Kehewà 16 - Udél Dwata: Gna Kesfasad ne Lomi Kesfasad

Yóm ken boluyen mana, ne yó kem holò

¹ Omin le bud lemwót bè yó bè Ilim yó kem tau Israél. Bè yóm gesfoloen limu kdaw bè yóm gewuhen bulón kogol yóm kehewà le gu bè Idyip, gefet le bè yóm benwu laen hol wen tauhen boluyen Sin. Yóm benwu yó nô bè gónón sóól Ilim ne Sinay.

² Bè yó bè yóm benwu laen hol wen tauhen gotu le tmalaw ebè le Musis ne Aron yó kem tau,

³ yó mon le mò kul, “Mom hyu he ke tódô tehe hnatay Dwata mi ditu bè Idyip. Tey gengón ken me ditu. Okóm kuy, deng mom nwit ye mi ebè nim benwu laen hol wen tauhen nii anì gotu me matay lemnus bè ni.”

⁴ Omin Dwata mon du mò ke Musis, “Wen ken hkulónu gu bè longit mò ken yóm kdê ye. Lemwót yó kem tau, ket kdaw le hewà na le e ma mò ken le bede olon sfeng bè sendaw yóm gel nwa le. Bè nim hlolou kul ni gónóhu tmilów kul ke glolò le yóm hlolou kul.

⁵ Okóm bè yóm gnemen kdaw, hyu ke sfeng bè lewu kdaw yóm nwa le ne eles hentifes le mò ken le bè yóm ghituhen kdaw.”

⁶ Tahu se, tulón Musis ne Aron bè yó kem tau Israél nim ni, mon le mò kul, “Bè nim móyón kkifuhen ni, tódô tngón ye yóm sana kuy Dwata hol gónó mogot, yóm deng hewà kuy gu bè Idyip.

⁷ Hlafus haya ton ye yóm tey layag Dwata tódô sminang. Deng gotu gungolen ne yóm ktalaw ye ebéléen. Bè ktahuhen, du yóm gónó ye e tmalaw abay se olo me tau mò du yóm gel hloloen kum yó dum kum.”

⁸ Omin Musis bud mon du mò kul, “Dwata se bemlay kuy utón bè yóm móyón kkifuhen ni kdeng ne hlafus haya wen mò ken ye balù nô kbongen yóm kuy nóyô abay se deng gungolen yóm alì ktalaw ye ebéléen. Bè yóm gel ktalaw ye bélê me, kaem bè Dwata se yóm gónó ye e tmalaw.”

⁹ Yó mon Musis mò ke Aron, “Tulónem yóm kdéen tau Israél, gotu le mógów edini na le e mdà bè solu Dwata abay se deng gotu gungolen yó kem gel ktalaw le.”

¹⁰ Tahu se, gotu sentifun Aron lu yóm kdê le. Bè yóm igoen tolo mudél ebélê le, gotu le temngel ebè yóm benwu laen hol wen tauhen ne tódô henmung ton le yóm tey layag Dwata mung bè yóm lobun tódô sminang.

¹¹ Yó udél Dwata ebè Musis, monen,

¹² “Deng gungolu yóm alì ktalaw yó kem tau Israél. Tulónem kul bè nim móyón kkifuhen ni kdeng wen utón mò utón le. Ne hlafus haya wen mò ken le balù nô kbong kul kóyô. Bè nim nmou bélê le ni gónó le temngón du ou se yóm sana kul Dwata hol gónó mogot.”

¹³ Timbow móyón kifu bè yó ya tey holò wen msut, senbung ndef le yóm klamang kamfù le. Ne bè kehlafusen bè yó ya tey amù lemibut yóm kamfù le.

¹⁴ Tikóng mnò yóm amù yó tódô wen ton le lómón ke bulók kulón bede lufi, tódô nô talak yóm tonok bè yóm benwu laen hol wen tauhen yó.

¹⁵ Bè yóm kton le du yó kem tau Israél, là kô tngón le du ke tedu yóm yó ne gotu le ssólók, mon le, “Tedum ni?” Mon Musis se mò kul, “Ni se yóm ken blay Dwata kuy mò ken ye.

¹⁶ Yó mon Dwata, ket kmuleng ma yóm wen mu le du, sotu tukung bong bè ket tau nô lem gónô.”

¹⁷ Tahu se, gotu le ma yó kem tau Israél. Wen se tau malù bong kun nwa, wen se tau udì kun.

¹⁸ Timbow bentes le, yóm tau bong yóm kun nwa là kóen glukas ne yóm tau udì nwahen bud tódô kóyów. Ket sotu tódô sfeng béléen yóm kun nwa.

¹⁹ Yó mon Musis mò kul, “Hol béen wen bélê ye hemyu ke mò kenen haya.”

²⁰ Okóm wen se bélê le là dog nimón le ke Musis, mom wen henyu le du. Tikóng hlafus haya tódô hono kuled yóm deng henyu le yó, deng mom moo bolok. Ne tey kebut Musis kul.

²¹ Ket hlafus, sotu kun ma sfeng kun. Ne ke deng kinì kdaw gotu mnò yó kem dù tebel bè tonok.

²² Timbow bè gnemen kdaw wen nwa le geblà bè lewu kdaw, ket lewu tukung bong bè ket tau. Kdê yó kem tuha malak yó kem tau Israél mógów ebè Musis ne tulón le du nim ni.

²³ Yó mon Musis mò kul, “Yó hloloen kuy yóm sana Dwata hol gónó mogot, haya yóm Kdaw Kehegnô hol hetfing ye ebéléen yóm kdaw yó. Eles tnétê ye kemdaw ni yóm kuy nóyô tnétê ne eles tnógó ye ni yóm kuy nóyô tnógó. Ke wen dù tebel, hol henyu ye mò ken ye haya.”

²⁴ Lemwót bè yóm hlolò Musis kul yó, gotu henyu le yóm dù ken le efet kól haya. Tikóng hayahen bè yó se, yóm ken henyu le yó là se kóen bali duhen ke knuled.

²⁵ Bè yóm ghituhen kdaw mon Musis mò kul, “Ken ye kemdaw ni nim ken ni abay se ni se yóm Kdaw Kehegnô deng blay tekuy ebè Dwata. Laen kô dù ken bud ton ye kemdaw ni bè lewà nim kamfù tekuy.

²⁶ Nem kdaw ye ma ken mò ken ye. Okóm bè yóm ghituhen kdaw yó se yóm Kdaw Kehegnô, laen dù tagad bud ton ye ken he.”

²⁷ Bè yóm ghituhen kdaw yó, wen kem tau tô mebel ken bè lewà okóm laen dù bud ton le.

²⁸ Ne yó mon Dwata mò ke Musis, “Tey kegen le là mimón du yó kem hlolou kul yó kem tau Israél.

²⁹ Hol bê ye abay klifót, ou se yóm sana Dwata hol gónó ye mogot, deng blayu kuy yóm ghituhen kdaw mò kdaw ye hegnô. Yó gónóhem mon bè yóm gnemen kdaw, hbongu yóm ken blayu kuy anì kóyów bè lewu kdaw. Bè yóm ghituhen kdaw yó, tódô ket tau henek bè kun gónô ne hol béen abay tebel yóm gónóen yó.”

³⁰ Tahu se, là kô le mò nmò yó kem tau bè yóm ghituhen kdaw.

³¹ Yó boluy kem tau Israél du yóm ken yó, mana. Lómó kmoen lómón yóm ngà lem hulu bukay, lómó knómen lómón yóm mambang lufi wen tneben.

³² Yó mon Musis mò kul, “Yó hlolò Dwata tekuy, hyu ke wen sotu tukung bong nim mana ni henyu tekuy mò angat ton yó kem kut lugod anì ton le yóm ken blay Dwata tekuy, yóm ken tekuy bè yóm benwu laen hol wen tauhen bè yóm kehewaen kut gu bè Idyip.”

³³ Duhen yó, mon Musis se mò ke Aron, “Mebeli ngà lebwón, hensuem sotu tukung mana lemen ne hol henyuhem mò angat ton yó kem lugod tekuy.”

³⁴ Tahu se, nmò Aron yóm deng hlolò Dwata ke Musis yó. Suen lem yóm ngà lebwón yóm mana yó mò angat henyuhen lem yóm Slungan Fasad hmò Dwata kul.Botong fat folò halay kegen le mken mana yó kem tau Israél efet le kól bè Kanan, yóm benwu hlós gónó le henek nô.

³⁵ Botong fat folò halay kegen le mken mana yó kem tau Israél efet le kól bè Kanan, yóm benwu hlós gónó le henek nô.

³⁶ Yóm kbong yóm tukung nlem le mana yó, bè kut btes ni kmoen ni, nlem lewu litru.