Kehewà 14 - Udél Dwata: Gna Kesfasad ne Lomi Kesfasad

Kifal le yóm Mohin Hulô

¹ Omin Dwata bud mudél ebè Musis, monen mò du,

² “Tulónem yó kem tau Israél na ye bud semfulék kmamfù klohok yóm benwu Pi Hahirot, yóm benwu nô bè gónón sóól benwu Migdul ne Mohin Hulô moni bè Baal Sifun.

³ Yó gónóhu hlolò du kuy nim ni anì hendem Faro, tolo ye tabag bè yóm benwu yó ne là kô ye gehlós abay se tofus ye bè yóm benwu laen hol wen tauhen.

⁴ Yó bud nmou béléen, bud hgelu kuluhen ne tódô ktesen yu. Ne mlan bè yóm kegmou béléen ne bè yó kem sendaluen gónóhu tótól. Omin le yó he temngón du yó kem tau Idyip ou se yóm sana Dwata hol gónó mogot.” Tahu se, nimón yó kem tau Israél yóm deng mon DWATA mò kul.

⁵ Timbow tulón le ke Faro yóm deng gotu kehewà yó kem tau Israél, bud megetles kehedemen dalang se yó kem genlalen, yó mon le, “Tedum deng nmò kuy ni du? Mom hewót tekuy lu yó kem tau Israél ne ni laen dù bud hesek tekuy.”

⁶ Lemwót Faro, kendel hentifesen yóm kun klitun gel niten bè gida ne yóm kdê sendaluen.

⁷ Gotu niten lu yóm kdê klitunen gomong yó kem nem latu klitun alì hyu bè kdéen. Ne eles mung kul se yó kem tau wen glal le gel mit kul.

⁸ Tey kehgel Dwata kulu Faro, yó gónón kemtes yó kem tau Israél balù yóm tey kofin Dwata kul bè kewót le.

⁹ Gotu ktes yó kem sendalù Idyip lu, tólóng se smakay kudà ne tólóng se smakay klitun ne gafit le lu bè yóm gónó le kmamfù bè Mohin Hulô moni bè Pi Hahirot ne Baal Sifun.

¹⁰ Timbow le temngel semfulék yó kem tau Israél, tódô ton le Faro ne yó kem tey sendaluen móyón gdofì bélê le. Ya tey sidek klikò le ne tey ktaba le ebè DWATA mni le tóbóng béléen.

¹¹ Yó mon le mò ke Musis, “Ni kô gónóm mit kum ebè nim benwu laen hol wen tauhen anì bè ni gónó me matay abay se laen dù gónó me lebeng bè Idyip? Hnénégem dé yóm nmoem bélê me bè yóm deng kwitem kum hewà gu bè Idyip.

¹² Ilóem là deng tehe tulón me du kóm gu laan tekuy là deng lemwót bè Idyip, tódô bayaem mi ne bè yóm keghesek me bè yó kem tau Idyip? Mom hyu ne ke ghesek me ditu senta ke matay me bè nim benwu laen hol wen tauhen nii.”

¹³ Bnalà Musis se, monen, “Bê ye abay hlikò. Hgel ye nawa ye dé. Tódô ton ye kemdaw ni yóm lan Dwata lemwà kuy. Yó kem tau Idyip kemtes tekuy yóó là kô bud ton ye kul ne.

¹⁴ Tódô ye henek abay se Dwata mit kul sfatay.”

¹⁵ Yó bud mon Dwata mò ke Musis, “Moen du ke alì ye tmaba ebéléu? Monem mò kul yó kem tau Israél tódô henlós le yóm kógów le.

¹⁶ Yó nmoem, tayalem eta mohin tugedem ne tódô meskó yóm él yó ne gbek yó kem tau Israél tódô mifal du yóm mohin yó, tódô le mlan lemen bè gónón mékéng tonok.

¹⁷ Okóm yó kem tau Idyip bud hgelu kulu le anì ktes le yu mifal. Ne mlan bè yóm kegmou bè Faro ne bè yó kem sendaluen ne bè yó kem klitunen ne bè yó kem tau mit kul gónóhu tótól bè yó kem tau Idyip.

¹⁸ Bè yóm kegmou bélê le, bè yó gónó le temngón du yó kem tau Idyip ou se yóm sana Dwata hol gónó mogot.”

¹⁹ Yóm hógów Dwata tehe tukô gna yó kem tau Israél tódô smili huli kul. Ne yóm lobun tmahà tehe tukô gna kul bud smili huli,

²⁰ tódô nô bè gónón sóól bè yó kem tau Idyip ne bè yó kem tau Israél. Yóm lobun bè blóng le yó baling kifu mget bè yó kem tau Idyip okóm fen baling layag bè yó kem tau Israél. Yó se gónó le là gehloni ebélê le suloyen buteng yó kem sendalù Idyip kemtes kul abay se wen yóm tey lobun nô lem blóng le.

²¹ Tayal Musis eta mohin sigelen ne tódô sen-gengen se hesut Dwata gu fi dmata kdaw yóm tey lenos bong na a semsólól yóm él yó. Suloyen buteng mò du lemnos efet gfan tonok lem yóm tey mohin. Tódô skó bè gónón sóól yóm él.

²² Ne yó kem tau Israél, tódô le kem mógów bè gónón mékéng tonok bè sólól yóm él yó. Ne yóm él tódô sbusung sfatà kilil le.

²³ Ne yó nmò yó kem sendalù Idyip, ktes le lu elem mohin mlan le se kul bè gónón mékéng tonok, gotu le smakay kudà ne klitun.

²⁴ Timbow minal mwas bè yó, temngel elaan Dwata gu lem yóm ofi tmahà ne yóm lobun tmahà ebè yó kem sendalù Idyip ne ya tey kehlangafen kul.

²⁵ Gotu hegebengen yó kem kliling klitun le anì mgel bélê le mógów. Yó udél yó kem tau Idyip yó, mon le, “Géhél tekuy mdó bè ni. Dwata se yóm deng semfatay tekuy ne tey kfihen yó kem tau Israél.”

²⁶ Yó mon Dwata mò ke Musis, “Bud tayalem eta mohin sigelem anì bud semfulék ebè yó kem sendalù Idyip yóm él ne ebè yó kem klitun le ne yó kem tau mit kul.”

²⁷ Tahu se, tayal Musis eta mohin sigelen. Timbow btù mata kdaw tódô mulék bè sana kun knelem yóm mohin yó. Lemwót yó kem tau Idyip, tey tô kehlóy le du yóm él yó, okóm mom tudà Dwata lu elemen.

²⁸ Bud mulék yóm él, gotu le lemneb yó kem sendalù Idyip kemtes yó kem tau Israél elem mohin, balù yó kem klitun ne yó kem tau mit kul, gotu le lemneb. Balù sotu ke wen tebel bélê le.

²⁹ Okóm kul yó kem tau Israél, deng le gotu mlan gu lem mohin bè gónón mékéng tonok, tódô sbusung sfatà kilil yóm tey él.

³⁰ Bè yóm kdaw yó, deng lenwà Dwata yó kem tau Israél lem tdok yó kem tau Idyip. Ne ton yó se kem tau Israél yóm deng gotu katay yó kem tau Idyip kemtes kul, tódô le masà bè kilil yóm mohin yó.

³¹ Timbow ton yó kem tau Israél yóm tey kfasang Dwata bè yóm deng kegmoen bè yó kem tau Idyip, tey klikò le du. Botong snalig le Dwata ne Musis yóm tau tóbóng lówóhen.