Kehewà 10 - Udél Dwata: Gna Kesfasad ne Lomi Kesfasad

Gwolu tafak

¹ Omin Dwata bud mudél ebè Musis, monen, “Budi lemwót nam e bud ston ke Faro. Deng hgelu kuluhen dalang se kulu yó kem genlalen mò gónóhu hegfan ni kem hentaw ton nmou ni

² ne anì wen angat tulónem bè yó kem ngaem ne bè yó kem téméem yóm klaen dù gmò le yó kem tau Idyip bè yóm kmou du lem blóng le yó kem tey hentaw ton. Ne bè yó gónó ye temngón du yóm kdê ye ou se yóm sana Dwata hol gónó mogot.”

³ Tahu se, bud le mógów ebè Faro le Musis ne Aron, mon le mò du, “Yó udél yóm sana Dwata yó kem tau Hibru, yóm hol gónó mogot, monen, ‘Deng tey kegenen ne yóm là keheglaanem béléu. Hol hewótem lu ne yó kem dou tau anì na le e tmaba ebéléu.

⁴ Ke là bud hewótem kul, haya wen kem tlangas hwitu elem nim benwuhem.

⁵ Tódô tfeng tlangas lem nim benwuhem ni efet là bud tonem du tonok. Gotu ken le yó kem dù tebel là gehsidek bulók kulón du. Balù yó kem koyu dù tebel gotu ken le.

⁶ Tódô tfeng tlangas lem gónô bongem ne lem gónô yó kem genlalem ne lem gónô yó kem tauhem. Tey gedlug kwen le senta yó kem tlangas deng tehe ton yó kem fù ye ekni.’ ” Timbow deng kudél Musis, ominen beklil mulék.

⁷ Yó mon yó kem genlal Faro, “Kegenen de duen sónmò kesbewegen tekuy nim tau ni? Géhél hewótem lu ne yó kem logi Israél anì na le e tmaba ebè yóm sana kul Dwata hol gónó mogot. Là gnómem du kô kóm yóm deng keglà yóm benwu Idyip?”

⁸ Yó gónóm mon, bud hangay Faro le Musis ne Aron ne yó monen mò kul, “Lemwót ye ne anì ne ye e tmaba ebè yóm sana kuy Dwata hol gónó mogot. Okóm kem tau du se yóm fen mógów?”

⁹ Mon Musis se, “Tódô kdê me, mung kum kem ngà me ne yó kem tuha bélê me. Nwit me kem ngà me logi ne kem ngà me libun ne kem ubiha me ne kem kambing me ne kem safì me abay se mò me ken bong mò gónó me hegfan yóm kadat me ke Dwata, yóm sana kum Dwata hol gónó mogot.”

¹⁰ Yó mon Faro, “Tódô tulónu kuy, song gwit ye kem ngà ye ne kem yehen ye ke tódô Dwata mò du. Ke béléu do là kô naw e hlus kuy. Nim tô nmò ye ni tey dilô kaem hlós lan ye.

¹¹ Là kóe móyô. Olon kem logi ne mógów. Lemwót ye ne na ye e tmaba ebè Dwata ke yó se yóm nóyô ye.” Bè yóm kmonen du yóm yó, omin le hdó kul le Musis bè solu Faro.

¹² Omin Dwata bud mon du mò ke Musis, “Tayalem eta sigelem ebè klamang Idyip anì wen tlangas sut. Bè yóm ksut le gotu ken le yóm kdéen tmowok, yó kem dù mowil bè bulók kulón.”

¹³ Tahu se, tayal Musis eta tugeden ne omin Dwata hbel lenos ebè benwu le lemwót fi dmata kdaw. Sendawen ne suloyen buteng mò du lemnos. Hlafus haya bè yó tey tlangas wen msut mung bè lenos.

¹⁴ Tódô le gotu lememek bè klamangen Idyip. Ni se yóm tey tlangas là deng wen hnikót mton du ne laen dù bud mton du elem hulihen.

¹⁵ Tódô hfitem tonok lemwót bè yóm tey tlangas wen lememek etahen. Gotu ken le yó kem dù mowil bè bulók kulón, gomong yó kem bungu koyu. Balù udì ke wen tonem hulu duhen ke doun koyu bè klamangen Idyip.

¹⁶ Omin Faro kendel bud htaba kul le Musis ne Aron ne monen mò kul, “Denge gemsalà bè Dwata, yóm gónó ye mogot ne denge gemsalà bélê ye snéen.

¹⁷ Ni hol bud hnifót ye ou sulék, ne mni ye bè yóm kuy Dwata hol gónó mogot anì kóhen béléu nim tey tafaken do gónó matay ni.”

¹⁸ Omin Musis tmagak ke Faro ne mni bè Dwata.

¹⁹ Ne yó nmò Dwata, tenlesen kógów yóm lenos lemwót fi dmata kdaw, hbelen yóm tey lenos bong lemwót fi desdef mò myuf yó kem tlangas elem Mohin Hulô. Balù sotu ke wen dù tlangas tebel bè Idyip.

²⁰ Okóm sana tolo kehgel Dwata kulu Faro, yó gónón là hewót kul yó kem tau Israél.

Gesyóm tafak

²¹ Omin Dwata bud mudél ebè Musis, yó monen mò du, “Hdaem eta bè longit sigelem anì sut bè klamangen Idyip yóm tey kifu mget.”

²² Tahu se, hdà Musis eta bè longit sigelen ne botong tlu kdawen mò du kmifu mget bè klamangen Idyip.

²³ Yó kem tau Idyip, là kô le bud ston ne balù sotu tau ke gtebelen gónóen bè yó kem kdaw yó. Okóm kul yó kem tau Israél wen layag bè yóm kul gónó nô.

²⁴ Bud htaba Faro Musis, monen mò du, “Yó ne, lemwót ye ne na ye e tmaba bè Dwata. Balù yó kem libun ne yó kem ngà nwit ye lu. Okóm tebel ye yó kem ubiha ye ne kem kambing ye ne kem safì ye.”

²⁵ Mon Musis se, “Là. Gotu nwit me yó kem ógóf me mò dsù me ne mò hkekeb me ebè yóm kum Dwata.

²⁶ Gotu nwit me lu, balù sotu ke wen tebel bélê le. Tódô mi mélék du yóm ógóf mò dsù me ebè yóm kum Dwata. Gu laan me là deng kól ditu là deng tngón me du he yóm ógóf mò dsù me ebéléen.”

²⁷ Bud hgel Dwata kulu Faro, yó gónón là hewót kul yó kem tau Israél.

²⁸ Yó bud monen mò ke Musis, “Mdóhi bè ni bè soluhu. Béi bud hton dou. Ke bud tonu uu, deng katayem ne.”

²⁹ Mon Musis se, “Tahu se yóm monem yó, là kô bud tonem dou ne.”