Juswa 9 - Udél Dwata: Gna Kesfasad ne Lomi Kesfasad

Ksukat kem tau Gibyun ke Juswa

¹ Yóm gel kegmò yó kem tau Israél tey glalag bè yó kem hohon le, botong gefet bè yóm kdê tau hol geta nô fi desdef Él Jurdan. Lu se yó kem tau hol geta bè yó kem tau Hitayt ne bè tau Amurayt ne bè tau Kanan ne bè tau Pirisayt ne bè tau Hibayt ne bè tau Jibusayt. Ni kem tau ni, wen se bélê le nô lem bulul ne wen se bélê le nô gu lem but henfek ne wen se nô hilol Mohin Miditiranyan efet kól ditu senbwak Bulul Libanun.

^2-3 Yó nmò ni kem tau hol geta ni, gotu le setgel yóm kdê le anì gnida le Juswa ne yó kem tau Israél. Okóm yó kem tau bè Gibyun tau le Hibayt se kul, bè yóm kungol le du yóm deng nmò Juswa bè Jiriku ne bè Ay

⁴ yó atul le, snukat le Juswa anì là gomong le matay. Wen tau hógów le ebéléen. Yó nmò ni kem tau ni, wen sakù bolok nlem le ken ne hlulón le yó kem kudà asnu le. Ominen wen sning kulit deng knefeng nwit le nlem le él.

⁵ Omin le lemsek yó kem nes bolok le ne yó kem sandal bolok bud sentebé le. Ne yóm mambang nwit le mò bnotu le, hono mambang deng kefel ne knuné.

⁶ Kewót le bè yó, mógów le etu ebè Gilgal bè gónó le kmamfù le Juswa ne yó kem tau Israél. Bè yóm kkól le bè yó, yó mon le, “Nim kógów me ni, lemwót me bè benwu mayuk, tô me móyô sbilà bélê ye.”

⁷ Okóm yó mon yó kem tau Israél, “Déke menwu ye moni bè ni. Ke menwu ye moni bè ni, là gbek me du mit sbilà bélê ye.”

⁸ Yó balà le ke Juswa, mon le, “Ke móyô ye, mi se mò tóbóng lówó ye.” Omin Juswa smólók kul, monen, “Tmau kuy de? Gónó ye gu lemwót de?”

⁹ Yó tulón le ke Juswa, mon le, “Lemwót me bè benwu mayuk, Sér. Yó gónó me mógów ebéléem ni abay se deng gungol me yóm kuy Dwata, du se hol gónó mogot. Deng gotu gungol me yóm deng nmoen bè Idyip.

¹⁰ Ne gungol me snéen yóm nmoen bè yóm lewu kem tau hol geta bè yó kem tau Amurayt nô fi dmata kdaw Él Jurdan, bè le Sihun bè Hisbun ne Ug bè Basan yóm tehe nô bè Astarut.

¹¹ Hógów le mi edini yó kem tau gónó me gel galak dalang se yó kem dumu me bè yó, mon le mò kum, ‘Nim khógów me kuy ni, tey mayuk. Eles ye mit bnotu ne ye e ston bè yó kem tau Israél. Tulón ye kul tekuy se mò tóbóng lówó le ne tey hyu ke mit le sbilà bélê tekuy.’

¹² Ne ni, Sér, nénégem ni dé kem mambang nwit me. Tolo kinì he nim ni yóm kewót me ditu. Okóm ni deng mom kefel lelen knuné.

¹³ Ne ni kem sning kulit nwit me ni, bè yóm tehe klem me kul él ditu hanà tolo lomi. Okóm ni, deng le gotu meglé. Ni kem nes me ne sandal me deng le gotu sidek bè lan, botong klayuk yóm gónó me gu lemwót.”

¹⁴ Yó nmò yó kem tau Israél, gotu hnénég le yó kem ken nwit le yó koni ne tahu se, deng knuné. Bede là kô dog snólók le ke Dwata ke tedu yóm kun kóyô.

¹⁵ Deng mom yó nmò Juswa, deng mom mit sbilà bélê le. Lemwót se kul yó kem tuha gel malak yó kem tau Israél, wen safà nmò le bè yó kem tau Gibyun mò hemget du yóm deng kesbilà le.

¹⁶ Na a deng tlu kdawen miwes kogol yóm deng kesbilà le, yó he ketngón kem tau Israél du moni gónó le gu lemwót yó kem tau mit sbilà bélê le yó.

¹⁷ Duhen yó, kendel le lemwót yó kem tau Israél mógów le ebè yó kem syudad le gónó le nô yó kem tau Gibyun. Tlu kdaw le bè lan, omin le gefet bè yó. Yó boluy yó kem syudad le yó, Gibyun ne Kafira ne Birut ne Kiryat-dyirim.

¹⁸ Okóm là kô genlà kem tau Israél kul abay se yó kem tau gónó le gel galak, deng mget ksafà le bè yóm kul Dwata hol gónó mogot. Yó kem tau Israél, tey dê udél le eta yó kem tau malak kul lemwót bè yóm deng kesbilà le bè yó kem tau Gibyun.

¹⁹ Okóm yó mon yó kem tau gel malak kul, “Là kô gbek tekuy du mò sidek bélê le abay se deng mget yóm safà nmò me bélê le bè solu yóm sana kut Dwata hol gónó mogot kem tau Israél.

²⁰ Là gbek tekuy du ke là hlowil tekuy kul, yakà deng wen yóm safà nmò me bélê le. Ke nulé tekuy tnafaken tekuy Dwata.

²¹ Hlowil tekuy lu anì wen hwa tekuy koyu ne wen hangay tekuy él.” Yó gónóm mon, là kô nulé kem tau Israél du yóm deng fasad le bè yó kem tau Gibyun.

²² Omin Juswa htaba yó kem tau Gibyun ne snólóken lu, monen, “Moen ke mò ye kéng bélê me? Tulón ye kum mayuk gónó ye gu lemwót igoen moni bè ni.

²³ Lemwót bè nim nmò ye ni, yó olu Dwata kuy baling ye hesek, fen ye gel ma koyu ne mangay él bè yóm gónô yóm kum Dwata.”

²⁴ Bnalà le Juswa, mon le, “Yó gónó me mò du, Sér, abay se likò me matay. Deng gungol me yóm kdóken ke Musis yóm sana kuy Dwata hol gónó mogot anì nwahen nim klamang tonok ni ne gotu hfatayen yóm kdê tau menwu tahen. Tey sidek klikò me kuy, yó gónó me mò du nim ni.

²⁵ Ne ni, Sér, deng me nô lem hólólem. Tódô nmoem yóm kóm kóyô bélê me.”

²⁶ Tahu se, yó nmò Juswa bélê le, hlowilen lu ne hensengen yó kem tau Israél tô hmatay kul.

²⁷ Henbalingen lu hesek, fen hwahen lu koyu ne hangayen lu él bè yó kem tau Israél ne bè yóm gónó le gel demsù ebè yóm sana kul Dwata hol gónó mogot. Efet nim kmoen ni sana gel kmò kem tau Gibyun du yóm nmò le yó bè yóm benwu deng nélék Dwata mò gónó le gel tmaba ebéléen yó kem tauhen.