Juwél 3 - Udél Dwata: Gna Kesfasad ne Lomi Kesfasad

Kfasad Dwata yóm kegbaen yó kem tólóng benwu bè yóm kdaw kkukumen tau

¹ Yó udél Dwata, monen, “Bè yóm kdaw yó, yóm kdaw bud kehguléku klowil yó kem tau bè Juda ne bè Jirusalim,

² angat gotu sentifunu yóm kdéen sendalù bè klamangen benwu ditu bè Datal Jihusafat. Ditu gónóhu tmafak kul lemwót bè yóm deng kehsidek le yó kem tauhu Israél, abay se deng gotu senkla le lu ebè tólóng benwu, lel le deng gotu semsólól yóm tonok bè Israél, yóm dou tonok.

³ Wen atù gel nmò le mò gónó le temngón du ke mahi du bè yó kem tauhu yóm mò hesek le. Gotu senswa le yó kem ngà logi mò bayad le yóm libun hdóyón, dalang se yó kem ngà libun hbalù le mò bli le yóm ninum lemengel.

⁴ Ó kem tau bè Tayal ne bè Sidon ne bè yó kem dumu benwu lem Flistya, tedu se gónó ye hmohon do du? Mone tô bneles ye o kô? Ke yó tô nmò ye ten-gama ye, angat kendel huléku eta ye kdê yó kem sidek deng gel nmò ye.

⁵ Deng gotu nwa ye yó kem blówón bukayu kkólen bè kem tahu blówónu dalang se kdê yó kem kimuhu alì mebtes ne deng gotu nwit ye lu ebè gónô yó kem kuy dwata.

⁶ Yó kem tau bè Juda ne yó kem tau bè Jirusalim, deng gotu hbalù ye lu ebè yó kem tau Grik, yóm deng mit kul mayuk bè benwu le.

⁷ Okóm angat gotu bud nwitu lu semfulék gu bè yó kem benwu deng gónó ye hembalù kul ne angat huléku eta ye yóm deng nmò ye bélê le.

⁸ Angat bud hbaluu yó kem ngà ye logi ne yó kem ngà ye libun ebè tu kem tau bè Juda anì bud senswa le lu etu bè kem tau bè Arabya yóm benwu alì mayuk. Ou se Dwata nim mudél ni.”

⁹ Ni se hol eles heglalag ye ebè klamangen benwu, mon ye, “Eles ye htifes bè yóm gida móyón sut. Sentifun ye yóm kdéen sendalù ye deng alì kemnalam bè gida. Hewót ye lu anì géhél le sundug.

¹⁰ Hsól ye yó kem tukô dadu ye hmò ye sudeng ne yó kem badung ye hmò ye lu buyus. Balù yó kem tau lunog, gotu hmung ye lu.

¹¹ Hgéhél ye ne yóm kdéen tau bè klamangen benwu, gotu ye stifun ditu bè datal.” Yó ne, Dwata, hol hwitem etu yó kem kóm sendalù.

¹² Bud mudél Dwata, monen, “Hol le eles htifes yó kem tau lemwót bè kdéen benwu, mógów le etu bè Datal Jihusafat. Yakà ditu du gónóhu myón kmukum kul yóm kdéen tau bè ket benwu. Ou se Dwata nim mudél ni.

¹³ Tey alì gulé yóm ksidek nmò le. Yó gónóm mon, gotu gnalab ye lu lómón kgalab halay bè yóm kdaw kuta. Gotu sninà ndà ye lu lómón ksinà bungu grép, yakà dengen hnok yóm gónó kemmes kul, tódô gotu lembés élen. Lómón yó se kguléhen yóm tendo ksidek yóm gel nmò le.

¹⁴ Hilu libuhen tau hatan ditu bè datal na a mangat kukum. Abay se bè yó gónón sut yóm kun kdaw Dwata ne deng mdulen ne.

¹⁵ Angat baling kifu yóm nóng kdaw ne bulón ne là kô le bud mnóng yó kem blotik.

¹⁶ Tey lungkulen gu bè Sayun yóm udél Dwata ne lemték gu bè Jirusalim. Tódô gotu msinsig tonok ne longit. Okóm bè yó kem kun tau Israél, Dwata se gónó le e mlo mò gónó le e heklung.”

Bud kfasad Dwata yóm któbóngen yó kem tauhen bè yóm kdaw kkukumen tau

¹⁷ Yó bud udél Dwata, monen, “Bè yóm kdaw yó angat tngón ye ou se yóm sana kuy Dwata hol gónó mogot. Nóe bè Sayun yóm bulul deng htólóngu mò dou. Angat tey mólós yóm Jirusalim ne là kô bud gundug le du yó kem sendalù lemwót bè tólóng benwu.

¹⁸ Bè yóm kdaw yó, tódô hono lefà grép bè yó kem bulul lembang ne bè yó kem bulul lemnek, tódô hono safì mótób bè yó. Angat bud wen él mlel bè yó kem sbong deng kti bè Juda. Ne angat wen él tembul gu lem yóm kun Gónô Dwata, gotu hnéféen yóm Datal Koyu Akasya yóm datal mékéng tonoken.

¹⁹ Okóm yóm benwu Idyip, angat baling benwu là hyu menwu du, dalang se yóm benwu Idom, angat laen kô dù bud tmowok du lemwót bè yóm deng kundug le yóm benwu Juda, gotu hnatay le yó kem tau laen dù salaen.

²⁰ Okóm yóm benwu Juda kun, angat tendo wen tauhen dalang se yóm benwu Jirusalim, nan hol dê he lugod tauhen laen dù tul sónen.

²¹ Angat gotu bnelesu yó kem dou tau deng hnatay yó kem hohon le. Là gbeku du ke là hnatayu kul yó kem tau tehe mò du bélê le. Ou se Dwata, angat nô bè Jirusalim lem blóng yó kem dou tau.”