⁷ Yó hlós boluy le du yóm benwu yó Masa ne Miriba abay se sónmò le tmalaw yó kem tau ne tnilów le Dwata yóm kmon le du, “Nô bélê tekuy Dwata kô ni, duhen ke là?”

Kundug yó kem tau Amélék yó kem tau Israél

⁸ Omin le sut bè Rifidim yó kem tau Amélék na le e nundug yó kem tau Israél.

⁹ Mon Musis mò ke Juswa, “Méléki tau mò dumuhem mit sfatay bè yó kem tau Amélék ke haya. Ne lemwót dou, mdae te bulul nogotu yóm tuged hwit Dwata dou.”

¹⁰ Tahu se, nmò Juswa yóm deng mon Musis mò du. Hayahen bè yó lemwót nan e mit sfatay bè yó kem tau Amélék. Lemwót kul le Musis ne Aron ne Hur mneged le eta tfusù yóm bulul.

¹¹ Yóm igò Musis hdà du eta sigelen mung du kogoten du yóm tugeden botong le gemmò yó kem tau Israél. Okóm ke hloyolen elaan sigelen fen gemmò yó kem tau Amélék.

¹² Timbow deng des sigel Musis ma le béléen botu le Aron ne Hur mò gónón myón ne mdà le klohoken, sotu bè kwananen ne sotu bè iwóngen sensogot le eta sigelen efet sdef kdaw.

¹³ Lemwót bè nim nmò le ni, yó gónó Juswa gotu gemlà yó kem tau Amélék.

¹⁴ Omin Dwata mon du mò ke Musis, “Snulatem bè bok nim kegmò ye ni anì là klifót ye du. Tulónem ke Juswa angat gotu genlau yó kem tau Amélék.”

¹⁵ Ne wen botu sensodò Musis mò gónón demsù ne yó boluyen du, “Yóm sana kum Dwata hol gónó mogot fen hegmò kum.”

¹⁶ Ne yó udélen, monen, “Hdà ye eta yóm flag Dwata mò ilô yóm deng kegmoen. Dwata he hlós mit sfatay bè yó kem tau Amélék bè ket bud lugod le.”