Juswa 6 - Udél Dwata: Gna Kesfasad ne Lomi Kesfasad

Kegbà Jiriku

¹ Yó kem bak tikeb bè Jiriku, tendo tnikeb le ne bnentey le anì là gógów le elemen yó kem tau Israél. Balù sotu tau ke wen tô gusek ne balù sotu ke wen se hewà gu lem yóm syudad yó.

² Okóm yó udél Dwata ebè Juswa, monen, “Deng blayu elem hólólem yóm syudad Jiriku ne yóm tau hol geta bè yó ne yó kem sendalù alì lóbô le.

³ Yó nmoem nwitem yóm kdê sendaluem, lenibut ye yóm syudad Jiriku. Nem dulék ye lemibut du bede ket sulék sendaw.

⁴ Eles mung kuy yó kem tau gel blóng ebéléu mit yóm Slungan Fasad. Hitu bélê le fen mógów tukô gna yóm Slungan Fasad yó, sket kul kmulóng féw. Bè yóm ghituhen kdaw yó nmò ye, hitu dulék ye mógów lemibut yóm syudad yó. Ne igò ye lemibut du, igò le mféw yó kem tau gel blóng ebéléu.

⁵ Ke deng deng yóm ghituhen dulék kógów le yó, omin le mféw htawid. Uni le mungol du yóm kdéen sendalù Israél yóm tey uni féw htawid yó, hol le se gotu mensag yóm kdê le ne tódô sen-gengen se gbà beng yóm syudad yó. Ne tódô le mógów hekteng elemen yóm kdéen sendalù Israél.”

⁶ Tahu se, htaba Juswa yó kem tau gel blóng ebè Dwata ne monen mò kul, “Nwit ye yóm Slungan Fasad bè yóm klibut tekuy du nim syudad ni. Hitu bélê ye mógów tukô gna du sket mit féw.”

⁷ Omin Juswa mudél ebè yó kem sendaluen, monen mò kul, “Lemwót tekuy ne, lenibut tekuy yóm syudad. Eles wen kem sendalù mò hol tukô gna fen mentey yóm Slungan Fasad.”

^8-9 Tahu se, tódô uliten bè yóm deng mon Juswa mò kul. Wen kem sendalù tukô gna yó kem tau mféw. Todol bè yó kem tau mféw yó kem tau blóng ebè Dwata mit yóm Slungan Fasad ne bud wen kem sendalù huli kul mò fen mentey. Bè yóm kógów le tódô senflós le mféw.

¹⁰ Okóm deng eles hetgama Juswa yó kem sendaluen, monen mò kul, “Hol bê ye tagad mensag. Hol bê ye tagad mudél balù sekteb. Nangat ye yóm kdóku kuy mensag, omin ye yó he hol hendlà mensag.”

¹¹ Tahu se, sulék le mit du lemibut yóm syudad yó yóm Slungan Fasad, omin le semfulék ebè kamfù le ne bè yó gónó le tungô.

^12-13 Timbow hol hlafus hayahen bè yó, tódô temkifu btik Juswa ne yó se yóm gewu le dulék lemibut yóm syudad yó yó kem tau gel blóng ebè Dwata ne yó kem sendalù, hol lómón yóm deng nmò le bè yóm gnan. Tanayen, wen yó kem sendalù fen gel tukô gna mò mentey, todol yóm hitu kem tau gel blóng ebè Dwata mò fen mféw, ominen yó kem dumu le mò fen mit yóm Slungan Fasad ne huli kul yó kem dumu sendalù mò mentey. Bè yóm kógów le lemibut yó, tey uni féw.

¹⁴ Bè nim gewuhen kdaw ni, bud lenibut le sulék yóm syudad yó, omin le bud mulék ebè kamfù le. Nem kdaw le mò du nim ni.

¹⁵ Timbow kól bè yóm ghituhen kdaw hanà tolo minal mwas, gotu le bud btik na le e bud lenibut yóm syudad yó lómón yóm deng gel nmò le. Okóm bè nim ghituhen kdaw ni, hitu dulék le tendo lemibut du.

¹⁶ Tikóng deng hitu dulék le lemibut, omin le yó hol htawid mféw yó kem tau gel blóng ebè Dwata. Uni Juswa mungol du yóm yó yó udélen, monen, “Hol ye hendlà mensag, yakà deng blay Dwata du tekuy nim syudad ni.

¹⁷ Gotu genbà tekuy gomong yóm kdê nô lemen mò dsù hkekeb tekuy ebè Dwata. Tek són Rahab yóm libun hdóyón ne yó kem fes lówóhen fen gewà abay se tehe bnosen yó kem tau hemkana.

¹⁸ Okóm hol béen abay wen nwa ye bè yó kem kimu heglà Dwata kuy. Ke ma ye, meglà ye se kuy ne yu fen mit hlayam ebè yó kem tau Israél.

¹⁹ Okóm tódô kdê yó kem kimu tenwél le bè blówón bukay ne bè tahu blówón ne bè tembaga ne bè bala tók, ke Dwata funen. Hol sù ye bè yóm gónó tekuy gel hemyu yó kem kun kimu Dwata.”

²⁰ Tahu se, bè yóm kungol kem sendalù du yóm tey uni féw htawid, tódô hendlà le mensag se kul. Ne tódô sen-gengen se gbà yóm beng hmilol Jiriku. Omin le yó tódô mógów hekteng elemen yó kem sendalù Israél ne nled le yóm syudad yó.

²¹ Gotu hnatay le yóm kdéen tau nô lemen mlan bè sudeng le, kem logi ne kem libun, kem ngà ne kem tuha. Gotu hnatay le snéen yó kem safì ne yó kem ubiha ne kem kudà asnu.

²² Omin Juswa mdók yóm lewu kem tau tehe hemkana, monen mò kul, “Hgéhél ye etu bè gónô Rahab yóm libun hdóyón, anì nwit ye hewà mung du yó kem fes lówóhen lómón yóm deng fasad ye du.”

²³ Tahu se, lemwót le, nwit le hewà Rahab, mung du maen ne yéen ne kem logihen ne yó kem dumu fes lówóhen. Gotu nwit le lu kdê le, sù le lu ditu klohok kamfù yó kem tau Israél anì laen dù hemen le.

²⁴ Omin kem tau Israél mtem du yóm syudad yó ne gotu mlób yó kem nô lemen. Són là mlóben són yóm kimu deng eles nwa le, yó kem kimu tenwél le lemwót bè blówón bukay ne bè tahu blówón ne bè tembaga ne bè bala tók. Yó se yóm kimu eles nwa le ne hsù le bè yóm gónó le gel hemyu yó kem kun kimu Dwata.

²⁵ Duhen yó, fen hlowil Juswa Rahab, yóm libun hdóyón ne kdê yó kem fes lówóhen nô bè gónóen abay se tehe bnosen yó kem lewu tau hemkana tehe dók Juswa ebè Jiriku. Efet nim kmoen ni menwu le lem blóng yó kem tau Israél yó kem sfu Rahab.

²⁶ Bè yóm kdaw yó, tey mget yóm olu Juswa eta yóm syudad Jiriku, monen, “Ke wen tau bud mò du syudad nim Jiriku ni, deng megtuled bè Dwata ne yóm tau yó. Ke wen tau bud mò begelen, angat lana béléen yóm ngaen logi twogu. Ke wen tau bud mò yó kem tikeben, angat lana béléen yóm ngaen logi twoli.”

²⁷ Duhen yó, tódô senflós Dwata nô bè Juswa ne tódô lenngeben yóm klamang yóm benwu yó yóm tey któtól Juswa.