Juswa 8 - Udél Dwata: Gna Kesfasad ne Lomi Kesfasad

Kegbà yóm syudad Ay

¹ Yó bud mon Dwata mò ke Juswa, “Gotu nwitem yóm kdê sendaluem na ye e nundug yóm syudad Ay. Béi abay hlikò ne béi abay htakas. Hegmou uu bè yóm tau geta bè yóm syudad yó ne suu lem hólólem yó kem tauhen ne yóm syudaden ne yóm tonoken.

² Hol bud nmoem bè yóm syudad Ay ne bè yóm tau hol geta bè yó yóm deng nmoem bè Jiriku ne yóm tau hol geta bè yó snéen. Okóm bè nim kundug ye ni, gbek ye ne ma du mò kuy yó kem kimu bè yó ne yóm kdê ton ye bè yó. Tódô kento nundug ye yóm syudad yó mlan ye gu bè kwangen.”

³ Tahu se, htifes le Juswa ne yóm kdê sendaluen bè yóm na le e kundug ebè Ay. Wen tlu folò libu sendalù néléken hono kem sendalù deng hónô layam bè sfatay. Yó hmoen kul mò fen hógówen kifu

⁴ ne yó hlauhen kul, monen, “Ke sok ye kól ditu, hebnos ye sentu yóm syudad yó okóm bê ye kat hlayuk. Eles ye htigel.

⁵ Lemwót dou ne yó kem sendalù mung dou, tódô me hekteng ebè yóm syudad yó. Ke sok ton le mi yó kem tau bè syudad Ay, gotu le hewà ne nwit le mi sfatay. Okóm yó nmò me, gotu me mlóy lómón yóm tehe gna klóy yó kem sendalù tekuy.

⁶ Ngang le kemtes kum efet me mayuk bè yóm syudad le. Ofo kul mon du ke mlóy me bélê le lómón yóm tehe gna klóy yó kem sendalù, anì monem là.

⁷ Omin ye yó kento hewà gu bè yóm gónó ye hebnos ne nled ye yóm syudad le. Yóm sana kuy Dwata hol gónó mogot fen bemlay du elem hólól ye.

⁸ Ke sok deng gled ye yóm syudad yó, gotu ntem ye yó kem gónô bè yó lómón yóm deng hmò Dwata kuy. Yó se yóm mò lolò ye.”

⁹ Tahu se, gna le lemwót yó kem sendalù hógów Juswa yó ne hlós le ebè yóm gónó le e hebnos fi desdef, bè blóng Ay ne Bétél. Okóm kul le Juswa, fen le tebel bè yó bè kamfù le yóm kifu yó.

¹⁰ Hol hlafus bè yó, gotu htaba Juswa lu yó kem sendaluen ne gotu le lemwót etu bè Ay, tukô gna kul Juswa ne yó kem tau gónó le gel galak.

¹¹ Tódô le hlós ebè yóm lan bong msut ebè yóm syudad yó ne na le kmamfù bè yó fi debwak yóm syudad. Wen sbong blóng le bè Ay.

¹² Wen dô limu libu sendalù deng eles hebnos ditu fi desdef yóm syudad yó bè blóng Ay bè Bétél.

¹³ Duhen yó, deng le eles gotu htigel yó kem tey sendalù mung ke Juswa kmamfù fi debwak yóm syudad yó dalang se yó kem dumu le fen hebnos fi desdef. Suloy le buteng le Juswa nô bè yóm datal yó.

¹⁴ Timbow ton yóm tau hol geta bè Ay yó kem sendalù Israél kmamfù fi debwak, tódô kendel sentifunen yó kem sendaluen. Hol hlafus bè yó tódô nundug le yó kem sendalù Israél kmamfù sentu yóm Datal Jurdan, yóm datal tehe gna gónó le sfatay. Blaem là kô tngónen du yó kem sendalù Israél deng eles hebnos angat mundug du gu bè kwang yóm syudaden.

¹⁵ Bè yóm kuluk yó kem sendalù Ay kul le Juswa, lemwót le Juswa ne yó kem sendaluen hlingón le mlóy etu bè yóm benwu laen hol wen tauhen.

¹⁶ Lemwót yóm tau hol geta bè Ay gotu htabahen yó kem logi bè yó mò kemtes kul le Juswa. Ngang le kemtes kul efet le mayuk bè yóm syudad le

¹⁷ ne tódô mngal yóm syudad le, balù sotu tau ke wen mentey du.

¹⁸ Omin Dwata mon du mò ke Juswa, “Hdoem ebè Ay yóm buyusem. Blayu elem hólólem yóm syudad yó.” Tahu se, nmò Juswa yóm deng mon Dwata mò du yó.

¹⁹ Hol hdò Juswa ebè Ay se yóm buyusen, sen-geng le se hesut gu bè yóm gónó le e hebnos yó kem sendalù Israél ne tódô le hekteng mlóy elem yóm syudad yó ne nled le ne tódô kendel dnutung ntem le.

²⁰ Timbow le temngel semfulék yó kem sendalù Ay, tódô ton le yóm tey kebel mbob etta bè longit. Laen kô dù gónó le e mlóy abay se yó kem sendalù Israél tehe hlingón mlóy, bud beklil mit kul sfatay.

²¹ Lemwót bè yóm deng kton Juswa du ne yó kem sendaluen yóm deng kled yó kem dumu le du yóm syudad Ay ne yóm tey kebel mbob etta bè longit, yó gónó le beklil se kul na le e senfatay yó kem sendalù Ay kemtes kul.

²² Bud le lemwót se kul yó kem sendalù Israél fen dnutung ntem le yóm syudad Ay, bud le tóbóng se kul, gotu hnatay le yó kem hohon le. Tódô gotu snibut kem sendalù Israél lu ne gotu hnatay le lu yóm kdê le. Balù sotu ke wen mowil bélê le.

²³ Són hlowil le són yóm tau hol geta bè yó. Yó kmò le du, kenfô le ne nwit le ebè Juswa.

²⁴ Gotu hnatay kem sendalù Israél yó kem hohon le kemtes kul bè yóm benwu laen hol wen tauhen. Omin le bud semfulék ebè Ay ne gotu hnatay le yó kem dù tau tebel bè yó.

^25-26 Song kó Juswa yóm kehdoen buyusen ebè Ay, deng gotu mimot khatay le kul yó kem tau bè yó. Yó kwen tau hnatay le gomong libun, sfolò lewu libuhen.

²⁷ Gotu nwa yó kem tau Israél yó kem ógóf ne yó kem kimu ton le bè yóm syudad yó, hol lómón yóm deng mon yóm sana kul Dwata mò ke Juswa.

²⁸ Gotu htem Juswa yóm kdéen gónô lem yóm syudad yó, laen kô dù tebel. Efet nim kmoen ni sana kmoen.

²⁹ Yó kmò Juswa du yóm tau hol geta bè Ay, hetléwéngen bè koyu efet kól kimel. Song hwahen elaan deng sdef kdaw. Tódô tudà le gu bè bak tikeb yóm syudad yó. Tey botu wen luduk le tahen, efet nim kmoen ni sana tolo knô le bè yó, yó kem botu yó.

Bud kehget le du bè Bulul Ibal yóm deng tehe senfasad le Dwata ditu bè Bulul Sinay

³⁰ Bè yóm deng kgefet le bè Bulul Ibal le Juswa ne yó kem tau Israél, yó nmò Juswa wen gónó le demsù hdaen bè yó mò gónó le demsù ebè yóm kul Dwata hol gónó mogot yó kem tau Israél.

³¹ Yóm kehdaen du, tódô loloen yóm hlolò Musis yó kem tau Israél yóm Musis tehe tóbóng lówó Dwata, duhen yóm tehe snulaten bè Bok Hlau yóm monen, “Semsodò ye béléu botu mò gónó ye demsù ebéléu, yóm botu laen dù lan tók du.” Bè yó gónó le demsù du ebè yóm sana kul Dwata yóm dsù hkekeb le ne yó kem dumu dsù gel ken le dumuhen bè yóm gel kestifun le bè solu Dwata.

³² Bè yó bè yóm igò le temngel yó kem tau Israél, lemwót Juswa snulaten bè yó kem botu yóm hlau tehe snulat Musis yó.

³³ Yó nmò yó kem tau Israél ne yó kem tau malak kul ne yó kem tau wen glalen bélê le ne yó kem fen kmukum bélê le, dalang se yó kem tólóng tau menwu lem blóng le, gotu le mdà sbalà yóm Slungan Fasad smolu le ebè yó kem sfu Libay fen mit du. Sóól bè yó kem tau Israél fen mdà kmogol yóm Bulul Girisim ne sóól se fen mdà kmogol yóm Bulul Ibal. Nim nmò le ni, deng tehe eles hlau Musis kul mò nmò le ke sok gel kól bè yóm kdaw kuyag le yó kem tau Israél.

³⁴ Omin Juswa hgel semfala du yó kem hlau Musis, gomong lemen yóm kuyag Dwata yó kem tau mimón du ne yóm tafaken yó kem tau là mimónen. Gotu senfalahen yóm tehe snulat Musis lem yóm Bok Hlau.

³⁵ Tódô gotu senfala Juswa bè yóm kdéen tau Israél, gomong kem libun ne kem ngà ne yó kem tólóng tau menwu lem blóng le. Gotu senfalahen bélê le yóm kdê hlau Dwata tehe snulat Musis.