Juswa 4 - Udél Dwata: Gna Kesfasad ne Lomi Kesfasad

Kessodò le yó kem botu mò heftulón du bè nawa le bè yóm deng kifal le Él Jurdan

¹ Timbow deng nifal yóm kdéen tau Israél yóm él Jurdan, yó udél Dwata ebè Juswa, monen,

² “Yóm sfolò lewu kem tau deng nélékem, ket sotu lemwót bè ket ból yóm sfolò lewu kem ngà Jakub,

³ hwahem lu sfolò lewu botu bè hol gónón sóól lel Él Jurdan bè yóm gónó le mdà yó kem tau fen mit yóm Slungan Fasad. Nwit le nim botu ni ete kembu ne sensodò le bè yóm bud gónó ye kmamfù kifu ni kedeng.”

⁴ Tahu se, omin Juswa tmaba yóm sfolò lewu kem tau deng néléken

⁵ ne monen mò kul, “Mógów ye ebè gónón sóól lel yóm Él Jurdan bè solu yóm Slungan Fasad yóm Slungan yóm sana Dwata hol gónó mogot. Ket sotu bélê ye tmihang sotu botu ete kembu, ket sotu botu bè ket ból yóm sfolò lewu kem ngà Jakub.

⁶ Nim botu ni mò heftulón du bè nawa yó kem tau Israél yóm deng nmò Dwata. Elem hulin kdaw ke snólók le yu yó kem ngà ye ke tedu lanen bélê ye nim botu ni

⁷ tulón ye kul, mon ye, ‘Yóm tehe ktihang le du mifal Él Jurdan yóm Slungan Fasad, botong tódô teflok lel yóm él. Ni kem botu ni mò tendo heftulón du bè nawa yó kem tau Israél yóm tehe nmò Dwata bè ni.’ ”

⁸ Tahu se, lemwót yóm sfolò lewu kem tau tódô lolò le yóm deng mon Juswa mò kul. Wen sfolò lewu botu nwa le bè hol gónón sóól lel Él Jurdan, ket sotu botu bè ket ból yóm sfolò lewu kem ngà Jakub ne nwit le ebè yóm gónó le bud kmamfù ne bè yó gónó le semsodò du lómón yóm deng mon Dwata mò ke Juswa.

⁹ Dalang se ke Juswa, wen sfolò lewu botu sensodoen bè hol gónón sóól lel yóm Él Jurdan bè yóm gónó le mdà yó kem tau fen mit yóm Slungan Fasad. Ni kmoen ni sana tolo knô le bè yó he yó kem botu yó.

¹⁰ Ngang le mdà bè gónón sóól lel Él Jurdan yó kem tau fen mit yóm Slungan Fasad efet deng gotu deng yóm hmò Dwata ke Juswa, yóm deng eles tulón Musis du.

¹¹ Yó kem tau Israél, ya tey keheslò le mifal du yóm Él Jurdan. Timbow le deng gotu kól fi fatu, yó he kul khotun ete kembu yó kem tau fen gel mit yóm Slungan Fasad.

¹² Lemwót yó kem logi semfu gu bè Rubén ne semfu gu bè Gad se sóól semfu gu bè Manasi, deng le eles htigel bè sfatay ne kul, mifal le tukô gna yó kem dumu le lómón yóm deng mon Musis mò kul.

¹³ Wen dô fat folò libu kwen le deng eles htifes bè gida ne gotu le mifal moni bè Jiriku ne eles nô bélê le Dwata.

¹⁴ Yó nmò Dwata bè yó kem tau Israél bè yóm kdaw yó, hdilóen bélê le Juswa mò fen malak kul. Bè yóm klawi Juswa mowil tey kadat le du hol lómón yóm tehe kadat le ke Musis.

¹⁵ Yó udél Dwata ebè Juswa, monen,

¹⁶ “Hotunem lu ete kembu ne yó kem tau fen gel mit yóm Slungan Fasad.”

¹⁷ Tahu se, hotun Juswa lu.

¹⁸ Bè yóm khotun le ete kembu, tódô bud mulék se lel yóm él ne sana tolo kdunuken.

¹⁹ Yóm kifal le Él Jurdan yó kem tau Israél, deng bè gesfoloen kdaw bè yóm tanay bulón. Bè Gilgal gónó le kmamfù fi dmata kdaw Jiriku.

²⁰ Bè yó gónó Juswa semsodò du yóm sfolò lewu kem botu deng nwa le lem Él Jurdan.

²¹ Yó udél Juswa ebè yó kem tau Israél, monen, “Elem hulin kdaw ke angat snólók le yu yó kem ngà ye ke tedu lanen ni kem botu ni,

²² hol tulón ye kul ni kem botu ni mò heftulón du bè nawa ye yóm tehe kifal ye yóm Él Jurdan, tódô ye mlan lemen bè gónón mékéng tonok.

²³ Tulón ye kul yóm kmò kehekti Dwata du bélê ye yóm él yó efet ye deng gotu mifal yóm kdê ye hol lómón yóm tehe kehektihen du bélê ye yóm Mohin Hulô.

²⁴ Yó gónó Dwata mò du nim ni anì tódô kdéen tau talak tonok gotu temngón du yóm tey kfasangen ne anì wen hol klikò ye du se kuy yóm kuy Dwata hol gónó mogot laen dù tul sónen.”