Juswa 5 - Udél Dwata: Gna Kesfasad ne Lomi Kesfasad

¹ Tódô kdê yó kem tau hol geta bè kem Amurayt nô fi desdef Él Jurdan ne kdê yó kem tau hol geta bè Kanan nô bè kilil Mohin Miditiranyan, gotu mungol du yóm deng kehekti Dwata du bè yó kem tau Israél yóm Él Jurdan efet le gotu mifal yóm kdê le. Bè yóm kungol le du ya tey sidek klikò le, botong lana bélê le klóbô le.

Bud kehmò Dwata yó kem tau Israél yóm hlau bè kehtulì

² Bè yóm kdaw yó, bud mon Dwata mò ke Juswa, “Ó Juswa, moi kem suk lemnek lemwót bè yóm botu boluyen flint mò tuliem yó kem tau Israél.”

³ Tahu se, nmò Juswa yó kem suk lemnek hmò Dwata du yó ne gotu tnulien yóm kdéen logi Israél bè yóm benwu boluy le du Bulul Lemnek Gónó Htulì.

^4-6 Bè yóm tehe ktebel le yóm benwu Idyip yó kem tau Israél, tódô kdê yó kem logi bélê le deng le eles gotu tnulì. Blaem kogolen bè yó lem yóm fat folò halay le kegen le mógów lem yóm benwu laen hol wen tauhen, balù sotu bè yó kem ngà le logi hanà hulô ke deng tnulì le. Sotuhen, bè yóm kdaw kifal le Él Jurdan yó kem tau Israél, tódô kdê yó kem logi hulung mit sfatay tehe lemwót bè Idyip deng tnulì deng le gotu matay lem yóm benwu laen hol wen tauhen lemwót bè là kimón le ke Dwata. Igoen tey mget yóm tehe kmon Dwata du mò kul, “Là kô ye na a gehlós edu kuy yóm tey tonok tilob ne tonok tembas tehe fasadu yó kem tehe fù ye.”

⁷ Blaem yó kem ngà le logi yó kem tau deng matay ni, là kô deng wen tmulì kul bè yóm hanà kudì le ne duhen lu se ni kem tau tnulì Juswa ni.

⁸ Kogol yóm deng ktulì Juswa kul, tódô kdê le gotu henek bè kamfù le efet deng gotu mkó yóm halì le.

⁹ Yó bud udél Dwata ebè Juswa, monen, “Kemdaw ni henwósu ta ye yóm tehe kyak ye bè yóm tehe keghesek ye bè Idyip.” Ne yó gónó le moluy du Gilgal yóm benwu yó efet ni kmoen ni.

¹⁰ Bè yóm igò le tolo kmamfù bè Gilgal yó kem tau Israél bè yóm datal moni bè Jiriku, bud hnigal le yóm Kdaw Khius bè yóm móyón kifu bè gesfoloen fat kdaw bè yóm tanay bulón. Yó se yóm bulón tehe kewót le gu bè Idyip yó kem tau Israél.

¹¹ Hayahen bè yó, yó he yóm hol tanay kdaw kken le du yó kem hulu glo le bè Kanan, duhen yóm halay senla nuta le bè yó ne yóm mambang nmò le gu bè yóm nuta le, yóm mambang laen dù bulung henoken.

¹² Bè yóm kdaw yó laen dù bud mana btang ebélê le ne là se bud ton le du ne yóm mana yó. Tódô lenwóten bè yóm kdaw yó, són ken le yó kem hulu tmowok bè Kanan.

Kton Juswa yóm tau wen sudeng nogoten

¹³ Bè yóm igò Juswa móyón gdofì bè Jiriku, tódô kento tonen yóm tau mdà bè soluhen mogot sudeng. Omin Juswa hloni ebéléen ne snólóken, monen, “Tmau kóm de? Uu kô sotu bè yó kem sendalù me duhen ke hohon me?”

¹⁴ “Là,” mon yóm tau yó. “Ou se kmandér bè yó kem sendalù Dwata.” Tódô lemfen bè tonok Juswa lanen heglaan knóen béléen, monen, “Ó Sér, ou se tau tóbóng lówóhem. Tedu se hmoem dou du?”

¹⁵ Ne yó monen mò du yóm kmandér yó koni, “Kóhem tlumfaem, abay se dengi mdà bè yóm tonok gónóhu nô.” Tahu se, nmò Juswa yóm monen mò du.