Juswa 7 - Udél Dwata: Gna Kesfasad ne Lomi Kesfasad

Salà Akan ne yóm tafaken

¹ Bè yóm tehe kegbà le yóm syudad Jiriku yó kem tau Israél, deng eles wen hlau Dwata kul yóm là kehyuhen ke wen nwa le bè yóm kimu deng hetfing le ebéléen. Okóm deng mom wen bélê le mulé du. Yó mulé du, yóm sotu tau bélê le boluyen Akan. Yóm Akan ngà Karmi ne témê Sabdi, tau lemwót bè ktol Sira ne lemwót bè kun ból Juda. Lemwót bè nim nmò Akan ni, gónón alì sidek kebut Dwata yó kem tau Israél.

² Bè yóm knô le Juswa bè Jiriku, yó nmoen wen kem tau dóken hemkana yóm syudad Ay. Nim Ay ni, nô fi dmata kdaw Bétél moni bè Bitabin. Bè yóm deng bud kkól yó kem tau hemkana dók Juswa yó koni,

³ gotu tulón le ke Juswa yóm kdê ton le, mon le, “Là katen bong tum syudad tu. Anien he ke là kdéen du tau mundug edu. Anien ke olon lewu libu duhen ke tlu libu tau mundug etu, kaem gbek le.”

⁴ Tahu se, wen dô tlu libu sendalù Israél hógów Juswa na a mundug etu. Okóm bè yóm kkól le ditu, deng le mom gotu mlóy mulék laen kô dù gmò le.

⁵ Gotu ktes kem tau Ay lu. Ktes le lu lenwóten bè bak tikeb yóm syudad yó efet kól ditu bè yóm gónó le gel kemleng botu lembang. Bè yóm klóy le mosol yó kem tau Israél, wen dô tlu folò nem hnatay yó kem tau Ay bélê le. Lemwót bè yóm là kegmò le, gotu le lenmek yó kem tau Israél ne ya tey sidek klikò le.

⁶ Timbow tngón Juswa nim gfà le ni, ya tey sidek kegnómen du dalang se yó kem tau gel malak yó kem tau Israél, botong geksê le nes bè lówó le. Tódô le hegluduk bè tonok bè solu yóm Slungan Fasad. Tódô le lemfen bè yó efet seklewet ne wen kfung sù le ta kulu le mò gónó le hegfan du yóm tey ksidek kegnóm le du.

⁷ Yó udél Juswa ebè Dwata, monen, “Ó Dwata, uu se yóm hol dandónen geta. Moen du ke nwitem mi mifal yóm Él Jurdan? Ilóem tô blayem mi elem hólól yó kem tau Amurayt kô? Tô gotu genlaem mi kô? Yake tehe me tódô henek menwu ditu ne fatu Él Jurdan.

⁸ Laen kô dù bud kmonu du ne ni, Dwata, yakà deng le gotu mlóy gu bè hohon le yó kem tau Israél.

⁹ Ke deng gotu glalag bè kem tau Kanan ne bè yó kem dumu tau bè klamangen benwu nim gfà me ni, angat gotu snibut le mi ne angat gotu hnatay le mi yóm kdê me. Ke yó se nmò le bélê me yó kem hohon me, tedu se tô kmoem du du anì là lanahen yóm klikò le kóm?”

¹⁰ Okóm yó udél Dwata ebè Juswa, monen, “Ó Juswa, mdai ne. Moen ni du ke tleki lemfen bè tonok?

¹¹ Deng le gemsalà béléu yó kem tau Israél. Deng nulé le yóm deng senfasad me ne deng wen nwa le bè yó kem kimu hetfingu kul mò dou. Deng mom hennagaw le lel le hmalà du ne deng homong henyu le bè yó kem kimu le.

¹² Ni se gónó le là gemmò bè yó kem hohon le yó kem tau Israél, yakà deng le gomong meglà bè yó kem tau genlau. Là bude nô lem blóng ye ke là na ye gotu genbà du yó kem kimu monu mò kuy là hyu ma du.

¹³ Yó ne Juswa, hfólós ye lu yó kem tau anì mógów le ebéléu haya. Tulónem kul eles le htifes abay se ou se yóm kul Dwata hol gónó mogot yó kem tau Israél ne wen monu mò kul. Yó monu, ‘Ó kem tau Israél, deng wen kem kimu nwa ye bè yó kem kimu hetfingu kuy mò dou. Ke là na ye kó du ni kem kimu deng hennagaw ye ni, là kô ye na a gemmò bè yó kem hohon ye.’

¹⁴ Duhen ni, Juswa, hol tulónem kul, hlafus haya gotu le mdà bè soluhu anì hegfanu bélê ye gónóhen nô yóm kimu monu yó. Bè yóm kdà le bè soluhu, mlan bè ket ból le. Yóm ból tendoku, bud le mdà bè soluhu mlan bè ket ktol le. Yó se ktol tendoku, bud le mdà bè soluhu mlan bè ket fes lówó le. Ne yóm fes lówó tendoku, bud le mdà bè soluhu mlan bè ket sotu tau.

¹⁵ Yó se tau tendoku, deng duhen yó gónóhen nô yóm kimu monu yó. Yó tafaken, hnatay ye, ne tódô hkekeb ye bè ofi gomong yó kem fes lówóhen ne yóm kdê nfunen. Yóm nmoen yó, deng nuléhen yóm deng senfasad tekuy ne tey sidek kehyaken yó kem tau Israél.”

¹⁶ Tahu se, hol hlafus bè yó gotu htaba Juswa yó kem tau Israél, senbungen lu bè ket ból le. Ne yó tendok Dwata, duhen yóm kun ból Juda.

¹⁷ Gotu htaba Juswa lu ebéléen yó kem ból Juda ominen sembung kul bè ket ktol le. Ne yó tendok Dwata yóm kun ktol Sira. Omin Juswa gotu htaba yó kem ktol Sira ne senbungen lu bè ket fes lówó le. Ne yó tendok Dwata yóm kun fes lówó Sabdi.

¹⁸ Gotu htaba Juswa lu ebéléen yó kem fes lówó Sabdi yó, ngangen ne mlan bè ket tau. Ne yó tendok Dwata duhen Akan yóm ngà Karmi témê Sabdi.

¹⁹ Yó mon Juswa mò du, “Tey Tò, hol tulónem ktahuhen bè ni bè solu Dwata, yóm Dwata hol gónó tekuy mogot kem tau Israél. Hol benkasem yóm deng nmoem. Tulónem dou kun, hol béem bnos béléu.”

²⁰ “Tahu se yó,” mon Akan, “denge gemsalà bè Dwata yóm Dwata hol gónó tekuy mogot kem tau Israél.

²¹ Bè yóm tehe kegbà me yóm syudad Jiriku wen sotu tey nes tilob tonu lemwót bè Babilun. Bud wen tonu dô lewu kilu blówón bukay ne sekleng tahu blówónen, wen dô sóól kilu keblaten. Bè yóm ktonu du tey óyóu du, ne tódô nwahu. Ne ditu gónóhu lembeng du lem toldahu, hol fi laan yóm blówón bukay.”

²² Duhen yó, wen kem tau dók Juswa etu bè kamfù Akan mò na a hménég du ke tahu yóm tulónen yó. Tódô le mlóy etu ne ton le lebeng bè yó, yó kem kimu deng hennagaw Akan ne hol fi laan yóm blówón bukay lómón yóm deng mon Akan mò kul.

²³ Gotu nwit le lu ebè Juswa ne bè kdê yó kem tau Israél yó kem kimu yó ne hlasà le lu bè yó bè solu Dwata.

²⁴ Lemwót Juswa ne kdê yó kem tau Israél, tódô nwit le Akan. Gotu nwit le yó kem kimu deng bnosen yó koni, yóm blówón bukay ne yóm nes ne yóm sekleng tahu blówón. Bud nwit le snéen yó kem ngaen logi ne ngaen libun. Yó kem safien ne yó kem kudà asnuhen ne kem ubihahen ne yóm toldahen ne yóm kdê dumu nfunen, gotu nwit le ebè yóm datal boluy le du, Datal Gfà.

²⁵ Yó udél Juswa ebè Akan, monen, “Moen de ke nwitem elem blóng tekuy nim tey gfà bong ni? Ne ni, wen tey hegfà Dwata kóm.” Duhen yó, tódô hnatay sentudà le botu Akan yó kem tau, homong le yó kem fes lówóhen ne gotu hkekeb dnutung le lu gomong yóm kdê nfun le.

²⁶ Tikóng deng gotu hkekeb le lu, tey botu snuduk le ta le ne efet nim kmoen ni sana knóen bè yó, yó kem botu yó. Lemwót bè yóm gfà le Akan bè yó, yó gónó le moluy du Datal Gfà yóm datal yó efet ni kmoen ni. Ominen yó he mkó ta yó kem tau Israél yóm tey kebut Dwata kul.