Kehewà 12 - Udél Dwata: Gna Kesfasad ne Lomi Kesfasad

Kdaw Khius

¹ Yó udél Dwata ebè Musis ne Aron bè yó bè Idyip, monen,

² “Nim bulón ni, ni se hol tanay bulón bélê ye bè yóm lomi halay.

³ Hol tulón ye bè kdê yó kem tau Israél ni kem hlolou kuy ni. Yó hlolou kul, bè gesfoloen kdaw bè nim bulón ni, ket kmuleng mélék sotu ngà ubiha duhen ke ngà kambing mò ken yóm kun fes lówó.

⁴ Ke là wenen yóm kun fes lówó mò mken yóm sbotù, hyu ke setnù le yóm dumuhen sebét là wen fes lówóhen se kun mò semtóbóng mken yóm sbotù utón yó, syan ke kóyów bélê le.

⁵ Yóm ubiha nélék ye duhen ke kambing, hyu ke hanà tolo sfalayen, yóm laen dù óngóhen bede logi.

⁶ Duhen yó, lemwót bè yóm gesfoloen kdaw bè nim bulón ni efet kól bè gesfoloen fat kdaw, hol hentilob ye semgyok du yóm ubiha deng nélék ye. Ke sok deng sdef kdaw bè yóm gesfoloen kdaw yó, tódô kdê yó kem tau Israél gotu hmatay yóm ubiha deng nélék le.

⁷ Omin le ma dumu yóm litô yóm ubiha hnatay le ne lumang le bè hehek yóm bak dól le ne bè yóm hlekel ta yóm bak dól yóm gónô gónó le mken du yóm ubiha yó.

⁸ Bè yóm kifu yó, hol tnétê le yóm ubiha deng hnatay le ne mung ken le bè yó kem som héét ne bè yóm mambang laen dù bulung henoken.

⁹ Bê ye abay ken matak duhen ke tnógó nim ni, hol tnétê ye lenbotù mung du kuluhen ne tihen ne kdê yó kem hyu mken du nô lem lówóhen.

¹⁰ Hol bê ye abay tmebel du efet hlafus. Ke wen dù tebel là gotu ye du, hol hkekeb ye.

¹¹ Bè yóm kifu kken ye du, eles lesek ye yóm mò nes ye lemwót mung du tlumfà ye ne eles nogot ye tuged ye. Henslò ye mken, yakà ni du yóm mò ken bè Kdaw Khius hlolou kuy mò gónó ye madat do.

¹² Bè yóm kifu yó angate mógów bè klamangen Idyip naw e hmatay yóm kdéen ngà logi twogu, tau duhen ke ógóf ne tnafaku yó kem dwata lennged gel tnaba le bè Idyip. Ou se yóm Dwata hol gónó mogot mon du nim ni.

¹³ Yóm litô nô bè hehek yóm bak dól ye mò ilô yóm gónô gónó ye nô. Bè yóm kógówu, ke tonu yóm litô yó tódóe mius. Là kô naw e hensidek kuy bè yóm ktafaku yó kem tau Idyip.”

Yóm hlolò Dwata kul bè yóm mò ken bè kken le yóm mambang laen dù bulung henoken

¹⁴ Yó udél Dwata, monen, “Hol gel hnigal ye ke sok bud kól nim Kdaw Khius ni mò gónó ye hemtulón du nawa yóm deng nmou bélê ye. Bê ye abay nmò sónen yóm tendo gel kulit kmò ye du ket halay.

¹⁵ Bè yóm gel kmò ye du ket halay, hitu kdaw ye là tagad mò bulung henoken yóm mambang gel ken ye. Bè yóm tanay kdaw gotu kó ye ke wen bulung henok mambang nô lem gónô ye. Ke wen sotu bélê ye mken du yóm mambang wen bulung henoken lem yóm hitu kdaw, là bud homongu du ne bè yó kem dou tau yóm tau yó.

¹⁶ Bè yóm tanay kdaw ne bè yóm ghituhen kdaw hol ye stifun tmaba ebéléu. Hol bê ye abay mò nmò bè yó kem kdaw yó, okóm là sideken ke tmógó ye ken.

¹⁷ Tendo nulit nmò ye ket halay nim mò ken ni mò gónó ye hemtulón du nawa yóm kdaw kehewau kuy gu bè Idyip. Nim hlolou kuy ni, laen dù mtukul sónen yóm gel kmò ye du.

¹⁸ Tódô lenwóten bè yóm kifu bè gesfoloen fat kdaw bè yóm tanay bulón efet kól bè yóm kifu bè yóm gewuhen folò sotu kdaw bè yóm bulón yó, hol bê ye abay ken yóm mambang wen bulung henoken.

^19-20 Lem yóm hitu kdaw yó, hol béen abay wen bulung henok mambang nô lem gónô ye. Ke wen tau mken du kihu ke tau fun benwu duhen ke tau milo, là bud homongu du bè yó kem dou tau ne yóm tau yó.”

Yóm tanay kmò le du yóm mò ken bè Kdaw Khius

²¹ Omin Musis gotu htaba kul yó kem tuha gel malak yó kem tau Israél ne monen mò kul, “Ket kmuleng bè kdéen tau Israél mélék le sotu ngà ubiha duhen ke ngà kambing mò tnétéen bè Kdaw Khius.

²² Ma ye ngà hanga yóm hulu boluyen hisop ne dù ye lem yóm tukung gónó ye hemsù yóm litô yóm ógóf tnétê ye yó, omin ye lemumang du bè hehek bak dól ye ne bè yóm hlekel ta yóm bak dól ye. Hol béen wen bélê ye hewà bè gónóen efet hlafus.

²³ Ke mógów bè klamangen Idyip Dwata anì nan e hnatay yó kem ngà logi twogu yó kem tau Idyip, ne ke tonen yóm litô nô bè hehek bè bak dól ye ne bè yóm hlekel tahen, tódô nius yóm hógów Dwata mit hatay yó yóm gónô ye.

²⁴ Hol nimón ye nim hlolò Dwata kuy ni efet kól bè laen dù tul sónen dalang se yó kem lugod ye.

²⁵ Ke deng ye husek bè yóm benwu deng fasad Dwata kuy, hol nmò ye nim hlolò Dwata kuy ni.

²⁶ Ke angat snólók le yu yó kem ngà ye ke tedu lanen nim gel nmò ye ni,

²⁷ mon ye mò kul, ‘Ni se yóm kedsù tekuy ebè Dwata bè yóm Kdaw Khius mò gónó tekuy hegfan du yóm kadat tekuy du, abay se tehe niusen yó kem gónô yó kem tau Israél bè Idyip bè yóm khatayen yó kem ngà logi twogu yó kem tau Idyip, okóm fen hlowilen tekuy.’ ” Timbow gungol le yóm udél Musis yó, gotu le mtud bukol yó kem tau Israél, dóyón le Dwata.

²⁸ Omin le lemwót ne gotu nmò le yóm deng hlolò Dwata kul le Musis ne Aron.

Gesfolò tafak

²⁹ Hol sóól buteng se gotu hnatay Dwata yóm kdéen ngà logi twogu yó kem tau Idyip, lenwóten bè ngà Faro, yóm ngaen bud tô temles du, kkólen bè ngà yóm tau knukub le ditu bè gónón kmifu. Dalang se yóm kdéen tanay sut bè yó kem ógóf le gotu matay.

³⁰ Bè yóm kifu yó, gotu le gebtik le Faro ne yó kem genlalen ne kdê yó kem tau Idyip, bà mon tey dlumu kik bè klamangen Idyip, abay se laen dù gmónô ke laen dù ngà logi matay bélê le.

³¹ Bè yóm kifu yó, bud htaba Faro Musis ne Aron ne monen mò kul, “Mdó ye bè ni bè dou benwu, nwit ye yó kem dumu ye Israél. Géhél ye lemwót ne na ye e tmaba bè yóm kuy Dwata, hol lómón yóm deng hni ye béléu.

³² Gotu nwit ye kem ubiha ye ne kem kambing ye ne kem safì ye. Géhél ye lemwót ne, ne hol ye mni béléu se do bè Dwata.”

³³ Ya tey keheslò le kul yó kem tau Idyip anì géhél tebel le yóm benwu yó. Yó mon le, “Ke là géhél ye lemwót angat me gotu matay.”

³⁴ Tahu se, gna senbool yó kem tau Israél yóm mambang laen dù bulung henoken ne sù le lem yóm gónó le angat tmógó du, hnunges le kgal le, omin le tmihang du.

³⁵ Blaem yó kem tau Israél, deng le eles mni kem ngom libun nmò le bè tahu blówón ne bè blówón bukay bè yó kem tau Idyip, ne wen se kem nes deng eles hni le lómón yóm deng mon Musis mò kul.

³⁶ Lemwót bè yóm deng hefedem Dwata yó kem tau Idyip, yó gónón wen nawa le ebè yó kem tau Israél, tódô blay le kul kihu nóyô hni le bélê le. Bè nim ni, tey wen nwit kem tau Israél yóm kul kendengen yó kem tau Idyip.

Ktagak kem tau Israél yóm benwu Idyip

³⁷ Lenwót le bè yó mógów yó kem tau Israél bè syudad Ramisis efet le kól bè benwu Sukut. Yó kwen kem logi botong nem latu libuhen, là gomong nsó le kul kem libun ne kem ngà.

³⁸ Ne tey wen yó kem tólóng tau mung kul. Kem ubiha ne kem kambing ne kem safì snéen gotu nwit le.

³⁹ Gotu tnógó le bè lan yó kem mambang laen dù bulung henoken nwit le gu bè Idyip. Yó gónón laen dù bulung henoken abay se tey meslò yóm kehewót le kul, laen dù uras le na mangat du kenok yóm mambang. Ne laen se dù uras le hemtifes du yóm dumu ken le.

⁴⁰ Yó kegen le menwu bè Idyip yó kem tau Israél, botong fat latu tlu folò halayen.

⁴¹ Bè yóm hol són kdaw bè yóm halay yó, tódô kdê yó kem tau Dwata gotu tnagak le yóm benwu Idyip yó.

⁴² Ni se yóm kifu kbentey Dwata kul bè yóm kwiten kul hewà gu bè Idyip. Ne bud ni se yóm kifu deng htólóng le bè Dwata efet kól bè laen dù tul sónen. Ket halay le gel hmigal du ke sok bud kól yóm butengen, bud gel tles hningón nmò le se kul yóm tehe kbentey Dwata kul yó. Là gomongen bè nili yóm bérs 43 efet kól bè bérs 51. Yó tulónen yó kem hlolò Dwata kul bè Kdaw Khius.