Juswa 24 - Udél Dwata: Gna Kesfasad ne Lomi Kesfasad

Bud kehget le du bè Sékém yóm deng senfasad le Dwata yó kem tau Israél

¹ Yó bud nmò Juswa, gotu htabahen yóm kdê ból Israél anì gotu le stifun ebè Sékém gomong lemen yó kem tuha gel malak kul ne yó kem tau fen gel kmukum bélê le ne yó kem genlal bè Israél. Ne tahu se, gotu le mógów ne hlós le e klohok yóm Slungan Fasad yóm gónó Dwata nô lem blóng le.

² Yó udél Juswa ebè kdê yó kem tau Israél, monen, “Ni se udél Dwata, yóm sana Dwata hol gónó tekuy mogot yó kem tau Israél. Yóm tehe yu ekni, tehe le menwu ditu sentu Él Yufratis yó kem fù ye ne gel le tmaba ebè yó kem dumu dwata kéng. Yóm sotu bè yó kem tehe fù ye yó ekni duhen Tira yóm mà le Abraham ne Nahor.

³ Okóm nwitu Abraham yóm hol kuy fù, gu bè yóm tonok sentu Él Yufratis yó, nwitu edini bè nim benwu Kanan ni. Ne tey kehbólu du. Hngau du Isak

⁴ ne mngà ke Isak duhen Jakub ne Iso. Yó tonok blayu ke Iso, duhen yó kem bulul lemnek bè Idom mò kun nfun. Okóm yóm kuy fù Jakub ne yó kem ngaen, fen le mógów ebè Idyip.

⁵ Timbow le deng legen bè yó, hógówu ebélê le Musis lewu le Aron mò mit kul hewà bè yóm benwu gónó le ghesek yó. Yó kmou du, wen tey hlayam hwitu ebè yó kem tau Idyip.

⁶ Bè yóm kwitu kul hewà gu bè Idyip yó kem tehe fù ye, tey kektes le kul yó kem sendalù Idyip. Wen se bè yó kem sendalù yó smakay klitun, yóm klitun gel nit le bè gida ne wen se smakay kudà.

⁷ Okóm timbow le kól bè Mohin Hulô yó kem tehe fù ye yó ekni, tey kni le tóbóng béléu ne yó gónóhu bemlóng kul yóm tey kifu mget bè yó kem tau Idyip. Kogolen bè yó, bud hesfuléku eta yó kem sendalù Idyip yóm mohin deng sen-gawagu ne gotu le lemneb yóm kdê le. Deng gotu tngón ye se nim deng tehe nmou bè Idyip ni. Kogolen bè yó, tey kegen ye menwu lem yóm benwu laen hol wen tauhen.

⁸ Ominu mit kuy ebè tonok yó kem tau Amurayt yóm tonok yó kem tau menwu fi dmata kdaw Él Jurdan. Nit le yu sfatay, okóm hegmou yu bélê le. Bè yóm khusek ye elem yóm benwu le, gotu genlau lu ne gotu nwa ye yóm tonok le.

⁹ Kogolen bè yó, niten yu sfatay yóm tau hol geta bè Muab boluyen Balak yóm ngà Sipor. Wen udél hwiten ebè Balaam yóm ngà Biyur anì henmulaen yu.

¹⁰ Okóm là kô hlusu du du ke henmulaen yu. Mom yó hmou du, nuyagen yu. Ne bè yóm kuyagen kuy gónó ye gewà lem tdok Balak.

¹¹ Kogolen bè yó, nifal ye yóm Él Jurdan ne gefet ye bè Jiriku. Yó kem sendalù bè Jiriku, tey kwit le kuy sfatay. Senged se yó kem tau Amurayt ne yó kem tau Pirisayt ne yó kem tau Kanan ne yó kem tau Hitayt ne yó kem tau Girgasayt ne yó kem tau Hibayt ne yó kem tau Jibusayt, okóm hegmou yu bélê le yóm kdê le.

¹² Bè yóm tehe khusek ye elem benwu le, hol lómón ke wen yê nuhag hógówu tukô gna kuy, yó gónó le alì slaf yó kem lewu tau hol geta bè kem Amurayt. Bè yóm kegmò ye bélê le là lemwóten bè yó kem sudeng ye ne bè yó kem boho ye.

¹³ Ou se bemlay du kuy yóm tonok là tehe yu du mò nmò tahen ne yóm syudad là tehe yu du hdà du. Ne ni deng ye nô tahen yóm tonok yó ne ken ye yó kem grép là tehe kuy hulu du ne yó kem bungu ulib lemwót bè yó kem koyu là tehe kuy hulu du.”

¹⁴ “Ne ni,” mon Juswa, “hol knikò ye Dwata, yóm sana Dwata hol gónó tekuy mogot ne hol hotu ye nawa ye lemolò du. Gotu kó ye yó kem dwata lennged tehe kul gel tnaba yó kem tehe fù ye bè yóm knô le sentu Él Yufratis ne bè Idyip. Olon yóm sana kuy Dwata dé lolò ye.

¹⁵ Ke là móyô ye lemolò du, hol eles nélék ye kemdaw ni ke dwata du de yóm lolò ye, yó kem kul dwata kéng tehe gel tnaba yó kem tehe fù ye nô sentu Él Yufratis, duhen ke yó kem dwata kul gel tnaba yó kem tau Amurayt yóm tehe fun yóm tonok gónó ye nô ni. Bong béléu dou ne yó kem fes lówóhu, tódô henlós me lemolò ke Dwata yóm sana Dwata hol gónó mogot.”

¹⁶ Yó balà le ke Juswa yó kem tau, mon le, “Là kô knogol me du yóm sana kut Dwata ke tô lolò me yó kem dumu dwata kéng.

¹⁷ Yóm sana kut Dwata hol gónó mogot, du se deng mit kul hewà yó kem tehe fù tekuy bè yóm gónó le ghesek bè Idyip. Ne deng ton tekuy se yó kem hentaw ton deng nmò Dwata lem blóng tekuy. Efet nim kógów tekuy edini tey kofinen kut Dwata bè yóm klan tekuy gu lem blóng yó kem hohon tekuy.

¹⁸ Kaem Dwata se fen mlo kul yó kem tau Amurayt ne yó kem dumu but tau tehe nô ta nim tonok ni. Yó gónóm mon, lolò me Dwata se kum. Tek són du yóm sana Dwata hol kum gónó mogot.”

¹⁹ Yó bud udél Juswa ebè yó kem tau, monen, “Ngunte nim yu ke gbek ye lemolò ke Dwata. Tódô tngón ye se, du se yóm Dwata laen dù belenen ne tey sidek kélés nawahen du ke wen dumu dwata tnaba ye. Ne ke kenbê ye, là kô nan e hnifót kuy.

²⁰ Ke knogol ye ne deng ye mom tmaba ebè yó kem tólóng dwata, angat hohonen yu ne tnafaken yu. Angat genlaen yu baluen ke tey tilob kmoen ebélê ye bè yóm gnan kdaw.”

²¹ Okóm yó balà le ke Juswa yó kem tau, mon le, “Là. Là kô nmò me du yó. Dwata se hol kum lolò yóm sana Dwata hol gónó tekuy mogot.”

²² Yó bud udél Juswa ebélê le, monen, “Yu se temksì du yóm deng kélék ye yóm klolò ye ke Dwata yóm sana Dwata hol gónó tekuy mogot.” “Tahu se,” mon le, “mi se temksì du.”

²³ “Ke tahu se yóm mon ye yó,” mon Juswa, “gotu kó ye sen yó kem dwata lenged nô bélê ye. Ne hol fasad ye ke Dwata yóm klolò ye du yóm sana Dwata hol gónó tekuy mogot kem tau Israél.”

²⁴ Yó bud mon yó kem tau mò ke Juswa, “Tódô lolò me yóm sana kut Dwata hol gónó mogot. Ne nimón me yóm kdê hlauhen kum.”

²⁵ Duhen yó, bè yóm kdaw yó snulat Juswa yóm deng senfasad le Dwata yó kem tau Israél. Ne bè yó bè Sékém wen kem hlau Dwata blayen kul mò lolò le.

²⁶ Gotu snulat Juswa ni kem hlauhen kul ni bè yóm bok gónóhen nô yó kem Hlau Dwata. Ominen hwa sotu botu bong ne hluyen laan yóm koyu boluyen ok moni bè yóm Gónô Dwata.

²⁷ Yó udélen ebè yóm kdéen tau, monen, “Deng gotu gungol nim botu ni yóm kdê udél Dwata ebélê tekuy kemdaw ni, yóm sana Dwata hol gónó tekuy mogot. Ni se fen temksì du ke nulé ye yóm deng mon ye yó.”

²⁸ Omin Juswa gotu hulék kul yóm kdéen tau ne ket tau mulék ebè yóm kun tonok.

Katay Juswa

²⁹ Là legenen bè yó, matay Juswa yóm tau tóbóng lówó Dwata ngà Nun. Bè yóm katayen, deng lematu sfolò ne halayen.

³⁰ Lebeng le bè yóm kun tonok bè Timnat Sira bè yó kem bulul lemnek Ifraim senbwak Bulul Gaas.

³¹ Bè yóm igò Juswa tolo mowil, tey klolò le du yó kem tau Israél yóm sana kul Dwata. Ne senged se bè yóm deng katayen, tódô senflós le lemolò ke Dwata bè yóm igò le tolo mowil yó kem tau gónó le gel galak deng mton du yóm kdê deng nmò Dwata bè yó kem tau Israél.

³² Yóm tiol Jusif tehe nwit le gu bè Idyip yó kem tau Israél, lebeng le bè yó bè Sékém bè yóm tonok udì tehe benli Jakub ekni. Yó tehe blihen du, lematu botù blówón bukay bè yó kem ngà Hamor logi yóm Hamor mà Sékém. Nim tonok ni, hlós nfun yó kem sfu Jusif.

³³ Bud matay se ke Ilisar yóm ngà Aron logi ne lebeng le bè Gibya yóm benwu nô bè yó kem bulul lemnek Ifraim. Nim Gibya ni, deng blay le ke Finihas yóm ngà Ilisar logi.