Kehewà 11 - Udél Dwata: Gna Kesfasad ne Lomi Kesfasad

Eles ktulón Musis yóm katay yó kem ngà logi twogu yó kem tau Idyip

¹ Deng eles wen udél Dwata ebè Musis, monen, “Olon sotu ne duen tafak hwitu ebè Faro ne klamangen Idyip ne bè yó kem tauhen. Kogol yóm tafak yó hewóten yu ne. Bè ktahuhen, gotu tódô hdóhen yu bè ni.

² Ne ni, mudéli ebè yó kem tau Israél anì eles le mni bè yó kem tau Idyip dumu le sebét yó kem ngom libun nmò le bè tahu blówón ne bè blówón bukay.”

³ Bè yóm kdaw yó, deng eles wen hefedem Dwata yó kem tau Idyip anì wen nawa le ebè yó kem tau Israél. Bè ktahuhen, tey kadat le ke Musis yó kem genlal Faro dalang se yó kem kdéen tau bè Idyip.

⁴ Bè yóm hol són kestulón le Musis Faro, yó mon Musis mò du, “Yó udél yóm sana Dwata hol gónó me mogot, monen, ‘Ke móyón sóól buteng mógówe bè klamangen Idyip

⁵ ne ket ngà logi twogu bè yó kem tau Idyip, gotu le matay lenwóten bè yóm hol kóm ngà, yóm ngà angat bud tô temles kóm kkólen bè ngà yóm libun hesek gel mdek halay. Dalang se yóm kdéen ógóf tanay sut, gotu le matay.

⁶ Tey wen demumu mkik bè klamangen Idyip, ne langat là deng sulék gungolem du ne là bud gungolem du ne elem hulin kdaw.

⁷ Okóm yó kem tau Israél tey menek bélê le balù ohu là kô le mbak. Bè nim nmou ni mò gónón gfan ou se yóm Dwata semtólóng yó kem tau Idyip bè yó kem tau Israél.’ ”

⁸ Yó hol són udél Musis bè Faro, monen, “Ni kem kdê genlalem angat le mógów ebéléu, mtud le bukol bè soluhu ne nubug le o anì gotu nitu lu hlayuk yó kem dou tau. Ne tahu se, lemwóte bè yóm kdaw yó.” Omin Musis tódô tmagak ke Faro bè yó, tey sidek kebuten.

⁹ Deng tehe mon Dwata mò ke Musis, “Là kô hnungol Faro kóm anì yó, bud gmou bè Idyip yó kem dumu hentaw ton.”

¹⁰ Tahu se, gotu nmò le Musis ne Aron bè solu Faro yó kem hentaw ton hmò Dwata kul yó, okóm sana tolo kehgel Dwata kulu Faro anì là kô hewóten kul bè yóm kun benwu yó kem tau Israél.