Juwél 1 - Udél Dwata: Gna Kesfasad ne Lomi Kesfasad

Keglumfak le yóm tey tlangas mfól

¹ Ni se udél Dwata hlanen bè Juwél yóm ngà Pituél logi, monen,

² “Ó kem tuha gel malak, hol hnungol ye nim ni. Henklingu ye se kuy, yu kem kdéen tau menwu bè nim benwu ni. Yóm klawi ye tau, deng wen kô gfà ye lómón nim sut bélê ye ni, duhen ke deng wen gungol ye lómónen ni bè yóm tehe kul kdaw yó kem tehe fù tekuy ekni? Laen duen.

³ Nim gfà tekuy ni, hol tulón ye yó kem ngà ye anì bud lu tmulón du bè yó kem kul ngà ne efet kól bè yó kem bud lugod le.

⁴ Tódô le stufì sut yó kem tey tlangas mfól. Yóm dù tebel yó kem tlangas gna sut, bud ken yó kem tlangas tmodol sut, ngangen efet laen dù bud tebel, tódô gotu mimot kdéen.

⁵ Ó kem tau gel hlengel, btik ye ne hol ye mkik. Hlangag ye, yu kem tau gel minum tifas grép abay se deng gotu sidek yó kem bungu grép ye, laen dù bud gónó ye ma ke tô ye bud mò tifas.

⁶ Hol yéen tlangas mfól yóm deng gotu lememek bè dou benwu. Tey le mfasang ne là kô gabayem msó kul. Tey telem nihi le lómón tô ktelem nihi liyun.

⁷ Gotu hensidek le yó kem dou lefà grép ne yó kem dou koyu fig. Gotu nlé le kulit le efet tódô bukay yó kem hanga le.

⁸ Hlangag ye dé kem tau, lómón klangag yóm sawang libun matay yóm logi deng leminti du.

⁹ Laen dù bud halay ne duhen ke tifas grép mò bud blay tekuy ebè Gónô Dwata. Gotu le langag yó kem tau gel blóng ebè Dwata, lu yó kem tau gel mò nmò bè Dwata.

¹⁰ Yó kem tonok gónó mò hulu, laen dù bud hulu tmowok tahen, hol lómón ke gotu le langag. Laen dù bud tonem halay kkólen bè yó kem tifas grép, laen dù bud tonem ne laen se bud tonem hnolo ulib.

¹¹ Yóm kdê ye kem tau mò hulu, laen dù bud ken-gel nawa ye ne. Hol ye hlangag, yóm kdê ye kem tau mulu grép. Hlangag ye abay se deng gotu sidek yó kem halay ye ne yóm kdê dumu hulu ye.

¹² Deng le gotu menes yó kem lefà grép ne yó kem koyu fig, dalang se yó kem dumu kay koyu mungu, gotu le mékéng. Ne hol lómón ke deng mung menes bélê le kligal yó kem tau.

¹³ Yu kem tau gel blóng ebè Dwata, mnes ye sakù. Hlangag ye, yu kem gel mò nmò bè gónó demsù. Géhél ye ne, yu kem tau gel mò nmò bè Dwata, suloy ye buteng mnes sakù. Laen kô dù bud halay ne tifas grép blay ye ebè Gónô yóm kuy Dwata.

¹⁴ Eles heglalag ye yóm sotu kdaw htólóng ye mò kdaw ye fasting mni bè Dwata. Hol htaba ye yó kem tau anì na ye gotu stifun tmaba ebè Dwata. Nwit ye yó kem tuha gel malak dalang se yóm kdéen tau bè Juda, nwit ye lu elem Gónô Dwata, omin ye hol hkodu mni tóbóng bè yóm sana kuy Dwata hol gónó mogot.

¹⁵ Deng mdulen ne yóm kun kdaw Dwata, yóm kdaw nan e kegbà klamangen yóm Dwata laen dù là gbeken du. Tey sidek knikò yóm kdaw yó.

¹⁶ Tódô olo tekuy temngel du yóm deng gotu klanahen yó kem hulu tekuy. Laen dù bud kligal ne lem yóm kun Gónô yóm Dwata tekuy.

¹⁷ Yó kem lem hulu, gotu le matay lem tonok lemwót bè alì kékéngen. Laen kô dù bud sigang tonem, dalang se yó kem fol laen dù bud lem le, tódô le kem gbayà.

¹⁸ Yó kem ógóf, sónmò le dmolong lemwót bè kbitil le, dalang se yó kem safì, olo le tendo mógów hekawang laen kô dù bang nótób le. Balù yó kem ubiha, tey keglayam le se kul.”

¹⁹ Ó Dwata, hol tnóbóngem mi. Hol lómón ke deng gotu ken ofi yóm gónó le mótób yó kem ógóf me kkólen bè yó kem koyu me, hol lómón ke deng le gotu mlób.

²⁰ Balù yó kem ógóf lóbô lem bnes, gotu le hegwóng ebéléem lemwót bè alì kleeng le. Deng le gotu kti yó kem él ne hol lómón ke deng gotu ken ofi yó kem gónó le gel mótób yó kem ógóf lem bnes.