Juswa 3 - Udél Dwata: Gna Kesfasad ne Lomi Kesfasad

Kifal yó kem tau Israél yóm Él Jurdan

¹ Timbow hlafus hayahen bè yó, tódô temkifu btik Juswa ne kdê yó kem tau Israél, tnagak le yóm kamfù le bè Akasya, mógów le etu bè Él Jurdan ne bè yó gónó le hlun bud kmamfù, nangat le yóm kdaw le mifal.

² Tikóng deng tlu kdaw le kól bè yó, gotu bniwel yó kem tuha gónó le gel galak yóm klamang yóm kamfù le

³ ne yó tulón le yó kem tau, mon le, “Ke sok ton ye yó kem tau gel blóng ebè Dwata sentihang le yóm Slungan Fasad, yóm Slungan yóm sana kuy Dwata hol gónó mogot, gotu lenkas ye yóm kamfù ye ne lolò ye lu.

⁴ Là deng ye mlan bè ni se kuy, yó gónó le tukô gna kuy anì lolò ye lu. Okóm hol bê ye abay hloni e du yóm Slungan Fasad yó, wen dô sotu kilumitru klayuk ye edu.”

⁵ Yó udél Juswa ebè yó kem tau Israél, monen, “Hol hólós ye knô ye bè solu Dwata abay se haya wen hentaw ton nmò Dwata lem blóng tekuy.”

⁶ Tikóng hayahen bè yó, yó udél Juswa ebè yó kem tau gel blóng ebè Dwata, monen mò kul, “Sentihang ye yóm Slungan Fasad tukô gna yó kem tau mò malak kul mifal Él Jurdan.” Tahu se, nmò le yóm monen yó.

⁷ Yó udél Dwata ebè Juswa, monen, “Yóm nmou bélê ye kemdaw ni, mò gónó le madat kóm yó kem tau Israél mò tau malak kul. Ne bè yó gónó le dmilô du yóm knóu béléem lómón yóm tehe knóu bè Musis.

⁸ Hol tulónem yó kem tau fen mit yóm Slungan Fasad, ke sok le kól bè Él Jurdan tódô le hlós elemen, okóm na le htengen mdà moni bè kililen.”

⁹ Omin Juswa bud mudél ebè yó kem tau Israél, monen, “Mógów ye edini kun, hnungol ye yóm udélen ebélê ye yóm sana kuy Dwata hol gónó mogot.

¹⁰ Angat tódô tngón ye kemdaw ni yóm knóen bélê ye Dwata yóm Dwata laen tul katayen. Bè yóm igò ye mógów eta yóm tonok deng blayen kuy, du se fen mlo kul gu tahen yó kem tau Kanan ne yó kem tau Hitayt ne yó kem tau Hibayt ne yó kem tau Pirisayt ne yó kem tau Girgasayt ne yó kem tau Amurayt ne yó kem tau Jibusayt.

¹¹ Ngem bè yóm kifal ye Él Jurdan eles tukô gna kuy yóm Slungan Fasad yóm Slungan yóm sana kuy Dwata hol gónó mogot mfun yóm klamangen.

¹² Duhen ni méléki sfolò lewu tau, ket sotu bè ket ból yó kem tau Israél.

¹³ Lemwót yó kem tau gel blóng ebè Dwata fen mit yóm Slungan Fasad yóm Slungan yóm sana Dwata hol gónó mogot mfun yóm klamangen, ke dà le lem él ti le tódô teflok lel yóm él yó ne tódô segbusung ditu fi leged.”

^14-15 Uma kóm bè yóm kdaw yó, kdaw muta ne tolo dmunuk yóm él. Bè yóm ktagak le kamfù le yó kem tau Israél anì na le e nifal yóm Él Jurdan, fen le tukô gna kul yó kem tau gel blóng ebè Dwata fen mit yóm Slungan Fasad. Hol le se mdà lem él yó kem tau fen mit yóm Slungan Fasad,

¹⁶ tódô teflok se lel yóm él yó ne tódô segbusung eta ditu fi leged yóm syudad boluyen Adam yóm syudad klohok Saritan. Bong yó dum lelen e mool ebè Mohin Héét, gotu kti ne gbek le mifal moni bè Jiriku yó kem tau Israél.

¹⁷ Lemwót yó kem tau fen mit yóm Slungan Fasad yóm Slungan yóm sana Dwata hol gónó mogot, fen le mdà hol bè gónón sóól Él Jurdan bè yóm gónón mékéng tonok. Ngang le mdà bè yó efet le deng gotu mius yóm kdéen tau Israél mlan le bè gónón mékéng tonok.